Read lubukusu 2 Bab. 19 Bible Online

2 Bab. 19 - lubukusu bible

2 Bab. 19

¹Nga omwami Hesekia ne aulila kamakhuwa kabwe, atabula chingubo chewe mu bubeeleli, efwara likunia mala acha mu Lukaangu lwa Wele Omunyali Owa Bioosi.

²Aruma Eliakimu owemeelelanga lichipi lio mwami, Shebuna omuandiki ne basaayi bakhulu bache khu mung'oosi Isaya okhwa Amozi. Boosi baba bafwarire kamakunia.

³Baboolela Isaya bali, “Hesekia aloma ali, endaalo yino eli endaalo eye bubeeleli, kumunaanio ne eye chisoni. Khuli nga omukhasi ne ali embi khusaala mala se ali ne kamaani ke khusaala omwana oyo tawe.

⁴Wakana Wele Omunyali Owa Bioosi, Wele wowo auliile kamakhuwa koosi niko Rabushake, niye omwami wewe owa Ashuru arumire khukhoma Wele omenyile mindali. Wele Omunyali Owa Bioosi akhola ario aana kumunaanio khu makhuwa niko auliile. Khwako sabila abo balarama.”

⁵Barume bo mwami Hesekia becha khu Isaya.

⁶Isaya ababoolela ali, “Boolela omwami muli, kano niko Wele Omunyali Owa Bioosi aloma: ‘Mukhaba ne buuri khu makhuwa niko muulile tawe. Mukheembeelela khulwe kamakhuwa kamabi niko bakholi bo mwami owa Ashuru balomile khwise tawe.

⁷Lola, ndamuramo kumwoyo kwe buuri ne alaulila kamakhuwa kakhamanyikhaane tawe mala alakobola mu sibala siewe. Ne endamukhola ererwe mu sibala siewe.’ ”

⁸Rabushake akobolayo mala anyoola omwami owa Ashuru alikho apana ne lukoba lwa Libuna. Aba auliile ali omwami arurire e Lakishi.

⁹Likhuwa liolela omwami bali omwami Tirihaka owa Kushi[16] echile khumwibwaakala. Arumania lundi barumwa khu Hesekia ne aloma ali,

¹⁰“Boolela Hesekia owa Yuda muli, okhalekha Wele niye wiyikina oyo akhubea tawe. Okhamusuubila ne aloma ali lukoba lwa Yerusalemu se lulaebwa khu mwami owa Ashuru tawe.

¹¹Lola ewe wauliile niko babaami ba Ashuru bakhola bibala bioosi. Babionakilanga elala. Ewe wibaasia oli olaresibwa ku?

¹²Bakuka base babunia chingoba cha Kosani, Harani ne Resefu. Lundi babunia babaandu ba Beti-edeni babamenyanga mu Telasari. Ne bawele be babaandu babaonia ku?

¹³Babaami be chingoba cha Hamati, Aripadi, Sefaribaimu, Hena ne Iba bali waena?”

¹⁴Omwami Hesekia abukula ebarwa khukhwama khu barumwa mala akisoma. Acha mu Lukaangu, aara ebarwa eyo ebweeni wa Wele Omunyali Owa Bioosi.

¹⁵ Hesekia asaba ne aloma ali, “Ee, Wele Omunyali Owa Bioosi, Wele owa Isiraeli owekhala khu ndebe yowo eye bubwami angaaki we kerubi. Ewe weng'ene niwe Wele. Ewe Wele owe bubwami bwoosi bwe khwiloba. Wakhola liloba ne likulu.

¹⁶Rekeeresia Ee Wele Omunyali Owa Bioosi, mala oulile. Moka, ee Wele Omunyali Owa Bioosi mala obone. Ulila kamakhuwa ka Senakeribu niko arumaniisie khukhukhoma ewe, Wele omenyile mindali.

¹⁷Ng'ali ee Wele Omunyali Owa Bioosi babaami ba Ashuru babuniisie chikholo chingali ne kamaloba kacho.

¹⁸Ne bosia bawele babwe sikila se baba wele tawe ne kakhali biaba bikholwa bio omwana owo omundu. Bionakwa sikila biaba kimirongooro ne kamabaale.

¹⁹Nono luno, Wele Omunyali Owa Bioosi, Wele wefwe ekhusaba, khureesie efwe khukhwama khu Baashuru nio bibala bioosi bie khwiloba bilamanya bili ewe, Ee Wele Omunyali Owa Bioosi weng'ene oli Wele.”

