Read lubukusu 1 Ke Ch. 14 Bible Online

1 Ke Ch. 14 - lubukusu bible

1 Ke Ch. 14

¹Omwami Hiramu owa Tiro aruma barumwa khu Daudi. Amuelesia kimitarakwa ne babombakhi be kamabaale ne babeechi be kimirongooro bamwombakhile lichipi.

²Ne Daudi aabona ali Wele Omunyali Owa Bioosi amukholile khuba omwami owa Isiraeli. Lundi Wele Omunyali Owa Bioosi akhola bubwami bwa Daudi bwakalia. Wele Omunyali Owa Bioosi akhola ario khulwe babaandu bewe Isiraeli.

³Mu Yerusalemu, Daudi aatasa khukhwa bakhasi babaandi mala asaala babaana basoleeli babaandi ne bakhaana.

⁴Kano niko kamasina ke babaana nibo asaalila mu Yerusalemu: Siamwa, Siobabu, Nasani, ne Solomoni,

⁵Ibuhari, Elishua, ne Elipeleti.

⁶Noka, Nefeki, Yafia

⁷Elishama, Beeliata Elifeleti.

⁸Nga Bafilisiti baulila bali Daudi achukhilwekho kamafura khuba omwami owe Baisiraeli, Bafilisiti barura boosi khucha khumuyiima. Ne nga Daudi ne aulila arura acha khukhupana ne nabo.

⁹Bafilisiti bola mwitooma lia Refaimu mala barakikha khuyaaya kimiaandu.

¹⁰Daudi areeba Wele ali, “Nyala nebwaakala Bafilisiti? Olakhola mbaule?” Wele Omunyali Owa Bioosi amukalusia ali, “Yee bebwaakale! Ndakhukhola obaule!”

¹¹Nio Daudi ebwaakala Bafilisiti e Baali-perasimu mala abaula. Ne Daudi aloma ali, “Wele andumikhiile khuatula banamae bo musiku nga kumukhula kwe kamaani.” Khwako abuundu ao alaangwa bali Baali-perasimu[9].

¹²Bafilisiti belukha balekha bifwaani bie bawele babwe, mala Daudi arusia kamalaka babiosie.

¹³Siise sitiiti busa lundi Bafilisiti bakobola bebwaakala mwitooma.

¹⁴Lundi nga Daudi ne areeba Wele, Wele amukobosia ali, “Okhabebwaakala khukhwama ebweeni tawe, ne kakhali cha obabotookhelele mala obebwaakale khukhwama lubeka lwe kimirongooro kimiforosati.

¹⁵Nga ne oulila sisiindu ne sikeenda khu ngaaki khwe kimirongooro kimiforosati, ne orakikha khukhwibwaakala. Sikila ese ndarangira ebweeni wowo mbule banamae be Bafilisiti.”

¹⁶Daudi akhola nga Wele aaba ne amulakile mala atimania Bafilisiti khukhwama Kibeoni khukhwola Keseri.

¹⁷Efuma eya Daudi yasalanila yola buli abuundu mala Wele Omunyali Owa Bioosi akhola buli ekholo yamuria.