Read lubukusu 2 Bab. 6 Bible Online

2 Bab. 6 - lubukusu bible

2 Bab. 6

¹Endaalo ndala sipupu sie bang'oosi nisio Elisha aba omwimeelesi wasio siamwiloochela sili, “Abuundu niio khumenyile asi we buliindi bwowo ali atiiti lukali.

²Khulekhe khuche e Yoritani mala khureme kimirongooro khukwisie, nio khwombakhile abuundu niio khunyala khwamenya.” Elisha akobosia ali, “Khe muche.”

³Mulala khu nibo aloma ali, “Ekhusaba, lekha khuche ne nawe.” Akobosia ali, “Ndacha nanywe.”

⁴Nono acha ne nabo. Nga bola e Yoritani barakikha khurema kimirongooro.

⁵Ne kakhali Nga mulala khu nibo ne aba ne alikho arema kumurongooro, abwene ne abwene eaywa yakwa mu meechi. Alilila Elisha ali, “Aa! Omwami eaywa eyo ebeele esaba!”

⁶Elisha amureeba ali, “Ekwiile waena?” Omundu oyo amwekesia abuundu ao, mala Elisha afuna lusaala alumwaata mu meechi, mala akhola eaywa yakelakela khu meechi.

⁷Ne Elisha aloma ali, “Kibukule.” Omundu oyo enama mala akibukula.

⁸Nono omwami owa Shamu acha mwiie ne Isiraeli. Areeba banamae bewe mala arobora abuundu khukhwombakha ekambi.

⁹Nio Elisha arumira omwami owa Isiraeli likhuwa ne aloma ali, “Okhacha siimbi ne abuundu ao tawe, sikila Bashamu balikho bachao.”

¹⁰Nio omwami owa Isiraeli aloleelesia mala atiila abuundu ao ne se achao tawe. Elisha buli siise akanianga omwami nio omwami aona biise bikali.

¹¹Omwami owa Shamu anaanisibwa munganakani lukali khu lino. Alanga bakholi bewe mala abareeba ali, “Naanu khwifwe oli lubeka lwo omwami owa Isiraeli?”

¹²Mulala khu nibo amukobosia ali, “omwami, se aliio tawe. Omung'oosi Elisha aboolelanga omwami owa Isiraeli kamamoonyo niko oboolelanga mu lusiro lwowo.”

¹³Omwami aloma ali, “Yiima mumanye niio ali mala ese ndamuaamba.” Bamuboolela bali Elisha ali e Dotani.

¹⁴Nio aruma banamae bakali ebweneeyo ne chifarasi ne kamakaari ke liie. Bola e lukoba asilo mala balubotookhelesia.

¹⁵Nga omukholi owa Elisha enyokha arura anje kumutikhinyi, abona banamae ne chifarasi ne kamakaari ke liie babotookhelesie lukoba. Akobola munju khu Elisha mala amureeba ali, “omwami! Khwaela! Khulakhola khuriena?”

¹⁶Elisha amukobosia ali, “Okharia tawe. Efwe khuli ne banamae bakali lubeka lwefwe khukhila bababwe.”

¹⁷Nio Elisha asaba ne aloma ali, “Ee Wele Omunyali Owa Bioosi ekhusaba, mwikule chimoni chewe abone!” Wele Omunyali Owa Bioosi akobosia lisaba lia Elisha mala omukholi owa Elisha alola abona lukulu lwechuule chifarasi ne kamakaari ke liie ke kumulilo kabotookhelesie Elisha.

¹⁸Nga Bashamu ne bebwaakala Elisha, Elisha asaba Wele Omunyali Owa Bioosi ne aloma ali, “Ekhusaba obofusie babaandu bano.” Wele Omunyali Owa Bioosi akobosia lisaba liewe mala ababofusia.

¹⁹Nono Elisha ababoolela ali, “Eyino se eli engila tawe ne oluno se luli lukoba nilwo mulayiimanga tawe. Khe munondekho muyile khu mundu niye mulayiimanga.” Mala abaraangirira abayila e Samaria.

²⁰Nga ne bengila mu lukoba lwe Samaria busa bari, Elisha asaba khu Wele Omunyali Owa Bioosi ali, “Wele Omunyali Owa Bioosi bekule chimoni chabwe mala babone.” Wele Omunyali Owa Bioosi abekula chimoni lundi mala babona. Besiindukha khubona bali baba mu Samaria mukari.

²¹Nga omwami owa Isiraeli ne abona Bashamu, areeba Elisha ali, “Paapa mbeere?”

²²Elisha akobosia ali, “Okhabeera tawe. Se onyala weera akhaba abo nibo aambile embaambe khulwe khurumikhira embalu ne buyiingo tawe. Baelesie kumukaati ne kameechi balie mala banywe bakobole khu mwami wabwe.”

²³Nio omwami owa Isiraeli abarekekhera naikara emboofu. Nga bamala khulia ne khunywa ababoolela bache mala bakobole khu mwami wabwe. Khukhwamila ao, Bashamu se bakobola lundi khunuula mu sibala sia Isiraeli tawe.

²⁴Enyuma we siise, omwami Beni-hadadi owa Shamu emeelela banamae bewe boosi mala baniina Samaria.

²⁵Ne Enjala yabao engali mu lukoba lwa Samaria nga baba ne baluboto kheleesie. Nio kumurwe kwe epunda kwakulwa bitonyi kamakhumi munaane bie efwesa ne chikuramu chimia chibili che kamasiliokokho ke kamauusi[10] kakulikha bitonyi biraano bie efwesa.

²⁶Nono, omwami owa Isiraeli aba alikho abira khu lisiisi lie lukoba. Abona omukhasi alikho alila ali, “Njeete omwami.”

²⁷Omwami amukobosia ali, “Wele Omunyali Owa Bioosi aaba ne akhakhuyeeta tawe, ese ndakhuyeeta ndiena? Ese sendi ne ngano yosi yosi namwe endali tawe.

²⁸Butinyu bwowo buli siina?” Omukhasi oyo amukobosia ali, “Endaalo ndala omukhasi yuno amboolela ali, khulie omwana wase omusoleeli, ne kumuchuli khulie wewe.

²⁹ Nio khwatekha owase khwalia. Oli bwasia namuboolela ndi khulie wewe ne luno amukisile!”

³⁰Nga omwami ne aulila lino atabula chingubo chewe. Nono aba alikho abira khu lisiisi ne efwarire likunia mukari.

³¹Echuba ne aloma ali, “Wele akhoya ambelesie kumunaanio naaba ne ekharusia khu Elisha kumurwe endaalo yino tawe.”

³²Elisha aba ekhale munju mwewe ne basaakhulu. Nono omwami aba arumire omundu khu Elisha. Ne kakhali omurumwa[11] oyo ne akhola tawe, Elisha aboolela basaakhulu ali, “Mwaboone nga omwiiri oyo arumire omundu khukhunjira? Lola, nga omurumwa ne echa, yikalao kumuliango mala mukhamulekhuula engila munju tawe. Omwami wewe omwene alaba amuloondilekho busa siimbi.”

³³Oli asiilomaloma ne nabo, omwami amuulukhakho ne aloma ali, “Butinyu buno bwama khu Wele Omunyali Owa Bioosi! Siina sikila ese mulindiilile lundi akhole sisiindu sisiindi?”