Read lubukusu 1 Ke Ch. 12 Bible Online

1 Ke Ch. 12 - lubukusu bible

1 Ke Ch. 12

¹Bano nibo babaandu babecha khu Daudi e Sikilaki niio aba ne ekisa khu Omwami Saulo okhwa Kishi. Baba babaandu balala be kamaani babamuyeeta mwiie.

²Baba basutile buyiingo. Lundi abele banyala khulasa buembo ne khufuruusia kamabaale khusia ne kumukhono kumuluungi namwe ne kumukoota. Baba Babenjamini.

³Ahieseri ne Yoashi baba babemeelesi babwe. Bombi baba ba okhwa Shema khukhwama Kibea. Yesieli ne Peleti ba okhwa Asimabeti. Beraka ne Yehu khukhwama Anatoti.

⁴Ishimaya khukhwama Kibeoni. Aba owe kamaani lundi omwimeelesi owe banamae kamakhumi Kataru. Lundi babao Yeremia, Yahasieli, Yoanani ne Yosabati khukhwama Ketera,

⁵Babao Elusai, Yeremoti, Bealia, Shemaria, ne Siafatia khukhwama Harufi.

⁶Babao Elikana, Isishia, Asareli Yoeseri ne Yashobeamu owe lisaaye lia Kora.

⁷Yoela ne Sebatia ba okhwa Yerohamu khukhwama Ketori.

⁸Babaandu balala khukhwama mu kholo eya Kati bacha niio Daudi aba mu lukoba lusire mu sichiimi. Baba banamae be kamaani, babamanya khu khuupanila chingabo ne kamafumo. Bubweeni bwabwe bwaba oli bubweeni bwe chitalang'i. Baba be chimbilo nga kicheu mu ngulu.

⁹Eseri aba omwimeelesi owe banamae ba Kati, Obadia owe khabili, Eliabu owe khataru.

¹⁰Mishumana aba owe khane, Yeremia owe kharaano.

¹¹Atai owa sita, ne Elieli owa saba.

¹²Yoanani aba owa munaane, Elisabati owa sita.

¹³Yeremia owe khumi, ne Makibanai owe khumi na mulala.

¹⁴Ba Kati bano baba banamae bakhulu. Omutiiti mu bwimeelesi khubano bemeelela banamae emia ndala ne omukhulu emeelela banamae eelefu ndala.

¹⁵Bano nibo babambukha luluuchi lwa Yoritani mu mwesi kwe khunyoa kwe kumwiiko, siise nisio Luluuchi lwa Yoritani lwechulanga. Batimania abo boosi babamenyanga mu matooma, ebukwe ne mumbo mwe luluuchi.

¹⁶Babaandu khukhwama mu kholo cha Benjamini ne Yuda becha mu Lukoba lusire niio Daudi aaba.

¹⁷Daudi arura enje khu bakanila mala aloma ali, “Mwaaba ne mwichile nga basaale khukhunjeeta ese, mwakaanila. Ne mwaba ne mwenya khukhunjongela ese khu basiku base, nakhaba ne khakholile kamabi tawe, Wele owe bakuuka befwe akhoya amanye mala amuelesie kumunaanio.”

¹⁸Nio Roho owa Wele echa khu Amasai, omwimeelesi owe banamae kamakhumi kataru, mala aloma ali, “Efwe khuli babowo, Ee Daudi, ne khuli ne nawe, ee mwana owa Chesi! Kumuleembe, kumuleembe kube ne nawe, ne kumuleembe kube khu bayeeti bowo! Sikila Wele wowo akhuyeeta ewe.” Nio Daudi abakaanila mala abakhola babemeelesi be banamae bewe.

¹⁹Banamae balala khukhwama mu kholo eya Manase batubana ne Daudi alala nga aba ne alikho arura ne Bafilisiti khukhupana no mwami Saulo. Ne kakhali Daudi se ayeeta Bafilisiti tawe. Sikila babemeelesi be Bafilisiti bamurakho acha sikila bebaasia bali akhola ario abanjukha mala abachonganila khu Saulo owaba omwami wewe.

