Read lubukusu 2 Bab. 23 Bible Online

2 Bab. 23 - lubukusu bible

2 Bab. 23

¹Nio omwami Yosia arumania mala basaakhulu boosi ba Yuda ne Yerusalemu bacha niio aba.

²Omwami ne babaandu ba Yuda boosi ne bamenywa ba Yerusalemu boosi bacha munju eya Wele Omunyali Owa Bioosi. Akhaba basaayi ne bang'oosi alala ne babaandu boosi, bakhulu ne batiiti sitube bacha. Omwami asoma kamakhuwa koosi ke mu sitabu sie endakaano sisiaba ne sinyooleekhe munju eya Wele Omunyali Owa Bioosi babaandu ne barekereesie.

³Omwami eema siimbi ne njeko mala akhola endakaano ne Wele Omunyali Owa Bioosi khuloonda chingila cha Wele Omunyali Owa Bioosi ne khuliinda kamalaka kewe ne kumwoyo kwewe kwoosi ne bulamu bwewe, ne khukhola ke mu ndakaano. Ne babaandu boosi baambana ne Yosia khukhola endakaano.

⁴ Yosia alaka Omusaayi Omukhulu Lukali Hilikia ne basaayi bayeeti bewe, ne baliindi baali khu mulimo e silibwa sie Lukaangu khurusia mu Lukaangu lwa Wele Omunyali Owa Bioosi, bibiindu bioosi bibiarumikhanga mu khusaaya Baali, Ashera, ne ching'enieesi. Omwami osiela bibiindu ebio bioosi enje we lukoba mwitooma lia Kiduroni. Asuta likokhe liabio aliyila e Beteli.

⁵Arusiao basaayi nibo babaami ba Yuda barakho kamakhono. Barebwakho kamakhono khukhwosia bibiindu biiunya kumuuya kumulayi abuundu aesuta mungoba cha Yuda ne abuundu ali siimbi ne Yerusalemu. Abo babosielanga Baali, ne enyanga, kumwesi, sulwe ne ching'enieesi bibiindu biiunya kumuuya kumulayi, boosi arusiao.

⁶Arusia mu Lukaangu sifwaani sia Ashera. Ayila sifwaani esio mwitooma lie luluuchi lwa Kiduroni. Asiosia mala abukula likokhe liasio alisalanisia abuundu niio basiikhanga babaandu.

⁷Atechula chinju che balaaya be siseecha be mu lukaangu[17], chichaba munju eya Wele Omunyali Owa Bioosi. Abwenao niio bakhasi basonelanga chikutuusi chicharumikhanga mu khusikamila Ashera.

⁸Areera mu Yerusalemu basaayi be bifwaani boosi ba baaba mu ngoba cha Yuda, ne mu sibala sioosi. Onakaka abuundu aesuta oosi niio boseelanga bibiindu biiunya kumuuya kumulayi khukhwama Keba khukhwola Beerisheba. Akhaba lundi atechula abuundu aesuta a aaba mu silibwa sia Yoshua omuruki we lukoba. Silibwa esio siaba kumukhono kumukhasi kwe silibwa siboofu sie khukhwingila mu lukoba.

⁹Kakhaba kario basaayi be abuundu aesuta se bacha khu alutare eya Wele Omunyali Owa Bioosi e Yerusalemu tawe. Ne kakhali balia kumukaati kukhalimo limela tawe khukhwama khu basaayi basiaabwe.

¹⁰ Lundi omwami Yosia onakaka Tofeti, abuundu e khukhwisaaya bifwaani a aaba mwitooma lie basoleeli ba Hinomu. Akhola ario nio omundu yesi yesi akhakhola ario osia omusoleeli wewe namwe omukhaana wewe nga siianwa khu wele Moleki tawe.

¹¹Lundi Yosia arusia chifarasi nicho babaami ba Yuda baba ne bara alubeka khulwe enyanga mala osia kamakaari ke liie kakakholanga kimilimo kie khusaaya khuno. (Bino biaba biabiikhwa siimbi e silibwa ne bumenyo bwa Nasani Meleki omunamae omukhulu.)

¹² Akhweesa arusia chialutare chichaba mu lusiro lwe ekorofa eya Ahasi. Chialutare echo chakholwa ne babaami ba Yuda. Omwami Yosia atechula alala ne chialutare nicho omwami Manase akhola mu mbya chibili che enju eya Wele Omunyali Owa Bioosi, acharamo bitonyi bibili mala achimwaata mu litooma lia Kiduroni.

¹³ Yosia onakaka abuundu aesuta niio omwami Solomoni aba ne akhola ebukwe owa Yerusalemu, khulwe khusaaya. Ashitoreti wele owe Basidonia, Chemoshi wele owe Bamoabu ne Moleki wele owe Baamoni. Abuundu ao aba ebunafubo we sikulu sia Miseituni

¹⁴Omwami Yosia atechula chinjeko mu bitonyi. Aremakakamo wele Asherimu mala abuundu niio biabechanga echusiao kamakuumba ke babaandu.

¹⁵ Lundi, Yosia atechula alutare eye e Beteli, abuundu aesuta aarebwao ne Yeroboamu okhwa Nebati, owarangirira Isiraeli mu khukhola bumayaanu. Yosia akwiisia alutare eyo ne abuundu aesuta mala arakaka kamabaale kayo mu bitonyi mala lundi akachuunga kekela lipukhuulu. Akhaba lundi osia sifwaani sia Ashera.

