Read lubukusu 1 Ke Ch. 20 Bible Online

1 Ke Ch. 20 - lubukusu bible

1 Ke Ch. 20

¹ Mukhurakikha khwe kumwiiko mu biise nibio babaami buli lwosi bachilangakho mwiie, Yoabu aarangirira banamae mala ebwaakala sibala sia Amoni. Babotookhelela lukoba lwa Raba, balwibwaakala, mala balubunia.

²Daudi arusia ekutwa eye bubwami khumurwe kwo mwami wabwe mala akiefwara. Yaba busiro bwe chikiilo embi kamakhumi kataru na chine. Ekuutwa eyo yaba yakholwa khu sahabu ne mukari mwayo abeele baramo kamabaale ke bukusi bwe angaaki. Daudi lundi ayaya bibiindu bikali khukhwama mu lukoba.

³Lundi abukula babaandu be mu lukoba mala abara khu milimo kie khukholela kimisiameno ne chiaywa ne chiuma che bichuuma. Daudi akholela ario babaandu be chingoba chichiindi choosi cha Amoni. Nono niye ne babaandu bewe bakobola e Yerusalemu.

⁴Enyuma wa kano, liie liarakikha lundi ne Bafilisiti e Keseri. Nio Sibekayi Omuhushati eera Sipayi. Aaba mulala khu lisaaye lie babaandu baboofu. Ne bafilisiti bakhilwa.

⁵ Liie liliindi ne Bafilisiti liabao. Mala Elihanani okhwa Yairi eera Lahimi wandaaye owa Koliati khukhwama Katihi. Kumusaala kwe lifumo liewe kwaba nga kumusaala kwo muruki.

⁶Liie liliindi liaba e Katihi niio omundu omuboofu owe chinjala sita buli khu mukhono, ne chinjala sita buli khu sikele, choosi alala kamakhumi kabili na chine. Aaba we lisaaye lie babaandu baboofu.

⁷Akhoma Baisiraeli mala Yonasani okhwa Simea, amwiira. (Simea aba wandaaye owa Daudi.)

⁸Babaandu baboofu bataru nibo Daudi ne babaandu bewe beera bano baba be lisaaye lie babaandu baboofu ba Katihi.