Read lubukusu 2 Bab. 5 Bible Online

2 Bab. 5 - lubukusu bible

2 Bab. 5

¹ Naamani aba komanda owe kamae ko mwami owa Shamu. Aba omundu omukali ebweeni wo mwami. Omwami owa Shamu aba amusiima sikila khubirira khu Naamani Wele Omunyali Owa Bioosi aelesia Banamae ba Shamu bukhili. Aba omundu owe kamaani lundi omunyindaafu ne kakhali aba ne kamakele.

²Bashamu baba bacha khunuula Baisiraeli mala babukula omukhaana mu Isiraeli omutiiti nga omuambe aaba omukholi wo omukhasi owa Naamani.

³Endaalo ndala omukhaana oyo aboolela omukhaaye wewe ali “omwami wase akhaboone omung'oosi oli mu Samaria. Omung'oosi oyo akhamuonisie bulwaale bwewe buno.”

⁴Naamani acha khu mwami mala amuboolela niko omukhaana Omuisiraeli oyo amuboolela.

⁵Omwami owa Shamu aloma ali, “Cha luno luri, ne endarumania ebarwa khu mwami owa Isiraeli.” Nio Naamani abukula bitonyi ekhumi bie efwesa bitonyi chielefu sita bie sahabu ne chingubo ekhumi chindayi mala arekukha.

⁶Ayila ebarwa khu mwami owa Isiraeli eloma eli, “Nga ebarwa yino ne ekhwoolela, manya oli narumire omukholi wase Naamani khwiwe omuonie kamakele kewe.”

⁷Nga omwami owa Isiraeli ne asoma ebarwa, atabula chingubo chewe mala aloma ali, “Ese Wele [6] owiira ne endamusia? Siina sikila omwami owa Shamu ne andumira ese likhuwa mbonie omundu khukhwama khu bulwaale bwewe bwe kamakele? Alikho ayiima bulomani ne nase.”

⁸Ne kakhali nga omung'oosi Elisha ne aulila ali omwami owa Isiraeli aba atabuule chingubo chewe, arumanisilia omwami burume ali, “Siina sikila ne otabula chingubo chowo? Lekha Naamani eeche luno luri niio endi. Nio alamanya ali omung'oosi ali mu Isiraeli.”

⁹Nio Naamani ne chifarasi chewe ne likaari acha mala eema amuliango kwe enju eya Elisha.

¹⁰Elisha aruma burume khu Naamani ne aloma ali, “Cha wisiinge mu luuchi lwa Yoritani khukhwola saba mala olaonisibwa kamakele elala obe omumiliiu[7].”

¹¹Ne kakhali Naamani aambwa lirima mala arekukha ne aloma ali, “Nibaasiisie ndi aleecha niio ndi mala asabe khu Wele Omunyali Owa Bioosi, Wele wewe. Nibaasiisie ndi alabisia kumukhono kwewe abuundu e kamakele[8], mala ambonie.

¹²Chinjichi cha Abana ne Faripari, chiili mu Damasika se chili chindayi khukhila luluuchi lwosi lwosi mu Isiraeli ta ku? Se enyala abeele ne siingamo mala naona? Nio Naamani arekukha ne ali ne lirima likali.”

¹³Ne kakhali bakholi bewe bamuchakho mala bamuboolela bali, “Paapa, abanga omung'oosi akhuboolele khukhola sisiindu siboofu, andi se wakhakholile? Ne buandalafu siina obwo aaba ne aloma ali yisiinga mala oone kamakele?”

¹⁴Nio Naamani arekukha ekha esiikha mu luuchi lwa Yoritani khukhwola saba nga likhuwa lio omundu owa Wele ne lialoma. Nio siikhoba siewe siakobola siaba nga sio omwana omutoro.

¹⁵Nio Naamani ne babaandu bewe boosi bakobola khu Elisha. Acha eema ebweeni wa Elisha mala aloma ali, “Lola, luno namanyile endi se aliio Wele mu sibala sioosi tawe ne mukhali mu Isiraeli. Nono, fukiilila siianwa khukhwama khwise.”

¹⁶Ne kakhali Elisha amukobosia ali, “Ng'ali nga Wele Omunyali Owa Bioosi niye ekholelanga ne amenyile mindali, se enyala nafukiilila sisiindu siosi siosi tawe.” Naamani amwekoonjelela ne Elisha se afukiilila khubukula siianwa tawe.

¹⁷Nio Naamani aloma ali, “Waaba ne okhabukula siianwa tawe, ekhusaba liloba litiiti[9] nilio chinyumbu chase chibili chinyala chasuta. Khukhwamila luno khuchiililila se ekhaanekho siianwa siosi siosi sie khukhwosia namwe embosio khu wele yesi yesi ne akhali Wele Omunyali Owa Bioosi tawe.

¹⁸Wele Omunyali Owa Bioosi akhoya ambeela sisiindu silala: omwami wase ne acha khusaaya mu lukaangu lwa Rimoni mala ese ne ekhachichenge ne naye khukhwisaaya Rimoni.”

¹⁹Elisha amuboolela ali, “Khoche mu muleembe.” Ne kakhali nga Naamani ne acha enaakho atiiti,

²⁰Kehasi omukholi owa Elisha, omundu owa Wele ebaasia ali, “Lola omwami wase alekhile Naamani omushamu ne se afukiliile nisio Naamani areerire tawe. Nga Wele Omunyali Owa Bioosi ne amenyile mindali, ndatima muloondekho mala munyoolekho sisiindu.”

²¹Nio Kehasi aloonda khu Naamani. Nga Naamani ne abona omundu amuloondilekho enyuma alikho atima, ekha khukhwama mu likaari mala amureeba ali, “Karieena?”

²²Ne Kehasi aloma ali, “Kamalayi, omwami wase andumire ndome ndi, bang'oosi babili baele bakhanjichakho luno luri. Bamile mu sibala sie bikulu sia Efuraimu. Ekhusaba umbelesiekho bitonyi bie efwesa ne chingubo chibili che kumulukha.”

²³Naamani akobosia ali, “Nosiima bukula bitonyi bibili bie efwesa.” Amwekoonjelela, aboa efwesa mu mifuko kibili ne chingubo che kumuulukha chibili aelesia bakholi bewe mala abaruma barangire ebweeni wa Kehasi.

²⁴Nga ne ola a lukulu, Kehasi ababukula kimifuko kibili ekio mala akingisia munju. Akheesia bakholi ba Naamani bakoboleyo.

²⁵Kehasi akobola munju mala eema ebweeni wa Elisha, omwami wewe. Elisha amureeba ali, “Kehasi, wama waena?” Akobosia ali, “Abuundu tawe omwami.”

²⁶Ne Elisha amuboolela ali, “Ese se mbeleyo mu roho nga omundu oyo ne ekhile khukhwama khu likaari liewe khukhwakanila ewe ta ku? Esino se sili siise sie khufukiilila chirupia ne chingubo, kimikuunda kie kimiseituni nende kie kimisabibu tawe. Se sili siise sie khufukiilila kamakheese, chikhaafu, namwe bakholi be siikhasi nende be siseecha tawe.

²⁷Ne luno kamakele ka Naamani kalakhwichakho, ewe nende be lisaaye liowo mulaba nako mindali na mindali.” Nga Kehasi ne arekukha aba ne kamakele, siikhoba siewe siaba siwaanga chwe.