Read lubukusu 2 Bab. 4 Bible Online

2 Bab. 4 - lubukusu bible

2 Bab. 4

¹Nono mukho omung'oosi mulala khu be sipupu sie bang'oosi acha khu Elisha mala amulilila ali, “Omukholi wowo, omuseecha wase afwiile. Ne omanyile oli aba ariia Wele Omunyali Owa Bioosi. Ne kakhali omundu niye walimusani aba ne likobi liewe ama khwicha khubukula basoleeli base babili babe nasioobi bewe.”

²Ne Elisha amureeba ali, “Khukholele siina? Mboolele, oli na siina engo?” Namulekhwa amukobosia ali, “Sendi ne sisiindu siosi siosi tawe ne ekhali esaachi eye kamafura.”

³Nio Elisha amuboolela ali, “Khoche khu bachirani mala osabe chisaachi chiikhalimo sisiindu tawe, chingali nga ne onyala.”

⁴“Nio ewe ne basoleeli bowo muche munju, mwiyikalilemo, mala murakikhe khuketa kamafura mu saachi. Buli eyichula mukire alubeka.”

⁵Nio omukhasi oyo ne basoleeli bewe bengila munju beyikalilamo. Basoleeli bewe bachiililila khureera kamafura ne niye achiililila khuchukha mu saachi.

⁶Nga ne baba ne bechusie chisaachi choosi namulekhwa oyo areeba basoleeli bewe esaachi ekiindi ne eliio. Mulala khu basoleeli bewe amukobosia ali, “Ekiindi se eliio tawe.” Mala kamafura ke chiseituni keema khuketululukha.

⁷Echa aboolela Elisha mala Elisha amuboolela ali, “Cha, okusie kamafura mala oruunge likobi liowo ne chirupia chilakhuramirakho ewe ne basoleeli bowo murumikhire.”

⁸Endaalo ndala Elisha acha Shunemu niio omukhasi omuiinda aba amenya. Omukhasi oyo amulaanga alie siakhulia. Khukhwamila abwenao buli lwosi nga ne achichanga abirangao, engilangamo mala alia siakhulia.

⁹Omukhasi oyo aboolela omuseecha wewe ali, “Ese endola ndi omundu owichangano buli lwosi yuno ali omundu omutakatifu owa Wele.

¹⁰Lekha khumwombakhile erumu khu korofa khuremo sitaanda, emesa, endebe ne etaa, nio buli lwosi ne akhukeniia anyala akonamo.”

¹¹Endaalo ndala Elisha echa Shunemu mala aniina acha mu siseenge khuola.

¹²Aboolela Kehasi, omukholi wewe ache alaange omukhasi Omushunemi oyo. Omukhasi oyo echa eema ebweeni wa Elisha.

¹³Elisha aboolela Kehasi ali, “Boolela omukhasi yuno oli khwaboone nga nilwo akhukhalabaniile; nono enya nafwe khumukholele siindu siina? Enya khumusabile siosi siosi khukhwama khu mwami namwe khu komanda owe kamae?” Omukhasi Mushunemi oyo akobosia ali, “Ese emenyile mu baandu base babeene.”

¹⁴Elisha areeba Kehasi ali, “Nono ese nyala namukholela siina?” Kehasi akobosia ali, “Bulayi, se ali ne omwana omusoleeli tawe, mala omuseecha wewe asaakhulue.”

¹⁵Elisha aloma ali, “Mulaange.” Echa mala eema muliango.

¹⁶ Elisha amuboolela ali, “Kumwiiko kukwiicha siise nga sino siri okhabe wamemile omwana omusoleeli mu makhono kowo.” Omukhasi oyo aloma ali, “Tawe! Omwami, ee mundu owa Wele. Nosiima okhambea tawe!”

¹⁷Ne kakhali nga Elisha aloma ne omukhasi oyo, mu siise sie khumiicha nga esio kumwiiko kukwaloondakho, aesia mala asaala omwana omusoleeli.

¹⁸Nga omwana ne achoa, endaalo ndala acha niio raraawe aba ne babaandu bakesa.

¹⁹Aboolela raraawe ali, “Kumurwe kwanjira, kumurwe kwanjira!” Raraawe aboolela omukholi ali, “Yila omwana yuno niio maawe ali.”

²⁰Ne nga omukholi amema omusoleeli oyo amuyilila maawe, maawe amulela busa khu bikele khukhwola mwiangilwe mala afwa.

²¹Nio aniina mungaaki mu rumu amura khu sitaanda sia Elisha mala ekalayo kumuliango arura.

²²Nio alanga omuseecha wewe mala amuboolela ali, “Ruma omukholi mulala ne epunda eche ano. Nenya enje khangu khu Elisha mala engobole.”

²³Omuseecha wewe amureeba ali, “Siina sikila oche endaalo yino? Se eli e Sabato namwe Naikara eye kumwesi kumuyia tawe.”[5]. Omukhasi amukobosia ali, “Bulaba bulayi.”

²⁴Nio arekekha epunda mala aboolela omukholi ali, “Timia epunda khangu ne okhacha kalaa ne ekhakhuboolele ndi khola orio tawe.”

