Read lubukusu 1 Ke Ch. 11 Bible Online

1 Ke Ch. 11 - lubukusu bible

1 Ke Ch. 11

¹Babaandu ba Isiraeli boosi bacha khu Daudi e Heburoni mala bamuboolela bali, “Efwe khuli babaandu be lisaaye lilala ne nawe.

²Mu biise bibiabira, akhaba Saulo nasili omwami wefwe, niwe owarangirira babaandu ba Isiraeli mwiie. Wele Omunyali Owa Bioosi, Wele wowo akhuboolela ali, ‘Ewe okhabe omwaayi owe babaandu base Isiraeli lundi obe omwami wabwe.’ ”

³Nio basaakhulu be Baisiraeli boosi becha khu mwami Daudi e Heburoni. Daudi akhola endakaano ne nabo e Heburoni ebweeni wa Wele Omunyali Owa Bioosi, bachukha khu Daudi kamafura bamwamiisia, mala aba omwami owa Isiraeli, khuloondekhana ne lomo eya Wele Omunyali Owa Bioosi khubirira khu Samweli.

⁴ Daudi ne Baisiraeli boosi bacha mu Lukoba lwa Yerusalemu, lulwamanyikhana nga Yebusi. Bayebusi, nibo ba baba ne bamenyilemo.

⁵Bayebusi baboolela Daudi bali, “Se wingila muno tawe.” Kakhaba kario Daudi atiila lukoba lwa Sayuni. Lulwamanyikhana nga Lukoba lwa Daudi.

⁶Daudi aloma ali, “Omundu oolaba we khunyoa khukhwira Omuyebusi alaba omunamae omukhulu lundi komanda.” Yoabu, okhwa Seruya, arangirira khukhwibwaakala mala aaba omunamae omukhulu.

⁷Daudi amenya mu lukoba mala lwalaangwa bali, Lukoba lwa Daudi.

⁸Daudi ombakha lukoba khukhwamila emiliinda acha khukhwola khwisiisi libotookhelela lukoba. Ne Yoabu ang'oona chimbeka chicharama che lukoba.

⁹Daudi achiililila khunyoola kamaani kamakali khukhila, sikila Wele Omunyali Owa Bioosi owe banamae aaba naye.

¹⁰Kano niko kamasina ke banamae ba Daudi babamanyikha lundi babakhola bubwami bwewe bwaba ne kamaani. Baisiraeli boosi bamuyeeta mu bwami bwewe. Banamae bano ne Baisiraeli boosi bakhola Daudi aba omwami khuloondekhana nga Wele Omunyali Owa Bioosi ne alaka Isiraeli.

¹¹Kano kali kamasina ke banamae ba Daudi be kamaani. Owe khunyoa aaba Yashobeamu owe lisaaye lia Hakimoni. Aaba omwimeelesi owe bataru owe kamaani. Apanila lifumo liewe khu baandu chimia chitaru mala abeera boosi mu bukhupani bulala bwong'ene.

¹²Okhola khabili mu be kamaani bataru aaba Eliesa okhwa Dodo omuhohi.

¹³Aba ne Daudi e Pasi-Damimu nga Bafilisiti ne becha khu khuupana. Kumukuunda kwe shayiri kwabayo. Baisiraeli barakikha khukhwilukha Bafilisiti.

¹⁴Ne kakhali niye ne babaandu bewe eema ne chingabo akari we kumukuunda kwe shayiri mala bapana ne Bafilisiti mala babeera. Wele Omunyali Owa Bioosi abayeeta bakhila lukali.

¹⁵Endaalo ndala bataru khu banamae babemeelesi kamakhumi kataru abo bacha khu lwanda siimbi ne libina lia Atulamu niio Daudi aaba, siise nisio Bafilisiti baba ne bebuusiisie ne khumenya mwitooma lia Refaimu.

¹⁶Mu siise esio Daudi aba mu lukoba lusire, ne sipupu sie banamae be Bafilisiti siaba mu Betelehemu.

¹⁷Daudi ekoomba kameechi mala aloma ali, “Ee khaba omundu acha andayilakho kameechi ke khunywa mu sebele eli a silibwa mu Betelehemu!”

