Read lubukusu 2 Bab. 25 Bible Online

2 Bab. 25 - lubukusu bible

2 Bab. 25

¹ Nio Nebukadinesa echa ne banamae bewe boosi mala ebwaakala Yerusalemu khu ndaalo eye likhumi eye kumwesi kwe likhumi kwe kumwiiko kukhola tisa kwe mu bwami bwa Sedekia. Bababiloni babotookhelesia lukoba bombakha lisiisi lie khubotookhelesia.

²Nio lukoba lwabotookhelesibwa khukhwola mu mwiiko kukhola ekhumi na mulala kwa Sedekia.

³Oli khu ndaalo eya tisa eye kumwesi kwe khane kwe kumwiiko kukhola ekhumi na mulala okwo, enjala yaba endafu lukali mala babaandu khuba ne siakhulia tawe.

⁴ Baatula lisiisi lie lukoba akhaba Bakalidayo ne baba ne babotookhelesie lukoba. Omwami ne banamae boosi belukha musilo. Belukhila niio baatula, mala babirira mu siluundu sio mwami mala balola mu litooma lia Yoritani.

⁵Ne kakhali banamae Bakalidayo batimania omwami Sedekia, mala bamuambila mu sibala sie keewa sia Yeriko. Banamae bewe boosi bamwaanjukha.

⁶Sedekia abukulwa ayilwa khu mwami Nebukadinesa owaba ne ali mu lukoba lwa Riba mala ebweeneyo Nebukadinesa amukhalakila.

⁷ Babaana ba Sedekia beerwa, Sedekia ne aloleleele. Nio Nebukadinesa atomola chimoni cha Sedekia achirusiamo, amuboa kiminyololo, mala amubukula amuyila e Babiloni.

⁸Oli khu ndaalo eya saba eye kumwesi kwa kharaano kwe kumwiiko kwe ekhumi na tisa kwe khukhwamiia khwo mwami Nebukadinesa mu Babiloni, Nebusaratani omwimeelesi owe baliindi bo mwami acha mu Yerusalemu.

⁹ Osia Lukaangu, lichipi ne chinju choosi mu Yerusalemu. Osia buli enju emboofu.

¹⁰Ne banamae Bakalidayo ba baaba ne Nebusaratani batechula lisiisi liliabotookhelela lukoba lwa Yerusalemu.

¹¹Nono Nebusaratani aamba bakholi basicha, babaandu babarama mu lukoba boosi alala ne nabo babelukhila khu mwami owa Babiloni ne babaandu boosi be sibala abayila mu mbaambe e Babiloni.

¹²Ne kakhali Nebusaratani alekha balala khu baandu bataambi lukali mu Yuda khuba baremuli be kamaruuti ne khulima.

¹³ Bababiloni batonya chinjeko che kimikasa ne biteetwe bie kimikasa bibiaba munju eya Wele Omunyali Owa Bioosi mala babiyila e Babiloni.

¹⁴ Babukula akhaba chinyuungu, bitaulilo kamakasi ke bibuumba bie khukhwosielakho bibiindu biiunya kumuya kumulayi alala ne bibiindi bioosi bie kumukasa bibiarumikhanga khu mulimo mu Lukaangu.

¹⁵Babukula ne bifuria ne chipwakuli. Babukula buli sisiindu sie esahabu nende sie efwesa.

¹⁶Bibiindu bie kumukasa nibio omwami Solomoni akhola khulwe Lukaangu, chinjeko chibili, kamatangi ne biteetwe biaba bisiro bukali lukali.

¹⁷Buli enjeko yaba buleeyi bwe bikele likhumi lilala na munaane ne buniina bikele bitaru. Chinjeko echo chaba chabotookhelesibwa ne lutiimba lwe kamakomanga. Bioosi bino biaba bie kumukasa.

¹⁸Khutasakho, Nebusaratani komanda owe banamae baliindi abukula Omusaayi Omukhulu Lukali Seraya, Sefania omusaayi oloondela omukhulu ne babaandi bataru, baliindi be abuulilo nga baboe.

¹⁹Mu lukoba abukulamo omunamae omukhulu owemeelela liie, bakeleki baraano bo mwami ba baaba ne basiili mu lukoba, ne omuandiki owaba komanda owemeelelanga babaandu mu liie. Lundi Nebusaratani abukula babaandu kamakhumi sita khukhwama mu lukoba lwa Yuda.

²⁰Ababukula mala abayila khu Nebukadinesa omwami owa Babiloni mu lukoba lwa Ribula.

²¹Nebukadinesa abapa abeerera e Ribula mu maloba ka Hamati. Nio babaandu ba Yuda bayilwa mu mbaame enje we sibala siabwe.

²² Omwami Nebukadinesa owe Babiloni arobora mala amiisia Kedalia, okhwa Ahikamu lundi omwichukhulu owa Shafani aaba omwimeelesi owe babaandu babarama mu Yuda.

²³Banamae bakhulu boosi be kamae be lukoongo baulila bali omwami wabwe aroboore Kedalia khuba omuruki. Nga baulila ako, boosi becha ne banamae babwe e Misipa. Banamae bakhulu abo baba Ishimaeli okhwa Netania, Yoanani okhwa Karea, Seraya okhwa Tanihumeti, khukhwama mu lukoba lwa Netofa, ne Yasania khukhwama Maaka.

²⁴Kedalia abechubila ne banamae babwe ne aloma ali, “Mukharia sikila babemeelesi Bakalidayo tawe. Menya mu sibala sino, mala mukholele omwami owa Babiloni. Ne buli sisiindu sibe silayi khwinywe.”

²⁵Ne kakhali mu mwesi kukhola saba, Ishimaeli, okhwa Netania lundi omwichukhulu owa Elishama wenju eye bubwami echa ne babaandu ekhumi ebwaakala Kedalia, mala amwiira. Lundi eera Baisiraeli ne Bakalidayo ba baaba e Misipa.

²⁶ Nio Baisiraeli boosi, bakhulu ne batiiti sitube, ne babemeelesi be kamae barekukha belukhila e Misiri sikila baba bariire Bakalidayo.

²⁷Mu mwiiko kukhola kamakhumi kataru na saba kwo mwami Yehoyakini owa Yuda khuba mu mbaambe, Ebilimerodaki arakikha khukhwamiia Babiloni. Ako kekholekha khu ndaalo ekhola kamakhumi kabili na saba eye kumwesi kwe khumi na kibili. Nga arakikha khukhwamiia Ebilimerodaki arusia Yehoyakini khukhwama mu mbaame.

²⁸Nio Ebilimerodaki alomaloma ne Yehoyakini bulayi. Lundi Ebilimerodaki aelesia Yehoyakini endebe eye lukoosi khukhila chindebe che babaami ba baaba ne naye e Babiloni.

²⁹Nio Yehoyakini afuula chingubo chewe che mu siboe, mala mu bulamu bwewe bubwarama bwoosi alichanga khu sialwa sio mwami.

³⁰Buli endaalo, khulwe bulamu bwewe bubwarama bwoosi aelesibwanga chirupia che khurumikhira.