Read lubukusu 1 Ke Ch. 21 Bible Online

1 Ke Ch. 21 - lubukusu bible

1 Ke Ch. 21

¹Sietani enya khureera butinyu khu baandu ba Isiraeli, nio akhola Daudi abisia khubala babaandu.

²Daudi aelesia Yoabu ne babemeelesi be banamae babaandi kamalaka ali, “Cha mu Isiraeli mwoosi khukhwama Beerisheba khukhwola Dani mala mubale babaandu. Mundeerere likhuwa nio manye bali benga.”

³Yoabu amukobosia ali, “Wele Omunyali Owa Bioosi akhoya akuchisia babaandu ba Isiraeli baba kamakhabi emia khukhilakho nga bali luno. Omwami, bano boosi se bali bakholi bowo? Siina sikila ewe omwami ne wenya khukhola lino mala oreerere ekholo eya Isiraeli yoosi kumusaango?”

⁴Ne kakhali omwami ayingiilila Yoabu akhole nga ne enya. Yoabu aarura aacha akeenda mu sibala sia Isiraeli sioosi. Nio enyuma akobola e Yerusalemu.

⁵Yoabu areerera omwami Daudi bukali bwe babaandu. Babao babaandu emilioni ndala ne chielefu emia ndala mu Isiraeli banyala khu khuupana. Ne mu Yuda babaamo babaandu chielefu chimia chine ne kamakhumi saba banyala khu khuupana.

⁶Ne kakhali Yoabu se aabala chikholo cha Lawi ne Benjamini tawe. Sikila se asiima lilaka lio mwami tawe.

⁷Wele se asangaalila nisio Daudi akhola tawe, nio areera kumunaanio khu Isiraeli.

⁸Daudi aboolela Wele ali, “Nakholile bumayaanu bukali khulwe khukhola kano! Nosiima umbeele kholile mu busilu.” Nono khusaba umbele nga khukoseele.

⁹Nio Wele Omunyali Owa Bioosi aboolela Kati, omung'oosi owa Daudi ali,

¹⁰“Cha oboolele Daudi oli, ndikho muelesia kamakhuwa kataru. Ndamukholela nisio arobora.”

¹¹Kati aacha khu Daudi amuboolela ali, “Kano niko Wele Omunyali Owa Bioosi aboola: ‘Wamwene orobore.’

¹²Kimiiko kitaru kie njala, namwe kimieesi kitaru wilukhenge banamae be basiku bowo, namwe chindaalo chitaru nicho Wele Omunyali Owa Bioosi alakhwibwaakala ewe ne mbalu yewe, lufu lubi lukhasalanile mu sibala siowo khu ndaalo chitaru echo. Malaika wewe alareera lifwa mu Isiraeli mwoosi! Nono mboolele nilio nja khuboolela oundumire!”

¹³Daudi akobosia Kati ali, “Ese ndi mu butinyu lukali! Ne se nenya khunaanisibwa ne babaandu tawe. Lekha Wele Omunyali Owa Bioosi omwene abe niye ounaania, sikila niye ali owe siisa.”

¹⁴Nio Wele Omunyali Owa Bioosi aruma lufu lubi khu baandu ba Isiraeli, mala babaandu chielefu kamakhumi saba baafwa.

¹⁵Nio Wele aruma malaika khubunia Yerusalemu. Ne akhakhola ario tawe Wele akaluukhasia kamebaasio mala aboolela malaika ali, “Lekha! Ako kanyalile!” Malaika aaba emile aluyia lwe khuula lwa Onani Omuyebusi.

¹⁶Daudi aalola aabona malaika wa Wele Omunyali Owa Bioosi emile mu mbeo asutile embalu yewe mu mukhono kwewe, erekekhe khubunia Yerusalemu. Nio Daudi ne basaakhulu befwara kamakunia, mala benama bubweeni bwabwe bwetiila asi.

¹⁷Daudi asaba Wele ali, “Wele ese niise owakholile bumayaanu. Ese niise owarusia lilaka ndi babaandu babalwe. Nono babaandu bano bakholile siina? Ee Wele Omunyali Owa Bioosi, Wele wase, mbeelesie ese kumunaanio nende be nju yase. Ne okhara bulwaale khu baandu bowo tawe.”

¹⁸Malaika wa Wele Omunyali Owa Bioosi aboolela Kati alake Daudi ache ombakhe alutare khulwa Wele Omunyali Owa Bioosi e luya lwe khuulilakho lwa Onani.

¹⁹Nio Daudi acha khuloondekhana ne elomo eya Kati niyo aloma mu lisina lia Wele Omunyali Owa Bioosi.

²⁰Nono Onani ne basoleeli bewe bane baba balikho bauula engaanu. Ne nga babona malaika basoleeli belukha bacha bekisa.

²¹Daudi echa khu Onani. Nga Onani ne abona omwami Daudi ne alikho echa, alekha luuya lwe khuulilakho mala asikamila Daudi enama bubweeni bwewe bwetiila asi.

²²Daudi alomaloma khu Onani ali, “Mbelesie luuya lwowo lwe khuulilakho nio nombakhilekho Wele Omunyali Owa Bioosi alutare. Ngusie khu bukusi bubwenyekhana manya lufu lubi luno lurura khu Baisiraeli.”

²³Nio Onani aakobosia Daudi ali, “Kholubukule, mala omwami olukhoolele siosi siosi nisio wenya. Ne lundi lola ndikho mbaana chieeyi chase nga siianwa sie khukhwosia ne kimiini kie khuula nikieki nga chiikhu che khukhwoselia, ne ngano nga siianwa sie biakhulia. Nabiaanile bioosi.”

²⁴Ne omwami Daudi aakobosia Onani ali, “Tawe, ndabikula bioosi khu bukusi bubwenyekhana. Se nyala naana sisiindu siosi siosi khu Wele Omunyali Owa Bioosi nga siianwa siili sisiowo tawe, lundi se enyala nabukula sisiindu nisio ese kharuungire siosi siosi tawe.”

²⁵Nio Daudi aruunga Onani bitonyi chimia sita che esahabu khulwe abuundu ao.

²⁶Nio Daudi ombakhila Wele Omunyali Owa Bioosi alutare mala aana biianwa bie khukhwosia ne biianwa bie kumuleembe. Asaba Wele Omunyali Owa Bioosi, mala Wele Omunyali Owa Bioosi amukobosia khulwe khuruma kumulilo khukhwama mwikulu khu alutare eye biianwa bie khukhwosia.

²⁷Wele Omunyali Owa Bioosi alaka aboolela malaika akobosie embalu yewe musibaabi.

²⁸Mu biise ebio Daudi nga aabona ali Wele Omunyali Owa Bioosi aakobosie lisaba liewe khuluyia lwe khuulilakho lwa Onani omuyebusi, aanilao biianwa.

²⁹Aanila aluyia ao sikila liiema lia Wele Omunyali Owa Bioosi nilio Musa aaba ne akhola mu sichiimi, ne alutare eye biianwa bie khukhwosia mu biise ebio biaba bisiili abuundu aesuta e Kibeoni.

³⁰Ne kakhali Daudi se anyala khucha mwieema litakatifu khusaba Wele tawe, sikila aria embalu eya malaika wa Wele Omunyali Owa Bioosi!