Read lubukusu 1 Ke Ch. 17 Bible Online

1 Ke Ch. 17 - lubukusu bible

1 Ke Ch. 17

¹Nga omwami Daudi ne engila mwichipi liewe, arumania balaange omung'oosi Nasani mala amuboolela ali, “Bona ese menyile ano munju yombakhwa ne kimirongooro kie kimitarakwa, ne Lisanduku lie Ndakaano ya Wele Omunyali Owa Bioosi liabikhwa mwieema!”

²Nasani amukobosia ali, “Khola koosi kaali mu mwoyo kwowo sikila Wele ali ne nawe.”

³Ne kakhali mu silo Wele aboolela Nasani ali,

⁴“Cha mala oboolele omukholi wase Daudi oli, Wele Omunyali Owa Bioosi aloma ali, ‘Ewe se olinjombakhila ese enju menyemo tawe.

⁵Khukhwama mu siise nisio namusiliamo babaandu ba Isiraeli barura Misiri khukhwola luno khamenyakho mu nju tawe. Buli lwosi menyanga mu maeema ne khuuyisibwa khukhwama abuundu alala ne khuyilwa abuundu aandi.

⁶Mu likeenda liase lioosi ne babaandu ba Isiraeli, khareebakho yesi yesi khu bemeelesi nibo narobora khuliinda baisiraeli ndi, siina sikila ne bakhanjombakhila enju eye kimitarakwa?’

⁷“Nono boolela Daudi omukholi wase oli, kano niko Wele Omunyali Owa Bioosi owe kamae aloma: ‘Nakhurusia mundaa mu bwayi bwe kamakheese nakhukhola obe omwami we babaandu base Isiraeli.

⁸Nabelenge ne nawe buli abuundu osi osi niio wachilenge. Lundi nakhuulile basiku bowo boosi. Ndakhukhola obe ne fuma nga babemeelesi be bunyali khu sibala.

⁹Nja khuroborera babaandu base Isiraeli abuundu ekhumenya, niio balimenya ne bakhaananisibwa lundi tawe. Babaandu babi se bakhanyalekho lundi nga khale tawe.

¹⁰Babaandu babi se balibanaaniakho lundi nga khale khukhwama mu siise sie babemeelesi be babaandu base Isiraeli tawe. Nja khuula basiku bowo boosi khutasa khwako khuboolela ndi Wele Omunyali Owa Bioosi akhakhwombakhile ewe enju.

¹¹Nga ewe ne olifwa oche e makoombe ese ndiamiisia mulala khu basoleeli bowo abe omwami mala ndiliinda bubwami bwewe bube bwe kamaani.

¹²Niye olinjombakhila ese enju lundi ndikhola bubwami bwewe bubeeo mindali na mindali.

¹³ Ese ndiba raraawe ne naye aliba omwana wase. Se ndimurusiakho busiime bwase nga nabukula khu owanyoao nga omwami tawe.

¹⁴Ndimura mu bwimeelesi bwe enju yase ne khu bwami bwase mindali na mindali.’ ”

¹⁵Nasani aboolela Daudi buli siindu nisio abona mu malola.

¹⁶Nio omwami Daudi acha engila mwieema mala acha ebweeni wa Wele Omunyali Owa Bioosi, mala asaba ali, “Ee Wele Omunyali Owa Bioosi, Ese naanu ne enju yase eli siina nio umbe efuma ori?

¹⁷Wele sino siabeele sisiindu sitiiti mu moni chowo. Khutasa khwako wakholile chindakaano khu lisaaye liase mu miiko kikiicha. Lundi wakholile ese khuba omundu owe efuma ee Wele Omunyali Owa Bioosi.

¹⁸Nono nga ese Daudi nyala natasakho siina khu lukoosi nilwo unjekeesie luno, ese omukholi wowo? Ewe umanyile ese.

¹⁹Sikila khulwo omukholi wowo ee Wele Omunyali Owa Bioosi, ne khuloondekhana ne kumwoyo kwowo wamwene, wakholile bibiindu biboofu bino ne khubiekesia bimanyikhane.

²⁰Se alio oli nga ewe tawe ee Wele Omunyali Owa Bioosi ne se aliio Wele okundi ne akhali ewe tawe, khuloondekhana nende koosi niko khwaulila.

²¹Se eliio ekholo ekiindi khu sibala eli nga Isiraeli tawe, niyo ewe wasikula wabakhola babe babaandu bowo babeene. Bibiindu biboofu nende bie khuukia nibio wabakholela nga ne watimania chikholo chichiindi ebweeni wabwe mu sibala sioosi.

²²Wakhola Isiraeli khuba babaandu bowo khulwa mindali na mindali, lundi ewe Wele Omunyali Owa Bioosi, wekhola Wele wabwe.

²³“Ne luno ee Wele Omunyali Owa Bioosi, lekha elomo niyo wasuubisia ese omukholi wowo ne nju yase ekholekhe. Khola nilio waloma.

²⁴Efuma yowo echa khumanyikhana lundi ekuche mu biise bioosi bali, ‘Wele Omunyali Owa Bioosi owe banamae, Wele owa Isiraeli.’ Mala oliliinda lisaaye liase libeo khulwe biise bioosi.

²⁵Ndi ne bunyindaafu khukhusaba ewe, Wele lisaba lino, sikila ewe wafunulile ese omukholi wowo kano koosi, mala wambooleele oli, oliombakha enju yase.

²⁶Ne nono Wele Omunyali Owa Bioosi ewe oli Wele, mala walaka lisuubisia lie khuukia lino khwise omukholi wowo.

²⁷Nono khusaba ewe obiite lisaaye liase chikhabi nio bachiililile khukhwekhoyela kumwalaalo kwowo. Sikila nisio ewe obiita chikhabi ee Wele Omunyali Owa Bioosi siba sibiite mindali na mindali.”