Read lubukusu 2 Bab. 8 Bible Online

2 Bab. 8 - lubukusu bible

2 Bab. 8

¹ Elisha aba aboolela omukhasi niye aba ne alamusie omwana wewe omusoleeli ali, “Yinyokha orekukhe nende be enju yowo mala ouyile osi osi niio onyala. Wele Omunyali Owa Bioosi alikho acha khuruma enjala mu sibala khu miiko saba.”

²Nono omukhasi oyo enyokha acha nga Elisha ne amuboolela. Acha nende be enju yewe mala auyila mu sibala sie Bafilisiti. Aaba omukwa mu sibala sie Bafilisiti khulwe kimiiko saba.

³Enyuma we kimiiko saba, omukhasi oyo akobola khukhwama mu maloba ke Bafilisiti. Ne acha khu mwami khureeba akobosebwe enju yewe ne kamaloba kewe.

⁴Nono omwami aba alikho alomaloma ne Kehasi omukholi owa Elisha. Omwami enya khumanya bibiindu bie kamaya nibio Elisha aba ne akholile.

⁵Nga Kehasi aba ne asiboolela omwami nga Elisha ne alamusia omundu, omukhasi niye Elisha alamusia omwana wewe eloochela omwami kakewe. Kehasi aboolela omwami ali, “omwami, omukhasi chana niye oyu niye Elisha alamusilia omusoleeli.”

⁶Ne nga omwami ne areeba omukhasi oyo, omukhasi amuboolela nga ne kaba. Nono omwami aroborera omukhasi oyo omwimeelesi ne aloma ali, “Mukoboselie bioosi bibiaba bibiewe, akhaba biakhulia bie mu mikuunda khukhwama endaalo niyo alekhela kamaloba khukhwola luno.”

⁷Nono Elisha acha Damasika. Beni-hadadi omwami owa Shamu aba alikho alwala. Nga omwami Beni-hadadi ne aboolelwa ali, “Elisha echile,”

⁸omwami aboolela Hasaeli ali, “Yilila Elisha siianwa mala omuboolele areebe Wele Omunyali Owa Bioosi naaba ne endaona namwe tawe.”

⁹Nio Hasaeli acha khukhwakaanana Elisha. Echusia chingamia kamakhumi kane bibiindu bilayi bioosi bie mu Damasika. Nga Hasaeli ne akaanana ne Elisha amuboolela ali, “Omwana wowo, omwami Beni-hadadi andumire khureebe ewe, kaaba bali alaona bulwaale bwewe namwe tawe.”

¹⁰Elisha amukobosia ali, “Cha omuboolele oli alaona. Ne kakhali Wele Omunyali Owa Bioosi anjekesie ali alafwa.”

¹¹Nono Elisha aloleelela Hasaeli mu moni lukali khukhwola nga Hasaeli ne aambwa chisoni. Mala Elisha alila.

¹²Hasaeli areeba Elisha ali, “omwami, siina sikila ne olila?” Elisha amukobosia ali, “Sikila namanyile bumayaanu nibwo ewe okhakholele babaandu ba Isiraeli. Okhosie chingoba chabwe chisire, okheere basoleeli babwe baele mala okhamwaate asi babaana babwe, ne khutabula chinda che bakhasi baesiisie.”

¹³ Ne Hasaeli amureeba ali, “Ese ndi busa nga embwa, nyala nakhola sisiindu siboofu siri ku?” Elisha amukobosia ali, “Wele Omunyali Owa Bioosi anjekesie ali ewe olikho ocha khuba omwami owa Shamu.”

¹⁴Nio Hasaeli alekha Elisha akobola khu Beni-hadadi. Beni-hadadi amureeba ali, “Elisha akhuboolele ali siina?” Hasaeli amukobosia ali, Amboleele ali ng'ali olaona.

¹⁵Ne kakhali endaalo eyaloondakho Hasaeli abukula liruungeti ara mu meechi mala afuunikha omwami mu moni khukhwola nga Beni-hadadi ne afwa. Ne Hasaeli akobola mu bweyaangu bwa Beni-hadadi nga omwami owa Shamu.

¹⁶Mu mwiiko kukhola kharaano kwe bubwami bwa Yoramu okhwa Ahabu, omwami owa Isiraeli, Yehoramu okhwa Yehoshafati omwami owa Yuda arakikha khukhwamiia.

¹⁷Yehoramu aba ne bukhulu bwe kimiiko kamakhumi kataru ne kibili, nga ne arakikha khukhwamiia mu Yerusalemu. Ne amiia khulwe kimiiko munaane.

¹⁸Aloonda chingila che babaami ba Isiraeli bulayi bwene nga enju eya Ahabu ne yakhola sikila akhwa omukhaana owa Ahabu. Akhola bumayaanu khu Wele Omunyali Owa Bioosi.

¹⁹ Kakhaba kario, Wele Omunyali Owa Bioosi se onakaka Yuda tawe khulwa Daudi omukholi wewe. Wele Omunyali Owa Bioosi, aba alaka Daudi ali niye ne lisaaye liewe nibo balichiililila khukhwamiia.

²⁰ Mu bwami bwa Yehoramu, Edomu yarura khu bwami bwa Yuda mala beroborera omwami wabwe.

²¹Nio Yehoramu acha Sairi ne kamakaari kewe ke liie koosi ne bakesia kamakaari. Bera Baedomu ba baaba ne bamubotookheleele. Ne kakhali banamae bewe belukha.

²²Nono Edomu yarura khu bwami bwa Yuda khukhwola luno. Mu siise esio ne sisiene lukoba lwa Libuna lwosi lwakhola bureengu.

²³Buli sisiindu sisiindi siosi siosi nisio Yehoramu akhola siaandikwa mu sitabu sie chingano che Babaami ba Yuda.

²⁴Nono Yehoramu afwa mala asiikhwa mu biliindwa bie bubwami mu Lukoba lwa Daudi. Ne omusoleeli wewe Ahasia akobola mu bweyaangu bwewe nga omwami.

²⁵Mu mwiiko kukhola ekhumi na kibili kwe bubwami bwa Yoramu okhwa Ahabu nga omwami owa Isiraeli, Ahasia okhwa Yehoramu arakikha khukhwamiia Yuda.

²⁶Ahasia aba ne bukhulu bwe kimiiko kamakhumi kabili ne kibili, nga ne arakikha khukhwamiia ne amiia ne ali Yerusalemu khulwe kumwiiko mulala. Maayi wewe aba Atalia, omukhaana wo mwami Ahabu, lundi omwichukhulu owo mwami Omuri owa Isiraeli.

²⁷Sikila Ahasia aba musaani owo mwami Ahabu, akhola bumayaanu khu Wele Omunyali Owa Bioosi bulayi bwene nga be nju eya Ahabu ne bakhola.

²⁸Omwami Ahasia aambana no mwami Yoramu owa Isiraeli mu liie khukhupana no mwami Hasaeli owa Shamu. Banamae bakaananila Ramoti-kileati bapana, mala banamae ba Shamu baumisia Yoramu lukali mwiie.

²⁹Nio Yoramu akobola mu lukoba lwa Yesireeli aone kamakoonjo niko anyoola nga ne apana ne Hasaeli e Rama. Ne Ahasia acha khubona Yoramu nga aaba ne alwala.