Read lubukusu 1 Ke Ch. 23 Bible Online

1 Ke Ch. 23 - lubukusu bible

1 Ke Ch. 23

¹ Nga Daudi aaba ne asaakhuluwe lukali, akhola omusoleeli wewe Solomoni aaba omwami owa Isiraeli.

²Omwami Daudi areera alala babemeelesi ba Isiraeli boosi ne basaayi, ne Balawi boosi.

³Aabala Balawi baali ne bukhulu bwe kimiiko kamakhumi kataru namwe bakhulukhoo. Boosi alala baba chielefu salasini na naane.

⁴Khubano omwami Daudi aelesia babaandu chielefu ishirini naine khukhola kimilimo kie Lukaangu, babaandu chielefu sita khuuba babemeelesi ne bakhalaki.

⁵Ne babaandu chielefu chine khuliinda bilibwa, ne babaandu chielefu chine bafumia Wele Omunyali Owa Bioosi khulwe khurumikhira bibiindu bie khukhwimbilamo kimienya nibio omwami Daudi ang'oona.

⁶Daudi akabukhasia Balawi mu bipupu bitaru khuloondekhana ne babaana bataru ba Lawi. Kerishomu, Kohati ne Merari.

⁷Kerishomu asaala babaana basoleeli babili: Latani ne Shimei.

⁸Latani asaala basoleeli bataru: Yehieli, Shetamu ne Yoeli.

⁹Shimei asaala basoleeli bataru: Shelomoti, Hasieli ne Harani. Ba baaba babemeelesi be kimiliango kie babaandu babaakukha khu Latani.

¹⁰Shimei asaala basoleeli bane: Yahati, Sina, Yeushi ne Beria.

¹¹Yahati aba omubele, ne Sina aaba omuloonda. Yeushi ne Beria se baba ne lisaaye likali tawe, nio babalwanga luuya lulala busa.

¹²Kohati asaala basoleeli bane: Amuramu, Ishihari, Heburoni ne Usieli.

¹³ Babaana ba Amuramu baba Aruni ne Musa. Aruni ne lisaaye liewe baulwa khuaana khu Wele bibiindu bitakatifu khulwa mindali na mindali. Khukhwosia bimuli biiunya bulayi, ebweeni wa Wele Omunyali Owa Bioosi, khu mukholela ne khubiita babaandu chikhabi mu lisina liewe.

¹⁴Ne ba okhwa Musa, omundu owa Wele, babalwa alala ne Balawi.

¹⁵Musa asaala basoleeli babili, Kerishomu ne Elieseri.

¹⁶Omwana owa Kerishomu aaba Shubaeli.

¹⁷Elieseri asaala omusoleeli mulala yeng'ene bali, Rehabia. Ne Rehabia aaba ne babaana basoleeli bakali.

¹⁸Okhwa Kohati okhola khabili, Isihari asaala omusoleeli bali Shelomiti.

¹⁹Okhwa Kohati okhola khataru Heburoni asaala basoleeli bane: Yeria, Amaria, Yehasieli ne Yekameamu.

²⁰Okhwa Kohati okhola khane Usieli asaala basoleeli babili: Mika ne Ishiya.

²¹Merari asaala basoleeli babili, Mahili ne Mushi. Mahili yesi asaala basoleeli babili Eliesa ne Kishi.

²²Ne Eliesa aafwa ne akhasaalakho basoleeli tawe, asaala bakhaana bong'ene. Bakhaana bewe bacha khu basoleeli bararaawabwe omuro bali Kishi.

²³Okhwa Merari okhola khabili, Mushi asaala basoleeli bataru Mahili, Eteri ne Yeremoti.

²⁴Bano baba be lisaaye lia Lawi khuloondekhana ne chinju nga ne babalwa. Buli mulala owaba ne bukhulu bwe kimiiko kamakhumi kabili namwe butumakhoo, owanyala khukhola kimilimo kie mu Lukaangu lwa Wele Omunyali Owa Bioosi abalwa.

²⁵Daudi aaloma ali, “Wele Omunyali Owa Bioosi, Wele owa Isiraeli, aelesie kumuleembe khu baandu bewe, ne niye omwene alamenya mu Yerusalemu mindali na mindali.

²⁶ Nio luno mbao sifuno siosi siosi khulwe Balawi khusuta liiema lia Wele Omunyali Owa Bioosi, ne bibiindu bibiindi bioosi birumikhanga mu lisaaya tawe.”

²⁷Khuloondekhana ne lilaka lia Daudi limaliilisi, Balawi boosi babalwa ne boolile bukhulu bwe kimiiko kamakhumi kabili.

²⁸ Ne kakhali baelesibwa kimilimo kie khuyeeta lisaaye lia Aruni khu milimo kie enju eya Wele Omunyali Owa Bioosi. Lundi baliindanga chisiro chalwo, ne khubiikha mu bukwalaafu buli siindu siili sitakatifu ne kumulimo kwosi kwosi munju eya Wele.

²⁹Benyekha khureera kumukaati kumutakatifu khu mesa, khureera bufu khulwe biianwa bie biakhulia khureera kimikaati kikhalimo limela tawe, khukhupa kimikaati ne khutubania bufu ne kamafura, mu bikelo bioosi namwe buboofu.

³⁰Ne Balawi buli lwosi baaba basiimanga ne khufumia Wele Omunyali Owa Bioosi kumutikhinyi ne ekolooba.

³¹Ne buli lwosi Balawi baananga khu Wele Omunyali Owa Bioosi biianwa bie khukhwosia khu ndaalo eya Sabato, Naikara eye kumwesi kumuya, ne naikara chichiindi khuloondekhana nga benyibwa. Balawi bakhola kimilimo ebweeni wa Wele Omunyali Owa Bioosi buli endaalo.

³²Nono Balawi baelesibwa kimilimo kie khuliinda liiema lie kumuse ne liiema lia Wele Omunyali Owa Bioosi. Lundi Basaayi bano bayeeta lisaaye lia Aruni ne kimilimo kie lisaaya mu Lukaangu lwa Wele Omunyali Owa Bioosi.