²⁵Nono arura, arekukha, mala acha khu Elisha khu sikulu sia Karimeli. Elisha amubona ne echa mala aboolela omukholi wewe Kehasi ali, “Lola Omushunemu engelekha.

²⁶Tima khangu oche omwakaanile mala omureebe kaaba bali niye, ne omuseecha wewe ne omwana wewe ne bali bulayi.” Omukhasi oyo aboolela Kehasi ali buli siindu silayi.

²⁷Ne nga ola khu Elisha khu lukulu, asikama ebweeni wewe, mala atiila bikele biewe. Kehasi echa bali amusindikhe amurusieo. Ne kakhali Elisha amuboolela ali, “Mulekhe abe. Se onyala wabona oli ali ne bubeeleli bukali tawe? Wele Omunyali Owa Bioosi angisile ne se amboolelekho sisiindu tawe.”

²⁸Omukhasi oyo areeba Elisha ali, “Omwami nakhusaba omwana omusoleeli? Se nakhuboolela ndi okhambea tawe?”

²⁹Elisha aboolela Kehasi ali, “Yirekekha! Bukula esiimbo yase mala oche. Ne wakaanana omundu okhamukheesia tawe, ne omundu yesi yesi ne akhukheesia, okhafukiilila tawe. Yalisia esiimbo yase khu bweeni bwe kumubili kwo omwana.”

³⁰Nio omukhasi oyo aboolela Elisha ali, “Nga Wele Omunyali Owa Bioosi ne amenyile mindali, ne wesi nga ne omenyile, se ndakhulekha tawe.” Nio Elisha enyokha mala amuloondakho.

³¹Kehasi arangira ebweeni wabwe acha alisia esiimbo eya Elisha khu bweeni bwe kumubili kwo mwana oyo. Sisiindu siosi siosi se siauliilikhanakho namwe simanyisio sie bulamu siosi siosi tawe. Khwako akobolayo khucha khukhwakaanana Elisha mala aboola ali, “Omusoleeli oyo se enyokhe tawe.”

³²Nga Elisha ne engila mu rumu, abona omwana afwiile akonile khu sitaanda.

³³Nono engilamo mala ekalila Kehasi ne omukhasi oyo lulwiki enje. Mala asaaya khu Wele Omunyali Owa Bioosi.

³⁴ Acha akona khu musoleeli oyo ara kumunwa kwewe khu munwa kwo mwana, chimoni chiwe khu moni cho mwana, ne kamakhono khu makhono ko mwana. Nga ne akona ekololela khu mwana omufu, kumubili kwo mwana kwarakikha khuba ne luluuya.

³⁵Elisha enyokha lundi akeendakho mu rumu ola eyi akobola. Ne lundi akobola akona khu mubili kwo omwana omufu amwikololelakho. Omusoleeli oyo asimula khukhwola saba mala amoka.

³⁶Nio Elisha alanga Kehasi mala amuboolela alaange maawe owo omusoleeli oyo. Nga ne engila mukari, Elisha amuboolela ali, “Bukula omwana wowo.”

³⁷Omukhasi oyo akwa mu bikele bia Elisha enama bubweeni bwetiila asi mala abukula omwana wewe arekukha.

³⁸Enjala nga ne yabao mu sibala sioosi, Elisha lundi akobola Kilikali. Nga aba ne ekhaale ne sipupu sie bang'oosi, aboolela omukholi wewe ali, “Ra endekhelo emboofu khu mayika mala oteekhele sipupu sie bang'oosi sifuluko.”

³⁹Mulala khu bang'oosi abo acha khukhwaa chinyenyi. Anyoola lurabu lwe mundaa mala abuta bimuka bialwo bikali nga yaba ne anyala khusuta. Abireera atonya abimwaata mu ndekhelo eye sifuluko. Se amanya bili siina nisio tawe.

⁴⁰Sifuluko siomolwa babaandu balie. Nga baba ne balikho balia, balilila Elisha bali, “Silimo bufwisi!” Ne se banyala khulia tawe.

⁴¹Elisha ababoolela ali, “Nono mbelesie siakhulia.” Asichukha mu ndekhelo mala aloma ali, “Chukhila babaandu sifuluko balie.” Ne se siabamo sisiindu sibi tawe.

⁴²Omundu lundi ama khu Baali Shalisha, areerera Elisha kimikaati kamakhumi kabili, kie eshayiri, ne biakhulia bibiindi biibisi mu likunia. Ebio biaba biakhulia biyaaya. Elisha aboolela omukholi wewe ali, “Elesia sipupu sie bang'oosi silie bino.”

⁴³Ne kakhali omukholi amukobosia ali, “Wibaasia oli nyala naelesia babaandu emia ndala siakhulia nga sino?” Elisha akobosia ali, “Baelesie balie, sikila Wele Omunyali Owa Bioosi aloma ali, balalia mala birame.”

⁴⁴Nio omukholi abomolela biakhulia. Balia mala biarama khuloondekhana ne likhuwa lia Wele Omunyali Owa Bioosi.