Read lubukusu 2 Bab. 2 Bible Online

2 Bab. 2 - lubukusu bible

2 Bab. 2

¹Siise nga ne sioola nisio Wele Omunyali Owa Bioosi abukulilakho Elicha ache mwikulu mu siafusia sikali, Elicha ne Elisha baba balikho bacha Kilikali.

²Nio Elicha aboolela Elisha ali, “Yikhala ano ekhusaba. Sikila Wele Omunyali Owa Bioosi andumire ese enje e Beteli!” Ne kakhali Elisha akobosia ali, “Nga Wele Omunyali Owa Bioosi ne amenyile mindali ne lundi nga wesi ne omenyile, ese se endakhulekha tawe.” Nio bacha bola Beteli.

³Ne sipupu sie bang'oosi ba baamenya e Beteli siacha khu Elisha mala bamureeba bali, “Ewe wamanyile oli luno Wele Omunyali Owa Bioosi alakhubukula omwami wowo?” Elisha akobosia ali, “Ee namanyile. Ne kakhali okhakalomalomakho tawe.”

⁴Elicha aboolela Elisha ali, “Elisha, ekhusaba rama ano, Wele Omunyali Owa Bioosi andumire ese nje e Yeriko.” Ne kakhali Elisha akobosia ali, “Nga Wele Omunyali Owa Bioosi ne amenyile mindali, lundi nga wesi ne omenyile ese se endakhulekha ewe tawe.” Nio bacha bola e Yeriko.

⁵Sipupu sie bang'oosi ba baamenya e Yeriko bacha khu Elisha mala siamureeba sili, “Ewe wamanyile oli luno Wele Omunyali Owa Bioosi alakhubukula omwami wowo?” Elisha akobosia ali, “Ee namanyile. Ne kakhali khukhakalomalomakho tawe.”

⁶Nio Elicha aboolela Elisha ali, “Ekhusaba ewe wikhala ano. Wele Omunyali Owa Bioosi andumire ese enje khu Luuchi lwa Yoritani.” Ne kakhali Elisha akobosia ali, “Nga Wele Omunyali Owa Bioosi ne amenyile mindali, ne lundi nga wesi ne omenyile ese se ndakhulekha tawe.” Nio bachiililila.

⁷Sipupu sie bang'oosi kamakhumi karaano siosi siabaloondakho e Yoritani. Elicha ne Elisha bema a luuchi, ne bang'oosi kamakhumi karaano abo bema sinao.

⁸Nio Elicha afuula engubo yewe eye khungaaki akiulukusa mala apa kameechi. Kameechi kakabukhanamo keela eyi ne eyi mala niye ne Elisha bambukhilao bacha lubeka luluundi lwe sibala.

⁹ Nga bamala khukhwambukha, Elicha aboolela Elisha ali, “Reeba nisio enyala nakhukholela ewe ne ekhabukulwa tawe.” Elisha akobosia ali, “Nosiima, ndekhele kumukabwa[3] kwe kamaani ke bung'oosi bwowo khukhwola khabili.”

¹⁰Elicha akobosia ali, “Wareebire sisiindu siaandalafu. Ne kakhali waaba ne olambona ne endikho mbukulwa khukhwama khwiwe, sikhabe sisiowo. Waaba ne okhambona tawe, se sikhekholekhe tawe.”

¹¹Nga baba ne bakeenda ne balomaloma, likaari ne chifarasi che kumulilo biecha biaukhasia Elicha khukhwama khu Elisha. Nio Elicha acha mwikulu khubirira mu siifuusia.

¹² Elisha abona mala ayokela ali, “Paapa! Paapa. Kamakaari ka Isiraeli ne babaandu batimia chifarasi chako!” Ne Elisha se abona Elicha lundi tawe. Elisha atabulamo engubo yewe mu bitonyi bibili.

¹³Angala engubo eya Elicha eyaba ne ekwile mala akobolayo acha eema khu sikiingi sie luluuchi lwa Yoritani.

¹⁴Elisha apa kameechi khulwe khurumikhira engubo eya Elicha ne aloma ali, “Wele Omunyali Owa Bioosi, Wele owa Elicha ali waena?” Nga ne apa engubo, kameechi kakabukhana keela eyi ne eyi, mala ambukha.

¹⁵Nga sipupu sie bang'oosi ba baaba Yeriko ne babona Elisha sinao baloma bali, “Roho owa Elicha luno ali khu Elisha!” Nio bacha khumwakaanana benama asi ebweeni wewe,

¹⁶bamuboolela bali, “Efwe khuli ano ne babaandu kamakhumi karaano. Nosiima lekha bache baenje omwami wowo. Wakana Roho owa Wele Omunyali Owa Bioosi amubukuule mala amumwaatile khu lukulu lulalakho namwe mu litooma lilalakho.” Elisha akobosia ali, “Mukharumania tawe.”

¹⁷Ne kakhali nga ne bamwikoonjelela, chisoni chamuaamba mala aloma ali, “Rumania.” Nono barumania babaandu kamakhumi karaano Bamuenja khulwe chindaalo chitaru ne se bamunyoola tawe.

¹⁸Nio bakobola khu Elisha e Yeriko niio aba amenya. Ababoolela ali, “Se namuboolela ndi mukhacha tawe?”

¹⁹Nono babaandu be lukoba lwa Yeriko bacha khu Elisha mala bamuboolela bali, “omwami lola abuundu niio lukoba luno luli ali abuundu alayi e khumenya. Ne kakhali kameechi kali kamabi ne kamaloba se kalimo engakha tawe.”

²⁰Aloma ali, chukha kumuunyu khu sibuumba siiya mala munderere. Bamureerera.

²¹Nio acha amoni eye kameechi mala achukhao kumuunyu okwo ne aloma ali, “Wele Omunyali Owa Bioosi aloma ali: ‘Nakholile kameechi kano khuuba kamalayi khukhwama luno khuchilila se kakhareerekho lifwa namwe khuusia tawe.’ ”

²²Mala kameechi ako kaba kamalayi khukhwamila ao khukhwola luno, bulayi bwene nga Elisha ne aloma.

²³Elisha acha khukhwama Yeriko khukhwola Beteli. Nga aba ne acha, babaana basoleeli balala bama mu lukoba mala bamukholela embelekeu ne bamuyokelela bali, “Musiole, rura ano”

²⁴Elisha ekhebukha ne nga ne ababona, abalaama mu lisina lia Wele Omunyali Owa Bioosi. Nio kamang'u kamakhasi kaama kasuungukha mu sichakha katabulakamo basoleeli kamakhumi kane ne babili abo mu bitonyi.

²⁵Elisha ama ao achiililila ola khu sikulu sia Karimeli, mala akobola e Samaria.