²⁰Nio Isaya okhwa Amozi aruma burume aboolela omwami Hesekia ali, kano niko Wele Omunyali Owa Bioosi owa Isiraeli aloma: Nauliile lisaba liowo khwise khuloondekhana no mwami Senakeribu.

²¹Kano niko Wele Omunyali Owa Bioosi aloma khu Senakeribu “Omukhaana owe eyabwaana owa Sayuni, akhulekelesia ewe ne khukhukhoma, omukhaana owa Yerusalemu, akhusisiikhila ewe kumurwe.

²²Naanu niye okhomile ne khuchekheelela? Naanu niye olayinganianga ne khukhweniinia? Wabeele ne mbelekeu khwise, Omutakatifu owa Isiraeli!

²³Khubirira khu barumwa bowo, wakhomile Wele Omunyali Owa Bioosi walomile oli ndi ne chifarasi chase chingali nachiile khu ngaaki khwe bikulu, nachiile mu bikulu bileeyi bia Lebanoni, nareema kimirongooro kimitarakwa kimileeyi, ne kimirongooro Saipurasi kimilayi, nacha mukari lukali, mu musiru kumukali.

²⁴Nayaba chisebele, ne khunywa kameechi ke sibala sikeni, ne noomia chinuma che kameechi cha Misiri choosi, khulwe khurumikhira sikele.

²⁵Okhaaulilakho oli, kano kaba munganakani chase khukhwama khale tawe! Nakarekekha khukhwama khale, niko ekholile kekholekha luno luri, nio mukaluukhasie chingoba chisire chibe kamabuumbi ke bubwonaki,

²⁶Bamenya barusibwemo kamaani, bafwiile kimiooyo mala baambiilwe lirima, babeele nga bunyaasi butoro, nga bunyaasi buchoa khu nju, bwauchwa ne ekhuungu ne bukhachoa tawe.

²⁷Manyile niio omenyile, manyile chingila chowo, lundi manyile nga ne oli ne lirima khwise.

²⁸Sikila wambaambiile lirima, ne lililola liowo naliuulile, endara lulobo lwase mu lioolu liowo, ne endakhukhola okobolele khu ngila nikhwo wichiile.”

²⁹Isaya aboolela omwami Hesekia ali, “Esino sikhabe simanyisio sie kamakhuwa kaakhekholekhe, kumwiiko kuno mulalia biakhulia bibuukha bibieene, kumwiiko kwe khabili mukhalie biakhulia birombanga khu bibuukha ne kumwiiko kwe khataru miicha biakhulia mala mubikese. Lundi biaala kimisabibu mala mulie chisabibu.

³⁰Baaliona mu Yuda bakhasisine nga kumurogooro mala basaale baame kamatuunda.

³¹Ne khukhabe ne babaandu bakharame e Yerusalemu, khu sikulu sia Sayuni babaandu batiiti bakharame. Sinani sia Wele Omunyali Owa Bioosi, Wele owe banamae nisio siikhakhole kano.

³²Khwako Wele Omunyali Owa Bioosi aloma khuloondekhana no mwami owa Ashuru ali, se akheche mu lukoba luno namwe alasemo luembo, namwe alwichekho ne engabo namwe ombakhekho abuundu e khubotookhelesia tawe.

³³Wele Omunyali Owa Bioosi aloma ali Senakeribu alikobolela khu muyila nikwo echelakho ne kumwene, ne se alingila mu lukoba luno tawe.

³⁴Ekhasute lukoba luno nduonie khulwe lisina liase ne khulwo omukholi wase Daudi.”

³⁵Siilo esio malaika owa Wele Omunyali Owa Bioosi acha mu kambi eye Baashuru mala eera banamae chielefu emia ndala ne chielefu kamakhumi munane na chiraano. Nga babaandu ne benyokha makhelebeende banyoola bafu bong'ene.

³⁶Nio Senakeribu omwami owa Ashuru arekukha mala acha engo, mala amenya e Ninefe.

³⁷Endaalo ndala Senakeribu aba alikho esaaya wele wewe Nisiroki munju eya wele wewe. Basoleeli bewe babili, Adurameleki ne Sharesa, bamwiira mala belukhila mu sibala sia Ararati. Nio omusoleeli wewe Esarihatoni amiia mu bweyaangu bwewe aba omwami.