¹⁸Banamae bataru be kamaani bebwaakala ekambi eye Bafilisiti, bataa kameechi mu sebele mala bakarerera Daudi. Ne Daudi se akanywa tawe ne kakhali akachukha nga sianwa khu Wele Omunyali Owa Bioosi,

¹⁹Aaloma ali, “Wele anjeete khanywa kameechi kano tawe! Nyala naba nga olikho onywa kamafuki ke babaandu babeanile bulamu bwabwe bano!” Nio aaloba khukanywa. Bino biaba bikholwa bie bunyindaafu nibio banamae bataru be kamaani bano bakhola.

²⁰Abisai wandaaye owa Yoabu, aba omwimeelesi owe “Banamae kamakhumi kataru be kamaani.” Apanila lifumo liewe ne babaandu chimia chitaru, abeera boosi mala aaba we fuma engali mu basie bataru.

²¹Aba we fuma engali khukhilakho banamae kamakhumi kataru abo, mala aaba komanda wabwe. Ne kakhali se aaba owe efuma nga Bataru abo tawe.

²²Benaya okhwa Yohoyata khukhwama Kabuseela aba omunyindaafu. Akhola bikholwa bikali bie bunyindaafu. Eera banamae be kamaani lukali babili Bamoabu. Endaalo ndala arura mu munyiri kwe liiarara mala eera etalang'i.

²³Lundi eera omumisiri omuboofu lundi omuleeyi bifuba biraano. Omumisiri aba ne lifumo liboofu kumusaala kwe khuboakho biindu. Benaya aamwibwaakala ne eruungu, anuula omumisiri lifumo mala amwirira lifumo elio liliene.

²⁴Ebio nibio bikholwa nibio Benaya okhwa Yehoyata akhola. Nio Benaya anyoola efuma nga be kamaani.

²⁵Aaba owe fuma mu banamae kamakhumi kataru ne kakhali se yoola nga eya bataru abo tawe. Daudi amukhola omwimeelesi owe baliindi bewe.

²⁶Bano nibo ba baaba banamae be kamaani, Asaeli, wandaaye owa Yoabu. Elihanani okhwa Dodo khukhwama Betelehemu.

²⁷Siamoti khukhwama Haroti, Helesi khukhwama Peleti.

²⁸Ira okhwa Ikeshi khukhwama Tekoa. Ne Abieseri khukhwama Anatoti.

²⁹Sibekayi khukhwama Husha, ne Ilai khukhwama Ahohi.

³⁰Maharai khukhwama Netofa, Heleti okhwa Baana khukhwama Netofa.

³¹Itai okhwa Ribai khukhwama Kibea mu Benjamini. Benaya khukhwama Pirationi.

³²Hurai khukhwama sia njichi cha Kaashi, Abieli khukhwama Ariba.

³³Asimabeti khukhwama Bahurumi, Eliaba khukhwama Shaaliboni.

³⁴Hashemu khukhwama Kisoni, Yonasani okhwa Siake khukhwama Harari.

³⁵Ahiamu okhwa Sakari khukhwama Harari, Elifali okhwa Uri.

³⁶Heferi khukhwama Mekera, Ahiya khukhwama Peloni.

³⁷Hesiro khukhwama Karimeli, Naarai okhwa Esibai.

³⁸Yoeli wandaaye owa Nasani, Mibuhari okhwa Hakiri.

³⁹Seleki khukhwama Amoni, Naharai khukhwama Berofai owasutilanga Yoabu okhwa Seruya bilwaani.

⁴⁰Ira ne Karebu khukhwama Itiri.

⁴¹Uria Omuhiti, Sabati okhwa Ahilai.

⁴²Atina okhwa Shisa, omwimeelesi we kholo eya Rubeni ne sipupu siewe sie banamae kamakhumi kataru.

⁴³Hanani okhwa Maaka, Yosiafati khukhwama Mitani.

⁴⁴Usia khukhwama Asitera, Shama ne Yeieli ba okhwa Hotamu khukhwama Aroeri.

⁴⁵Yetiaeli ne Yona ba okhwa Simuri khukhwama Tisi.

⁴⁶Elieli khukhwama Mahaba Yeribai ne Yosiafia, ba okhwa Elinaamu. Itima khukhwama Moabu.

⁴⁷Elieli, Obeti ne Yaasieli khukhwama Mesoba.