Read lubukusu 2 Bab. 20 Bible Online

2 Bab. 20 - lubukusu bible

2 Bab. 20

¹Mu ndaalo echo omwami Hesekia aba omulwale lukali enga khufwa. Omung'oosi Isaya okhwa Amozi acha amuboolela ali, “Wele Omunyali Owa Bioosi aloma ali, ‘Kololosia kamakhuwa ke nju yowo, sikila se olaona tawe, olafwa.’ ”

²Hesekia ayukha alola khwisiisi mala asaba Wele Omunyali Owa Bioosi ali.

³“Ee Wele Omunyali Owa Bioosi ekhusaba okhebulile luno oli ese nakhukholela ewe mu busuubili ne kumwoyo kwase kwoosi. Ne nakholile kaali kamalayi ebweeni wowo.” Mala Hesekia alila burafu.

⁴Isaya ne akharekukha abira aluya lwe akari lwo omwami tawe, elomo eya Wele Omunyali Owa Bioosi yamwichakho eli:

⁵“Kobolayo mala oboolele Hesekia, omwami we babaandu base oli, Wele Omunyali Owa Bioosi, Wele owa raraao Daudi aloma ali, ‘Nauliile lisaba liowo. Naboone kamasika kowo. Ndakhuonia ne mu ndaalo ekhola khataru okhache munju eya Wele Omunyali Owa Bioosi.

⁶Ndakhutasa kimiiko ekhumi na kiraano khu bulamu bwowo. Ndakhureesia ewe ne lukoba lwa Yerusalemu luno khukhwama khu mwami owa Ashuru. Endakhiinga lukoba luno khulwe lukoosi lwase samwene, ne khulwo omukholi wase Daudi.’ ”

⁷Nono Isaya aboolela bakholi bo mwami ali tubundula chinduli mala muakhe mu libiimba liewe mala alaona.

⁸Omwami Hesekia areeba Isaya ali, “Simanyisio siina silekesia sili Wele Omunyali Owa Bioosi alambonia, ne khu ndaalo eya khataru khanyale khucha munju eya Wele Omunyali Owa Bioosi?”

⁹Isaya amukobosia ali, “Esino nisio silaba simanyisio sie khukhwekesia sili alaliinda lisuubisia liewe: Ewe wenya sisiiniini siche ebweeni bikele ekhumi namwe sikobole enyuma bikele ekhumi?”

¹⁰Hesekia akobosia ali, “Lili liliangu khukhola sisiiniini siche ebweeni bikele ekhumi. Sikhole sikobole enyuma bikele ekhumi.”

¹¹Isaya asaba Wele Omunyali Owa Bioosi mala Wele Omunyali Owa Bioosi akhola sisiiniini siakobola enyuma bikele ekhumi khu ngasi niyo Ahasi aakhola.

¹²Mu siise esio ne sisiene, Merodaki-baladani omwami owa Babiloni aulila ali omwami Hesekia abeele omulwale. Nio Merotaki-Baladani okhwa Baladani amurumira ebarwa ne siianwa.

¹³Hesekia akanila barumwa mala abekesia buiinda bwewe: Enju, efwesa, esahabu ne bibiindu biiunya kumuuya kumulayi ne kamafura kaunya kumuuya kumulayi ne bulwaani. Se siabao sisiindu siosi siosi munju mwewe namwe abuundu osi osi mu bwami bwewe nisio akhabekesia tawe.

¹⁴Nio omung'oosi Isaya acha khu mwami Hesekia mala amureeba ali, “Babaandu bano bamile waena, lundi balomile bali siina?” Hesekia amukobosia ali, “Bamile mu sibala sie aleeyi. Bamile Babiloni.”

¹⁵Isaya areeba lundi ali, “Baboone siina munju yowo?” Hesekia akobosia ali, “Baboone buli sisiindu siili munju yase. Se siliio sisiindu mu libiikhilo liase nisio ekhabekesie tawe.”

¹⁶Nio Isaya aboolela Hesekia ali, “Ulila elomo eya Wele Omunyali Owa Bioosi:

¹⁷ Wele Omunyali Owa Bioosi aloma ali, ‘Lola biise bilikho biicha nibio buli sisiindu siili munju mwowo nende nisio bakukaao babiikha khukhwola khu ndaalo yino silibukulwa siyilwe Babiloni. Mbao silirama tawe.

¹⁸ Balala khu basoleeli bowo babeene nibo wasaala balibukulibwa. Balikholwa bachili khukhola mwichipi lio mwami owa Babiloni.’ ”

¹⁹Omwami Hesekia ebaasia ali lino liboola lili kumuleembe kucha khubao ne buliindi bulayi mu siise sie bulamu bwewe, nio akobosia Isaya ali, “Elomo niyo wama khumboolela, khukhwama khu Wele Omunyali Owa Bioosi eli endayi.”

²⁰Bikholwa bibiindi bioosi nibio omwami Hesekia akhola, bikholwa biewe bie bunyindaafu bioosi, lundi nga ombakha litiisi ne khuyaba kimiliinda kie khureera kameechi mu lukoba, biaandikwa mu sitabu sie chingano che babaami ba Yuda.

²¹Hesekia afwa mala omusoleeli wewe Manase amiia mu bweyaangu bwewe.