Read lubukusu 1 Ke Ch. 13 Bible Online

1 Ke Ch. 13 - lubukusu bible

1 Ke Ch. 13

¹Omwami Daudi areebana ne babemeelesi bakhulu be banamae bewe boosi be bipupu bie babaandu eelefu ndala ne bie banamae emia ndala boosi.

²Ne Daudi alaanga babaandu ba Isiraeli boosi alala mala aloma ali, “Ne mwibaasia muli lili lilayi, lundi lisiimisia Wele Omunyali Owa Bioosi, Wele wefwe, lekha khurume likhuwa. Lekha khuboolele Baisiraeli basiefwe baali mu sibala sioosi sie Baisiraeli, basaayi, ne Balawi bamenyile ne nabo mu chingoba chabwe ne mumayilwe kabwe, mala khubaboolele beche bebuusie ano nafwe.

³Ne khukholile khurio, khuche khureere lundi Lisanduku lie Ndakaano eya Wele niyo khwalekelesia nga Saulo aba ne ali omwami.”

⁴Libuusiana lie babaandu liafukiilila khukhola lirio, sikila likhuwa liaba lilayi ebweeni we babaandu boosi.

⁵ Nio Daudi abuusia alala babaandu ba Isiraeli boosi khukhwama khu luuchi lwa Sihori lwe e Misiri khukhwola khu silibwa sia Hamati. Ababuusia khureera Lisanduku lie Ndakaano eya Wele khukhwama Kiriati-Yearimu khuliyila Yerusalemu.

⁶ Ne Daudi ne Isiraeli yoosi, bacha mu lukoba lwa Baala, nilwo Kiriati-Yearimu mu sibala sia Yuda. Babukula Lisanduku lie Ndakaano eya Wele lilaangwa khulwe lisina lia Wele Omunyali Owa Bioosi owekhala khu ndebe eye bubwami angaaki we chikerubi.

⁷Basuta Lisanduku lie Ndakaano eya Wele khukhwama munju eya Abinatabu khwikaari liiya. Usa ne Ahio nibo babatimia likaari.

⁸Ne Daudi ne Baisiraeli boosi bakhina ne bekhoya lukali ebweeni wa Wele ne kamaani kabwe koosi. Bemba ne khu khuupa biilili, kamatuungu, chitamburini, bibiindu bie khu khuupania alala mu mienya, ne chikhoombi.

⁹Nga ne bola abuundu e khuulila biakhulia owa Kitoni chieeyi chatindibala, mala Usa ayila kumukhono atiila khwi sanduku lie Ndakaano.

¹⁰Ao ne nao Wele Omunyali Owa Bioosi aambila Usa lirima mala amwiira sikila atiila khwisanduku. Afwila abwenao ebweeni wa Wele.

¹¹Daudi aambwa lirima lukali sikila Wele Omunyali Owa Bioosi mwirima liewe eera Usa. Abuundu ao alaangwa bali Peresi-usa[8] khukhwola luno.

¹²Nio Daudi aria Wele lukali mala aboola ali, “Nono ese nyala nabukula ndiena Lisanduku lie Ndakaano eya Wele nacha ne nalio engo wase?”

¹³Khwako Daudi se abukula Lisanduku acha ne nalio Yerusalemu tawe. Ne kakhali aliyila munju eya Obeti Edomu owa Katihi.

¹⁴ Lisanduku lie Ndakaano eya Wele liamenya munju eya Obeti Edomu kimieesi kitaru. Wele Omunyali Owa Bioosi abiita chikhabi be nju eya Obeti Edomu ne buli siindu siewe siosi.