Read lubukusu 2 Bab. 3 Bible Online

2 Bab. 3 - lubukusu bible

2 Bab. 3

¹Mu mwiiko kwe likhumi na munaane kwe bubwami bwo mwami Yehoshafati owa Yuda, Yoramu okhwa Ahabu aaba omwami owa Isiraeli. Amiia ne ali Samaria khulwe kimiiko ekhumi na kibili.

²Yoramu akhola bumayaanu ebweeni wa Wele Omunyali Owa Bioosi. Kakhaba kario, se aaba nga raraawe ne maawe tawe, sikila arusiao sifwaani sia Baali nisio raraawe aba ne akhola.

³Ne kakhaba kario, achiililila khukhola bumayaanu nga Yeroboamu okhwa Nebati owarangirira Isiraeli khukhola bumayaanu. Yoramu se aakama khukhola bumayaanu buno tawe.

⁴Nono Mesha omwami owa Moabu aba abaya kamakheese. Buli kumwiiko aruunganga busuuru khu mwami owa Isiraeli kamameeme chielefu emia ndala ne bufuumbo bwe kamakheese chielefu emia ndala.

⁵Ne kakhali nga omwami Ahabu afwa, Mesha akaluukhana khu mwami owa Isiraeli.

⁶Omwami Yoramu arura khukhwama mu Samaria siise esio mala acha abuusia banamae ba Isiraeli boosi.

⁷Arumania likhuwa khu mwami Yehoshafati owa Yuda ali, “Omwami owa Moabu angalukhaanekho. Onyala wacha nase khwapana ne Moabu?” Omwami Yehoshafati akobosia ali, “Ee, endacha ne nawe. Ese ndi nga ewe. Banamae base bali nga babowo ne chifarasi chase chili nga chichowo.”

⁸Yehoshafati areeba ali, “Khulamila lubeka siina nio khwibwaakale?” Yoramu akobosia ali, “Khulabirira mu sichiimi sia, Edomu.”

⁹Nio omwami owa Isiraeli acha ne omwami owa Yuda ne omwami owa Edomu. Enyuma we likeenda lie khubotookhelela chindaalo saba, kameechi kabwe kawa ne se karamakho khulwe banamae namwe chisaang'i nicho baba nacho tawe.

¹⁰Omwami Yoramu owa Isiraeli aloma ali, “Aa! Wele Omunyali Owa Bioosi alangile babaami bataru bano khubara mu bunyali bwa Moabu.”

¹¹Omwami Yehoshafati areeba ali, “Se alio omung'oosi owa Wele Omunyali Owa Bioosi ano niye khunyala khwareeba Wele Omunyali Owa Bioosi khubirira khu niye tawe?” Nio mulala khu bakholi bo mwami owa Isiraeli akobosia ali, “Elisha okhwa Shafati ali ano. Aba omukholi owa Elicha.”

¹²Omwami Yehoshafati aloma ali, “Ali omung'oosi owa ng'ali.” Nio babaami bataru abo bacha khu Elisha.

¹³Elisha aboolela omwami owa Isiraeli ali, “Sendi nende nisio ekhukholela tawe. Cha khu bang'oosi ba raraao ne maao.” Yoramu omwami owa Isiraeli amukobosia ali, “Tawe! Wele Omunyali Owa Bioosi niye okhulaangile efwe babaami bataru nio akhure mu makhono ko omwami owa Moabu.”

¹⁴Ne Elisha akobosia ali, “Nga Wele Omunyali Owa Bioosi we kamae niye ese ekholelanga ne amenya, abanga se naria omwami Yehoshafati owa Yuda tawe, andi se nakhakhulolile namwe nakhubona ewe tawe.

¹⁵Nono nderere omukhupi we lituungu.” Nga omukhupi apa lituungu liewe, kamaani ka Wele Omunyali Owa Bioosi kecha mu Elisha.

¹⁶Elisha aloma ali, “Wele Omunyali Owa Bioosi aloma ali, ‘Ekhakhole litooma lino libemo chisebele che kameechi.

¹⁷Se mulabona efula yosi yosi namwe ekhuungu tawe. Ne kakhali litooma likhechulemo kameechi niko enywe ne chikhaafu chenywe ne chisaang'i chenywe mukhanywe.’ ”

¹⁸Lino lili likhuwa liliangu ebweeni wa Wele Omunyali Owa Bioosi. Lundi akhare Bamoabu mu bunyali bwenywe.

¹⁹Ne mukhaule buli lukoba lusire ne lulayi. Mulikwisia buli murongooro kumulayi mala muliikasia chinuma choosi che kameechi. Ne mulionaka buli mukuunda kumulayi khulwe khukhwichusiamo kamabaale.

²⁰Kumutikhinyi kukwaloondakho embi siise sie khuaana embosio, kameechi kecha khukhwama lubeka lwa Edomu keekha khukhwola nga sibala ne siechula kameechi.

²¹Bamoabu boosi baulila bali babaami bataru baba bechile khubebwaakala. Babaandu boosi ba baaba ne banyala khu banula bulwaani khukhwama khu mwana khukhwola khu musaakhulu, balaangwa barura mala balindila khu lwakha.

²²Ne kakhali nga Bamoabu ne benyokha makhelebeende kumutikhinyi kukwaloondakho, enyanga yaba elikho ekhosia khu meechi. Yaba yakakholile kabonekhe kamabesemu pe nga kamafuki.

²³Nio baloma bali, “Kano kamafuki niko. Ng'ali babaami bapane mala berane babene ne babene! Khuche khuyaaye kimiaandu kie bafu!”

²⁴Ne kakhali nga bola mu kambi ye Baisiraeli, Baisiraeli benyokha babebwaakala mala babatimania khukhwola nga belukha bawa. Baisiraeli baloondakho ne beera Bamoabu.

²⁵Batechula chingoba chabwe. Ne bamwaata kamabaale buli abuundu mu buli mukuunda kumulayi. Bemia buli enuma eye kameechi mala bakwisia buli murongooro kumulayi. Lukoba lwa Kiri-Hareseti lwong'ene lulwasikala. Kakhaba kario, banamae bafuruusia chikhoroto becha balwibwaakala mala balubukula.

²⁶Nga omwami owa Moabu amanya ali liie liabeele lirafu khu niye, abukula babaandu be chimbalu chimia saba mala bakhaka khukhwikula sibaanga lubeka luluundi lwo omwami owa Edomu[4], ne kakhali se anyala tawe.

²⁷Nio abukula omusoleeli wewe omubele owenyekha khuuba omwami mu bweyaangu bwewe enyuma wewe mala amuaana nga siianwa sie khukhwosia khwisiisi lie lukoba. Ne Baisiraeli nga ne babona bario, babiililwa lukali. Balekha lukoba olwo bakobola mu maloba kabwe.