Read lubukusu 2 Bab. 7 Bible Online

2 Bab. 7 - lubukusu bible

2 Bab. 7

¹Ne kakhali Elisha amukobosia ali, “Rekeeresia nilio Wele Omunyali Owa Bioosi alikho aloma. Muchuli siise nga sino, Engaanu chikiilo chitaru namwe eshayiri chikiilo sita bikhakulibwe mu Samaria khulwe sitonyi silala sie efwesa.”

²Omwimeelesi omukhulu owo mwami aboolela Elisha ali, “Liliene elio se linyalikhana tawe, akhaba Wele Omunyali Owa Bioosi omwene ne aruma efula yakwa ao ne nao!” Elisha amukobosia ali, “Ewe okhalibone ne liekholekha ne se okhaliekho siakhulia siosi siosi tawe.”

³Babaandu bane babalwalanga kamakele baba enje we silibwa sia Samaria. Bereebanga babene ne babene bali, “Siina sikila khumenye ano khulindiilila khukhwola nga ne khufwa?

⁴Ne khuloma khuli khuche mu lukoba, enjala elimo ne khunyala khwafwa. Ne khwikhala ano, lundi khulafwa. Nono lekha khuche mu kambi ye Bashamu. Ne bakhulekha aba khulamenya, ne bakhwira aba khulafwa.”

⁵Nio oli bunanubunanu barekukha bacha mu kambi ye Bashamu. Ne kakhali nga bolamo, omundu se abamo tawe.

⁶Wele Omunyali Owa Bioosi aba akholile banamae be Bashamu baulile kamakaari ke liie ne katima, ne chifarasi ne chipukuta Mala Bashamu bebaasia bali “Lola Isiraeli baba bauliilisiana khu muruungo ne babaami be Bahiti ne Bamisiri beche bakhwibwaakale efwe.”

⁷Nio ekolooba ao Bashamu belukha, balekha kamaeema kabwe, chifarasi, chipunda ne khukhwanjukha ekambi yabwe nio baonie bulamu bwabwe.

⁸Nga be kamakele bane abo bola enje we kambi bengila mu liiema balia ne khunywa bibiabaamo. Basuta efwesa esahabu ne chingubo, mala batima bacha babikisa. Nono bakobola mala bengila mu liiema liliindi, lundi basutamo bibiindu mala bacha babikisa.

⁹Nio babene baboolana bali, “Se khulikho khukhola bulayi tawe. Endaalo yino eli endaalo eye kamakhuwa kamalayi. Khwasila busa mala khwaliinda khukhwola mutikhinyi, khulanyoola kumunaanio. Nono yiicha khuche khuboolele be enju eyo omwami.”

¹⁰Nio bacha mala balaanga baliindi be silibwa sie lukoba. Bababoolela bali, “Khuchile mu kambi ye Bashamu ne lola se khubonekho omundu namwe khwamuulila tawe. Chifarasi ne chipunda biong'ene bibeele ne biboilwe ne kamaeema kabeele kalekhilwe.”

¹¹Nio baliindi be silibwa balaanga be enju eyo omwami baulila.

¹²Nio omwami enyokha mu silo mala aboolela bakholi bewe ali, “Endamuboolela niko Bashamu bakhurekekhele efwe! Bamanyile bali efwe khuli ne enjala. Nono barurire mu kambi yabwe bachile khukhwikisa mu lukoongo. Bebaasia bali khularura mu lukoba nio bakhubukule ne khuli balamu mala bengile mu lukoba.”

¹³Ne mulala khu bakholi bewe aloma ali, “Lekha babaandu balalakho babukule chifarasi chiraano chisikale. Sikila khumanyile khuli basikale balaba busa nga bakali ba Isiraeli bamalile khufwa khale. Lekha khurumanie mala khumanye.”

¹⁴Barobora babaandu balala mala omwami abaruma ne kamakaari ke liie kabili ne khubalakiilisia bache balole sisiaba ne siikholekhe.

¹⁵Nio babaloondakha khukhwola Yoritani. Khumuyila khwoosi babonakho chingubo ne bibiindu nibio Bashamu baba ne bakwisiisie ne bali mu khangu. Nio barume bakobola mala baboolela omwami.

¹⁶Nio babaandu barura bacha bayaaya bibiindu bie mu kambi ye Bashamu. Nio nga Wele Omunyali Owa Bioosi ne aloma sikelo silala sie bufu namwe bikelo bibili bie eshayiri biakusibwa khulwe sitonyi silala sie efwesa.

¹⁷Nono omwami aba arobora omwimeelesi owaba omuliindi wewe omwene, abe omuliindi owe silibwa. Ne kakhali babaandu bamuswalakilila mu silibwa mala afwa, bulayi bwene nga Elisha ne ang'oola nga omwami aba ne amwichilekho.

¹⁸Elisha aba aboolele omwami ali, “Bikelo bibili bie e shayiri bikhakulibwe khulwe efwesa ndala ne sikelo silala sie biakhulia sikhakulibwe khulwe efwesa ndala kumuchuli siise nga sino siri a silibwa sia Samaria.”

¹⁹Omwimeelesi aba akobosia Elisha ali, “Liliene elio se linyala liakholekha tawe, akhaba Wele Omunyali Owa Bioosi omwene ne aruma efula khukhwama khwikulu yakwa ao ne nao.” Ne Elisha amukobosia ali, “Okhalibone ne likholekha ne kakhali ewe se okhabiliekho tawe.”

²⁰Nono kamwikholekhakho busa kario, aswalakililwa ne babaandu asilibwa sie lukoba mala afwa.