²⁰Nga ne ela Sikilaki, bano nibo banamae khukhwama mu kholo eya Manase ba bakobolayo ne Daudi: Atina, Yosabati, Yetiaeli, Mikaili, Yosabati, Elihu, ne Siletai. Buli mulala khu bano aba omwimeelesi owe babaandu eelefu ndala.

²¹Bayeeta Daudi khukhupania ne sipupu sie banuuli sikila baba banamae be kamaani lundi banyindaafu. Lundi baba babemeelesi be banamae.

²²Embi buli ndaalo babaandu bayaakha baambananga ne Daudi khukhwola nga ne aaba ne banamae bakali. Siise sitiiti siri sipupu sie banamae bewe siaba oli sipupu sie banamae ba Wele.

²³Ebino nibio bipupu bie banamae babecha khu Daudi e Heburoni. Becha khukaluukhasia bubwami bwa Saulo bwile khu Daudi khuloondekhana ne likhuwa lia Wele Omunyali Owa Bioosi.

²⁴Babaandu be kholo eya Yuda baba ne chingabo ne kamafumo baba babaandu chielefu sita ne chimia munaane.

²⁵Mu kholo eya Simioni babamo banamae chielefu saba ne emia ndala. Baba babaandu be kamaani lundi banyindaafu mwiie.

²⁶Mu kholo eya Lawi baba babaandu chielefu chine ne chimia sita.

²⁷Omwimeelesi khukhwama mu lisaaye lia Aruni aaba ne babaandu chielefu chitaru ne chimia saba.

²⁸Satoki owaba ne asiili omuele lundi omunyindaafu, aaba ne babemeelesi kamakhumi kabili na babili

²⁹Mu kholo eya Benjamini babao babaandu chielefu chitaru. Khukhwola siise sino babaandu bano boosi baba basuubilwa khu nju eya Saulo.

³⁰Mu kholo eya Efuraimu baba banamae chielefu kamakhumi kabili ne chimia munaane. Baba banamae banyindaafu, lundi bamanyikhana mu chinju chabwe.

³¹Balala khu be ekholo eya Manase baba banamae chielefu ekhumi ndala ne munaane babaandu babaroborwa bache bamiisie Daudi abe omwami.

³²Mu kholo eya Isakari baba babemeelesi chimia chibili. Bano nibo ba baaba ne limanyilisia lie kamakhuwa kakeecha. Nibo babamanya nisio Isiraeli ekhoyeele ekhole. Ne balebe babwe boosi baba asi wabwe.

³³Mu kholo eya Sebuluni banamae chielefu kamakhumi karaano. Baba banamae balayi lundi banyala barumikhira buli bulwaani. Berusia khuyeeta Daudi ne kumwoyo kwoosi.

³⁴Mu kholo eya Nafutali banamae babemeelesi eelefu ndala. Baba banamae chielefu kamakhumi kataru na saba basuta bulwaani ne chingabo ne kamafumo.

³⁵Mu kholo eya Dani babamo banamae chielefu kamakhumi kabili na munaane ne chimia sita baberekekha liie.

³⁶Mu kholo eya Asieri babamo banamae chielefu kamakhumi kane ba baaba ne berekekhe khucha mwiie.

³⁷Babao banamae chielefu emia ndala ne kamakhumi kabili ebukwe we luluuchi lwa Yoritani khukhwama mu kholo cha Rubeni Kati, ne babaandi mu kholo eya Manase. Baba ne bulwaani bwoosi bwe liie.

³⁸Banamae bano boosi baba berekekhe khukhupana liie. Becha Heburoni ne babisiisie khale khukhola Daudi abe omwami owa Isiraeli. Ne lundi babaandu ba Isiraeli babaandi boosi baba ne enganakani ndala eye khukhola Daudi abe omwami.

³⁹Bamenyayo chindaalo chitaru ne Daudi, ne balia ne khunywa nisio balebe babwe babarekekhera.

⁴⁰Ne lundi babaandu babamenya siimbi khukhwama mu kholo che aleeyi nga Isakari, Sebuluni ne Nafutali. Bareera biakhulia, bufu, chinduli, chisabibu chinyomu, endali ne kamafura ke chiseituni, chikhaafu ne kamakheese. Basutila biakhulia bino khu punda, chingamia, chinyumbu, ne chieeyi. Bakhola kano koosi sikila liliekhoya liliabao mu Isiraeli.