Read lubukusu 2 Bab. 24 Bible Online

2 Bab. 24 - lubukusu bible

2 Bab. 24

¹ Mu ndaalo che bubwami bwa Yehoyakimu, omwami Nebukadinesa owa Babiloni abotookhelesia Yuda. Ne khulwe kimiiko kitaru Yehoyakimu akholela Nebukadinesa. Enyuma we kimiiko kitaru akaluukhana aaba omureengu amuloba.

²Wele Omunyali Owa Bioosi aruma bipupu bie Bakalidayo, Bashamu, Bamoabu, ne Baamoni bonakake Yuda khuloondekhana ne elomo eya Wele Omunyali Owa Bioosi niyo alomaloma khubirira khu bakholi bewe bang'oosi.

³Ng'ali kano kakholekha khu Yuda khuloondekhana ne lilaka lia Wele Omunyali Owa Bioosi lie khubarusia mumoni chewe sikila bumayaanu bwa Manase bwoosi nibwo akhola.

⁴Lundi kekholekha sikila sifuki sie babaandu bakhali ne kamabi tawe nisio Manase achukha. Manase achukha sifuki sikali mu Yerusalemu sie babaandu bakhaba ne kamabi tawe. Wele Omunyali Owa Bioosi se anyala khubeela Yuda tawe, khuloondekhana nende niko Manase akhola.

⁵Nono bikholwa bibiindi bioosi bia Yehoyakimu ne koosi niko akhola biaandikwa mu sitabu sie chingano che babaami ba Yuda.

⁶Yehoyakimu afwa mala omusoleeli wewe Yehoyakini amiia mu bweyaangu bwewe.

⁷Ne Farao owa Misiri se echakho mu Yuda lundi tawe, sikila omwami owe Bababiloni aba abukuule bibiaba bioosi bia Farao owa Misiri khukhwama khu luuchi lwa Efurati khukhwola ebunaswa khu lwakha lwa Misiri.

⁸Yehoyakini aba ne bukhulu bwe kimiiko ekhumi na munaane nga ne arakikha khukhwamiia Yuda. Amiia ne ali mu Yerusalemu khulwe kimieesi kitaru. Maayi wewe aba Nehushita, omukhaana owa Elinatani khukhwama Yerusalemu.

⁹Akhola bumayaanu ebweeni wa Wele Omunyali Owa Bioosi nga raraawe ne akhola.

¹⁰Mu siise sie bubwami bwewe, banamae ba Nebukadinesa omwami owa Babiloni, becha khukhupana ne lukoba lwa Yerusalemu mala balubotookhelesia.

¹¹Banamae bewe ne basilubotookhelesia, Nebukadinesa omwene echa Yerusalemu.

¹² Ne omwami Yehoyakini omwene alala ne maawe, basoleeli bewe, banamae bewe, ne banamae be lichipi beaana babeene khu mwami owa Babiloni. Nebukadinesa aamba Yehoyakini nga omuboe mu mwiiko kukhola munaane kwe bubwami bwa Nebukadinesa.

¹³Nebukadinesa asuta bibiindu bie mu libiikhilo bioosi bie munju eya Wele Omunyali Owa Bioosi nende bie mu libiikhilo lie mwichipi. Atonya bibiindu bie esahabu bioosi bie munju eya Wele Omunyali Owa Bioosi nibio omwami Solomoni aba ne akhola. Kano koosi kekholekha nga Wele Omunyali Owa Bioosi ne aloma.

¹⁴Nebukadinesa abukula babaandu be mu Yerusalemu boosi, babaandu be nju eye bubwami boosi ne babaandu be kamaani boosi nga baboe. Boosi alala baba babaandu chielefu ekhumi baboe. Lundi arusia mu sibala babaandu banabi alala ne baabasi, acha nabo alekha batambi bong'ene.

¹⁵ Nebukadinesa abukula Yehoyakini amuyila Babiloni nga omuboe, alala ne maawe, bakhasi bewe, banamae bewe ne babemeelesi ba Yuda.

¹⁶Lundi ayila Babiloni babaandu be kamaani boosi chielefu saba. Lundi abukula banabi ne baabasi e elefu ndala. Boosi baba babaandu be kamaani lundi baboolana mwiie.

¹⁷ Nebukadinesa amiisia Matania raraawe owa Yehoyakini omuro aba omwami mu bweyaangu bwa Yehoyakini mala akaluukhasia lisina liewe liaba Sedekia.

¹⁸ Sedekia aba ne bukhulu bwe kimiiko kamakhumi kabili na mulala nga amiisibwa aba omwami owa Yuda. Ne amiia ne ali Yerusalemu khulwe kimiiko ekhumi na mulala. Maayi wewe aba Hamutali omukhaana owa Yeremia khukhwama mu lukoba lwa Libuna.

¹⁹Omwami Sedekia akhola bumayaanu khu Wele Omunyali Owa Bioosi bulayi bwene nga omwami Yehoyakimu aaba ne akhola.

²⁰ Wele Omunyali Owa Bioosi aambila babaandu ba Yerusalemu ne Yuda lirima, nio abauyisia barura mumoni mwewe. Nono Sedekia akholela omwami owa Babiloni bureengu.