Read lubukusu 1 Ke Ch. 18 Bible Online

1 Ke Ch. 18 - lubukusu bible

1 Ke Ch. 18

¹Enyuma we siise omwami Daudi aseera ebwaakala Bafilisiti mala abaula. Abanuula lukoba lwa Katihi ne birekere bibialubotookhelela.

²Akhaba lundi aula Bamoabu mala bekela bakholi bewe mala bamuruunganga busuuru.

³Daudi lundi aula Hatateseri omwami owa Soba, siimbi ne sibala sia Hamati, nga aaba ne alikho ne acha khubalaayia bubwami bwewe khu luuchi lwa Efurati.

⁴Daudi aamba kamakaari kewe ke liie eelefu ndala, babaandu chielefu saba batimianga chifarasi, ne banamae bakeenda busa chielefu kamakhumi kabili. Abukula chifarasi chichola kamakaari ke liie emia ndala mala afuna bikele chiramire choosi.

⁵Nga Bashamu ba Damasika becha khuyeeta Hatateseri omwami owa Soba, Daudi eera babaandu ba Shamu chielefu kamakhumi kabili na chibili khu nibo.

⁶Nono Daudi eera sipupu sie banamae mu Damasika mu Shamu. Bashamu baaba bakholi bewe mala bamuruunganga busuuru. Ne Wele Omunyali Owa Bioosi akhola Daudi aula buli abuundu niio acha.

⁷Daudi aabukula chingabo che esahabu nicho bakholi ba Hatateseri baba ne basutile mala achiyila e Yerusalemu.

⁸ Daudi lundi aabukula kimikasa kimikali khukhwama mu ngoba cha Tibuhati ne Kuni, chingoba cha Hatateseri. Solomoni arumikhira kimikasa kino khung'oona litangi lie mu Lukaangu, chinjeko ne bibiindu bie mu Lukaangu.

⁹Omwami Toi owa Hamati aulila ali Daudi akhilile sipupu sie banamae ba Hatateseri omwami owa Soba sioosi.

¹⁰Nio Toi aaruma omusoleeli wewe Hatoramu khukheesia omwami Daudi ne khu musiima khulwe khuula Hatateseri. Toi aba apana ne Hatateseri khu biise bikali. Toi arumira Daudi biianwa bikali bie esahabu, efwesa ne kumukasa.

¹¹Bino bioosi omwami Daudi abiaana khu Mwami Wele Omunyali Owa Bioosi alala ne fwesa ne esahabu niyo abukula khukhwama mu bibala bino: Edomu, Moabu, Filisiti ne Amaleki.

¹² Abisai omwana owa Seruya eera Baedomu chielefu likhumi ne chielefu munaane ba baba mwitooma lia chumbe.

¹³Mala aara bipupu bie banamae mu sibala sia Edomu mwoosi. Baedomu bekela bakholi bo mwami Daudi. Wele Omunyali Owa Bioosi akhola Daudi aula buli abuundu niio acha.

¹⁴Nio Daudi amiia Isiraeli yoosi. Aakholela babaandu bewe bung'ali ne buulekhaasie.

¹⁵Yoabu okhwa Seruya aaba omwimeelesi owe banamae. Yehoshafati okhwa Ahiludi emeelelanga kamaandike.

¹⁶Satoki okhwa Ahitubu ne Ahimeleki okhwa Abiatari baba basaayi. Seraya aaba omuandiki.

¹⁷Benaya okhwa Yehoyata aaba omwimeelesi owe baliindi ba Daudi. Ne basoleeli bo mwami Daudi baaba babemeelesi bakhulu mu milimo kio mwami Daudi.