Read lubukusu 2 Bab. 22 Bible Online

2 Bab. 22 - lubukusu bible

2 Bab. 22

¹ Yosia aba ne bukhulu bwe kimiiko munaane nga ne arakikha khukhwamiia. Amiia ne ali mu Yerusalemu khulwe kimiiko kamakhumi kataru na mulala. Maayi wewe aba Yedida, omukhaana owa Adaia, khukhwama mu lukoba lwa Bosikati.

²Yosia akhola kasiimisia Wele Omunyali Owa Bioosi. Aloonda limenya lia kukaawe Daudi ne se alekhakho tawe.

³Mu mwiiko kukhola ekhumi na munaane kwe bubwami bwa Yosia, omwami Yosia aruma Shafani omuandiki ache munju eya Wele Omunyali Owa Bioosi. Shafani aba okhwa Asalia lundi omwichukhulu owa Meshulamu.

⁴Amulaka ali, “Cha khu Musaayi Omukhulu Lukali Hilikia mala akhuboolele bukali bwe chirupia nicho bareera munju eya Wele Omunyali Owa Bioosi, nicho baliindi babuusia khukhwama khu baandu.

⁵Muboolele achielesie babemeelesi be Lukaangu.

⁶Ne babemeelesi bano bachielesie bakholi bali a lukaangu khu lung'oona. Achielesie babeechi be kimirongooro, babombakhi ne babeechi be kamabaale. Lundi chirupia echo chirumikhe mu khukula chimbao ne kamabaale karumikha mu khung'oona Lukaangu.

⁷ Babemeelesi be kimilimo bali babeyikinwa lukali nono mukhabareeba baboole nga ne barumikhira chirupia echo tawe.”

⁸Omusaayi Omukhulu Lukali Hilikia aboolela Shafani ali, “Nanyoolile sitabu sie Lilaka munju eya Wele Omunyali Owa Bioosi.” Hilikia aelesia Shafani sitabu esio mala Shafani asisoma.

⁹Nio acha khu mwami mala amuboolela ali, “Bakholi bowo babukuule chirupia choosi chibeele mu Lukaangu mala bachieleesie khu bemeelesi be kimilimo kie khung'oona Lukaangu.”

¹⁰Nio Shafani aboolela omwami ali, “Omusaayi Hilikia ambeleesie sitabu.” Ne Shafani asoma sitabu esio ebweeni wo mwami.

¹¹Nga omwami ne aulila kamakhuwa ke sitabu sie Lilaka, atabula chingubo chewe.

¹²Omwami arusia lilaka khu Musaayi Omukhulu Lukali Hilikia, ne Ahikamu okhwa Shafani ne Akibori okhwa Mikaya ne shafani omuandiki ne Asaia omuliindi wo mwami. Aloma ali,

¹³“Cha mundebeere ese Wele Omunyali Owa Bioosi ne khulwe babaandu, ne Yuda yoosi khuloondekhana ne kamakhuwa ke mu sitabu sinyooleekhe sino. Wele Omunyali Owa Bioosi akhuambiile efwe lirima likali sikila bakuuka befwe se bakhola niko sitabu sino siboola khuloondekhana ne nafwe tawe.”

¹⁴Nono Hilikia, Ahikamu, Akibori, Shafani ne Asaia bacha bareeba omung'oosi Hulida, owamenya lubeka lulala lwa Yerusalemu. (Omuseecha owa Hulida aba Shalumu, okhwa Tikiba. Shalumu lundi aba omwichukhulu owa Harihasi. Shalumu emeelelanga e kabati eye chingubo mu Lukaangu.) Babaandu baraano abo bacha khu Hulida.

¹⁵Omung'oosi oyo ababoolela ali, “Wele Omunyali Owa Bioosi, Wele owa Isiraeli aloma ali, ‘Cha muboolele omundu omurumire enywe khwise muli,

¹⁶Wele Omunyali Owa Bioosi aloma ali, lola ndikho nja khureera kumunaanio abuundu ano ne khu bamenywa bao. Ndakhola koosi ke mu sitabu niko omwami owa Yuda asomile.

¹⁷Kalaba kario sikila babaandu bandekhile ese mala bosiele bawele babaandi bibiindu biiunya kumuuya kumulayi. Ne bambaambiisie lirima khulwe bikholwa biabwe bioosi. Khwako, naambiile abuundu ano lirima likhawa tawe.

¹⁸Ne kakhali boolela omwami owa Yuda omurumire khureeba Wele Omunyali Owa Bioosi muli Wele Omunyali Owa Bioosi owa Isiraeli aloma ali: khuloondekhana ne kamakhuwa niko ouliile,

¹⁹kumwoyo kwowo kweboombiisie. Ne ewe weboombiisie ebweeni wa Wele Omunyali Owa Bioosi nga ouliile niko endomile khuloondekhana ne abuundu ano ne bamenywa bao. Weboombiisie nga ne ndomile ndi lukoba lwa Yerusalemu lulianjukhwa busa mala luliba silaamo. Kamakhuwa ako kakilile ewe watabula chingubo chowo mala walila ebweeni wase. Sikila kano, sesi nakhuuliile.

²⁰Khwako, lola, ndakhukhola ofwe mu muleembe. Ne se okhabone bumayaanu bwoosi nibwo ekhareere mu Yerusalemu tawe.’ ” Nio babaandu baraano abo bakobola khu mwami Yosia ne burume obwo.