¹⁶ Yosia alola mala abonayo biliindwa khu lukulu. Arumania barusia kamakuumba kamwo mala bakosiela khu alutare. Mungila yino onakaka alutare eyo khuloondekhana ne likhuwa lia Wele Omunyali Owa Bioosi nilio omung'oosi wewe ang'oola. Owang'oola bung'oosi buno,

¹⁷ Areeba ali, “Siliindwa esio sia naanu?” Babaandu ba Beteli bamukobosia bali, “Sili sio omung'oosi owecha khukhwama Yuda mala ang'oola bibiindu nibio ewe wama khukhola khu alutare.”

¹⁸Yosia aloma ali, “Lekha sibe. Kamakuumba kewe kakharusibwao tawe.” Nio bikuumba biewe bialekhwa alala nende bio omung'oosi owama Samaria.

¹⁹Yosia arusiao binamwima bie abuundu aesuta bibiaba mungoba cha Samaria nibio babaami ba Isiraeli baba ne bakhola mala baambia Wele Omunyali Owa Bioosi lirima. Akhola abuundu aesuta ao bulayi bwene nga ne akhola mu Beteli.

²⁰Erera basaayi boosi be abuundu aesuta khu alutare mala abosielakho kamakuumba ke babaandu. Nio akobola Yerusalemu.

²¹Omwami Yosia alaka babaandu boosi ali, “Khola e Pasaka khulwa Wele Omunyali Owa Bioosi, Wele wenywe nga ne kaandikwa mu sitabu sie endakaano sino.”

²²Khukhwama mu siise nisio babemeelesi bemeelelanga Isiraeli, Epasaka nga eyo erio yaba ekhakholwakho tawe. Akhaba mu ndaalo che babaami boosi ba Yuda ne Yerusalemu, Epasaka erio se yekholekhakho tawe.

²³Ne kakhali mu mwiiko kwe ekhumi na munaane kwe bubwami bwa Yosia e pasaka yakholwa mu Yerusalemu khulwa Wele Omunyali Owa Bioosi.

²⁴Khutasa khwako Yosia arusia balakusi, bafumu, bifwaani biilaangwa Terafimu ne bifwaani bibiindi khukhwama mu maloba ka Yerusalemu ne Yuda. Mu khukhola kano enya emekhe kamakhuwa ke lilaka kakaandikwa mu sitabu nisio omusaayi Hilikia anyoola munju eya Wele Omunyali Owa Bioosi.

²⁵Se abakhoo omwami ebweeni wa Yosia namwe enyuma wewe owakobolela Wele Omunyali Owa Bioosi ne kumwoyo kwewe kwoosi, ne kamebaasio kewe koosi ne kamaani kewe koosi, khuloondekhana nga lilaka lia Musa ne liboola tawe.

²⁶Kakhaba kario lirima likali nilio Wele Omunyali Owa Bioosi aba nalio liachiililila khuburukha sikila niko Manase akhola.

²⁷Wele Omunyali Owa Bioosi aloma ali, “Ndirusiao Yuda khukhwama mumoni chase nga ne nakhola Isiraeli. Ndamwaata lukoba lwa Yerusalemu nilwo narobora luno ne nju niyo naloma ndi balinjisaayilamo.”

²⁸Nono bikholwa bibiindi bioosi bia Yosia ne koosi niko akhola biaandikwa mu sitabu sie chingano che babaami ba Yuda.

²⁹Nga Yosia ne aba omwami, Farao Neko owa Misiri arangirira banamae bacha khukhwibwaakala omwami owa Ashuru aluuchi lwa Efurati. Yosia acha khukhiingilila Bamisiri e Mekido mala Neko amwirira ebweeneyo enyuma we khumubona.

³⁰Banamae bewe basutila kumubili kwewe mu likaari lie kamae khukhwama Mekido bamuyila Yerusalemu. Bamusiikha mu siliindwa siewe. Ne babaandu ba Yuda babukula omwana wewe omusoleeli Yoahasi bamukhola omwami mu bweyaangu bwa raraawe.

³¹Yoahasi arakikha khukhwamiia ne ali bukhulu bwe kimiiko kamakhumi kabili na kitaru. Amiia ne ali mu Yerusalemu khulwe kimieesi kitaru. Maayi wewe aba Hamutali, omukhaana owa Yeremia khukhwama mu lukoba lwa Libuna.

³²Akhola bumayaanu khu Wele Omunyali Owa Bioosi nga bakuuka bewe ne bakhola.

³³Bubwami bwewe bwakama nga Farao Neko owa Misiri ne amubukula nga omuboe amuyila Ribula, mu sibala sia Hamati nio akhamwiira mu Yerusalemu tawe. Nio Farao akhola Yuda yaruunga busuuru bitonyi emia bie efwesa ne sitonyi sie esahabu.

³⁴ Farao Neko amiisia Eliakimu okhwa Yosia aaba omwami owa Yuda mu bweyaangu bubwaba bwa Yosia, mala akaluukhasia lisina liewe liaba Yehoyakimu. Farao Neko abukula Yoahasi amuyila Misiri mala afwilayo.

³⁵Omwami Yehoyakimu arusianga efwesa ne esahabu. Lundi areebanga busuuru khukhwama khu baandu khuloondekhana ne lilaka lia Farao. Abukulanga busuuru khuloondekhana ne sikelo sie buiinda bwabwe.

³⁶ Yehoyakimu aba ne bukhulu bwe kimiiko kamakhumi kabili na kiraano nga ne arakikha khukhwamiia Yuda. Amiia khulwe kimiiko ekhumi na ndala ne ali mu Yerusalemu. Maayi wewe aba Sebida, omukhaana owa Petaya khukhwama mu lukoba lwa Ruma.

³⁷Yehoyakimu akhola bumayaanu khu Wele Omunyali Owa Bioosi bulayi bwene nga bakuukawe ne bakhola.