Read lubukusu 1 Ke Ch. 10 Bible Online

1 Ke Ch. 10 - lubukusu bible

1 Ke Ch. 10

¹Nio Bafilisiti bapana liie ne Baisiraeli. Ne Baisiraeli belukha Bafilisiti mala bererwa khu sikulu sia Kiliboa.

²Lundi Bafilisiti batimania Saulo ne babaana bewe mala babanyoola. Beera babaana ba Saulo: Yonasani, Abinatabu ne Malikishua.

³Liie liaba lirafu khu Saulo nio omusiku amunyoola amulasa buembo mala amuumisia lukali.

⁴Saulo aboolela omusuti owe bulwaani bwewe ali, “Choola embalu yowo mala unjire, nio Bafilisiti basiinde bano bakhecha banjinyailakho bakholela embelekeu tawe.” Ne kakhali omusuti owe bulwaani bwewe se amwiira tawe, khulwe khuria khukali. Nio Saulo abukula embalu yewe akwakho yamuuna.

⁵Ne omusuti owe bulwaani nga abona ali Saulo afwiile, yesi abukula embalu yewe akikwakho yamuuna mala afwa ne Saulo.

⁶Khwako Saulo afwa, niye ne basoleeli bewe bataru ne be nju yewe boosi bafwila khulala endaalo eyo.

⁷Nga Baisiraeli boosi ba baaba mwitooma baulila bali banamae beluukhe, lundi Saulo ne basoleeli bewe bafwiile, boosi banjukha chingoba chabwe mala belukha. Nio Bafilisiti bacha bachimenyamo.

⁸Endaalo eloondakho, nga Bafilisiti ne bacha khufuula chingubo che bafu, banyoola Saulo ne basoleeli bewe bataru balambalile khu sikulu sia Kiliboa bafwiile.

⁹Bakhala kumurwe barusiakho, bamunuula bulwaani bwewe. Nio baruma barumwa mu sibala sia Filisiti sioosi khuboola kamakhuwa kamalayi khu bifwaani biabwe ne khu baandu babwe.

¹⁰Baara bulwaani bwewe mu lukaangu lwe bawele babwe mala baanikha kumurwe kwewe mu lukaangu lwa Dakoni wele wabwe.

¹¹Nga babaandu ba Yabesi-Kileati boosi baulila koosi niko Bafilisiti baba ne bakholile khu Saulo,

¹²babaandu banyindaafu boosi bacha babukula kumulaambo kwa Saulo nende kie basoleeli bewe mala bakiyila e Yabesi. Babasiikha ebweeneyo asi we kumukhoonge mala beyimana khulia khu ndaalo saba.

¹³ Saulo aafwa sikila se aaba omusuubilwa tawe. Se aaba omusuubilwa khu Wele Omunyali Owa Bioosi tawe, sikila se aaria lilaka lia Wele Omunyali Owa Bioosi tawe. Ne lundi acha bulakusi anyoole likhuwa limuyeeta,

¹⁴ne se ayima buyeeti khukhwama khu Wele Omunyali Owa Bioosi tawe. Khwako Wele Omunyali Owa Bioosi amwiira mala aelesia Daudi okhwa Chesi bubwami.