Read lubukusu 2 Bab. 21 Bible Online

2 Bab. 21 - lubukusu bible

2 Bab. 21

¹Manase aba ne bukhulu bwe kimiiko ekhumi na kibili nga ne arakikha khukhwamiia Yuda. Amiia ne ali mu Yerusalemu khulwe kimiiko kamakhumi karaano na kiraano. Maayi wewe aba Hefisiba.

² Akhola bumayaanu ebweeni wa Wele Omunyali Owa Bioosi. Akhola ke khusinyisia nga Wele Omunyali Owa Bioosi ne atimania chikholo nicho aba ne aoona mu sibala nga babaandu bewe Isiraeli ne baba ne bengisia.

³Manase ombakha abuundu aesuta lundi niio Hesekia raraawe aba ne atechula. Ombakha chialutare cha Baali mala akhola sifwaani sia Ashera, nga omwami Ahabu owa Isiraeli aba ne akhola. Lundi Manase asaaya ching'enieesi ne khuchikholela.

⁴ Ombakha chialutare munju eya Wele Omunyali Owa Bioosi, enju niyo Wele Omunyali Owa Bioosi aba aloma ali, “Mu Yerusalemu khasaayilwemo.”

⁵Lundi Manase ombakha chialutare khulwe ching'enieesi mumbia chibili che enju eya Wele Omunyali Owa Bioosi.

⁶Ne osia omusoleeli wewe nga siianwa sie khukhwosia. Akholanga buolelesi ne bufumu ne khureeba balakusi ne basaali. Akhola bumayaanu bukali khu Wele Omunyali Owa Bioosi mala amuambia lirima.

⁷ Asimikha sifwaani sia Ashera, nisio aakhola munju eya Wele Omunyali Owa Bioosi, abuundu niio Wele Omunyali Owa Bioosi aaba aboolela Daudi ne omusoleeli wewe Solomoni ali, “Munju muno, ne mu Yerusalemu nimwo endoboore khukhwama mu kholo choosi mu Isiraeli, khasaayilwemo mindali na mindali.

⁸Se ekhakhole babaandu ba Isiraeli bauyauye lundi mala barure mu maloba niko nalaka bapaapa babwe tawe. Kaaba bali baba barekerefu mu khukhola koosi niko nabalaka, lundi baloonda kamalaka niko omukholi wase Musa abaelesia.”

⁹Ne se baulila tawe. Manase abakhongelesia bakhola bumayaanu. Bakhola bumayaanu buboofu khukhila be chikholo nicho Wele Omunyali Owa Bioosi abunia nga Baisiraeli baba ne balikho becha.

¹⁰Nio Wele Omunyali Owa Bioosi alomaloma khubirira mu bakholi bewe bang'oosi ali,

¹¹“omwami Manase akholile bie khusinya. Akholile bibiindu bimayaanu lukali khukhila bioosi nibio Baamori ba baaba mu Kanaani bakhola ebweeni wewe. Lundi araangirire babaandu ba Yuda mu khusikamila bifwaani.

¹²Sikila kano, ese Wele Omunyali Owa Bioosi, Wele owa Isiraeli ndareera kamabi khu Yerusalemu ne khu Yuda nio buli mulala oliulila khu menako alirangararwa.

¹³Ndaelesia Yerusalemu kumunaanio nga nikwo naelesia Samaria lundi nga nakhola Ahabu ne lisaaye liewe. Ndarusiliayo elala babaandu ba Yerusalemu.

¹⁴Ndanjukha babaandu babarama, ne ndibalekhuulila basiku babwe babaule. Baliikela embaambe eye basiku babwe boosi. Lundi basiku babwe balibayaaya kimiaandu kiabwe.

¹⁵Ndikhola ndio sikila bakholeele ese bumayaanu. Bambaambiisie lirima khukhwama siise nisio bakuuka babwe barurirakho mu Misiri khukhwola endaalo yino.”

¹⁶Manase eera babaandu bakali bakhaba ne bubi tawe. Kimikhula kie sifuki kiechula khungila che mu Yerusalemu. Akhola kano khutasa mu khurangirira babaandu ba Yuda bakhola bumayaanu ebweeni wa Wele Omunyali Owa Bioosi.

¹⁷Nono bikholwa bibiindi bia Manase nende koosi niko akhola ne bumayaanu nibwo akhola biaandikwa mu sitabu sie chingano che babaami ba Yuda.

¹⁸Manase afwa mala asiikhwa mu siliindwa sia Usa. Nio omusoleeli wewe Amoni amiia mu bweyaangu bwewe.

¹⁹Amoni aba ne bukhulu bwe kimiiko kamakhumi kabili na kibili nga ne arakikha khukhwamiia Yuda. Amiia ne ali mu Yerusalemu khulwe kimiiko kibili. Maayi wewe aba Meshulemeti omukhaana owa Harusi khukhwama mu lukoba lwa Yotiba.

²⁰Amoni akhola bumayaanu ebweeni wa Wele Omunyali Owa Bioosi nga raraawe Manase ne aakhola.

²¹Akhola koosi niko raraawe akhola mala akholela bifwaani nibio raraawe akholela. Lundi asaaya bifwaani ebio.

²²Aloba Wele Omunyali Owa Bioosi, Wele owe bakuuka bewe, mala khuloonda chingila cha Wele Omunyali Owa Bioosi tawe.

²³Banamae ba Amoni bamukholela ekwangwaani mala bamwirira mwichipi liewe.

²⁴Babaandu ba Yuda bera babaandu babeera Amoni mala bamiisia Yosia omusoleeli wewe aba omwami mu bweyaangu bwa raraawe.

²⁵Nono bikholwa bibiindi bioosi nibio Amoni akhola biaandikwa mu sitabu sie chingano che babaami ba Yuda.

²⁶Amoni asiikhwa mu siluundu sia Usia mala omusoleeli wewe Yosia amiisibwa aba omwami mu bweyaangu bwewe.