Read lubukusu 1 Ke Ch. 26 Bible Online

1 Ke Ch. 26 - lubukusu bible

1 Ke Ch. 26

¹Bino nibio bipupu bie baliindi be lukaangu: Khukhwama mu luuya lwa Kora baaba Mesielemia okhwa Kore wenju eya Asafu.

²Mesi elemia aba ne basoleeli saba: Sakaria, Yetiaeli, Sebatia, ne Yetinieli,

³Elamu, Yehohanani ne Eliehoenai.

⁴ Lundi Obedi-Edomu, niye Wele abiita chikhabi, aba ne basoleeli munaane: Shemaya, Yehosabadi, Yoa Sakari, ne Netaneli.

⁵Amieli Isakari ne Peule-tai.

⁶Akhaba lundi Shemaya okhwa Obedi-Edomu aba ne basoleeli ba baaba babemeelesi be chinju che bakuukawabwe, sikila baaba babaandu banyala.

⁷Shemaya aaba ne basoleeli sita, Otini, Refaeli, Obeti, Elisabati, Elihu ne Semakia. Elihu ne Semakia baba bakholi be kamaani.

⁸Bano boosi baba be nju eya Obedi-Edomu. Nibo ne babaana babwe ne balebe babwe baba babaandu banyala lundi be kaamani khu milimo. Obedi-Edomu aba ne lisaaye lie babaana kamakhumi sita.

⁹Mesielemia aaba ne babaana ne balebe boosi alala likhumi na munane. Boosi yaba banyala kimilimo.

¹⁰Hosa khukhwama mu luya lwa Merari aba ne basoleeli bane: Simuri, niye raraawe akhola omwimeelesi, akhaba ne akhaba omubele tawe.

¹¹Hilikia, Tebalia ne Sakaria. Boosi alala baba ekhumi na bataru be nju eya Hosa.

¹²Kimikabo kie baliindi be Lukaangu bano khuloondekhana ne babemeelesi baukhasibwa mu bipupu khuloondekhana nende be chinju mala baelesibwa kimilimo munju ya Wele Omunyali Owa Bioosi, bulayi bwene nga balebe babwe babaandi ne bakhola.

¹³Baapa ekura khurobora buli nju khuliinda silibwa. Baele ne basaakhulu boosi baapa ekura.

¹⁴Ekura yakwila Shelemia silibwa sie bukwe. Ne omusoleeli wewe Sakaria, ekura yamukwila khuliinda silibwa sie bunaswa. Buli lwosi Sakaria akaambilanga babaandu bulayi.

¹⁵Obeti Edomu anyoola silibwa sie bunafubo, ne basoleeli bewe banyoola kimilimo kie khuliinda libiikhilo lie biakhulia.

¹⁶Ekura yakwila Shupimu ne Hosa silibwa sie mumbo ne silibwa sia Shaleketi, sili kumuila kucha engaaki. Baliindanga elubeka ne lubeka.

¹⁷Buli endaalo baliindi sita baba ebukwe, bane baba ebunaswa ne bane baba ebunafubo. Baliindi babili buli siise bareebwanga ebiikhilo lie biakhulia buli endaalo.

¹⁸Babao baliindi babili mwiema lie mumbo, ne bane khu ngila echa mwiiema.

¹⁹Bino biaba bipupu bie baliindi be bilibwa khukhwama mu luuya lwa Kora ne luuya lwa Merari.

²⁰Mu Balawi, Ahiya aaba omwimeelesi owe libiikhilo lia Wele, ne libiikhilo lie bibiindu bitakatifu.

²¹Latani mulala khu bakhwa Kerishomu, aba kukaawe we bipupu bie be chinju chingali, sitube ne be nju eya Yehieli omusoleeli wewe.

²²Bakhwa Yehueli babili Setamu ne wandaaye Yoeli bemeelelanga libiikhilo lie Lukaangu lwa Wele Omunyali Owa Bioosi.

²³Babemeelesi babaandi baroborwa mu lisaaye lia Amuramu, Isihari, Heburoni ne Usieli.

²⁴Shebueli owe luuya lwa Kerishomu okhwa Musa, aaba niye omukhulu oliinda libiikhilo lie Lukaangu.

²⁵Bano baaba balebe khukhwama khu Elieseri wandaaye owa Kerishomu: Elieseri aaba raraawe owa Yoramu, Yoramu aaba raraawe owa Sikiri, Sikiri aaba raraawe owa Shelomiti.

²⁶Shelomiti ne balebe bewe bemeelelanga kamabiikhilo ne biianwa bibiaulwa khu Wele Omunyali Owa Bioosi. Omwami Daudi, ne babemeelesi be chinju, che bapaapa babwe ne babemeelesi be banamae chielefu ne chimia ne banamae bakhulu baana biianwa bino khu Wele.

²⁷Babukulakho bibiindu bilala nibio yaba baambile mwiie mala babira alubeka khukhola kimilimo kie khung'oona Lukaangu lwa Wele Omunyali Owa Bioosi.

²⁸Akhaba biianwa bibiareerwa no mung'oosi Samweli, no mwami Saulo ne Abuneri okhwa Neri, ne Yoabu okhwa Seruya, nende buli siindu sisiareerwa, bioosi bialindibwa ne Shelomoti ne balebe bewe.

²⁹Mu be lisaaye lia Isihari, Kenania ne basoleeli bewe, baebwa kimilimo kienje, khuba babemeelesi ne bakhalaki.

³⁰Mu lisaaye lia Heburoni, Hasiabia ne balebe bewe elefu ne chimia saba, boosi baebwa kumulimo kwa Wele Omunyali Owa Bioosi ne omwami Daudi mu Isiraeli lubeka lwe mumbo mwe Luluuchi lwa Yoritani.

³¹Yeria aba omwimeelesi we lisaaye lia Heburoni. Mu mwiiko kukhola kamakhumi kane khukhwama nga Daudi naba omwami, limenieelesia lie lunyilili lwe be nju eye lisaaye lia Heburoni liakholwa mala banamae bakhulu be nju yino banyoolekha bamenya e Yaseri mu sibala sia Kileati.

³²Omwami Daudi arobora Yeriya ne balebe bewe chielefu chibili ne chimia saba babe babemeelesi be chinju che ba paapa babwe. Baroborwa khukhwimeelela ba Rubeni, ba Kati, nende balala khu ba Manase. Babemeelela mu makhuwa ka Wele ne kimilimo kio mwami Daudi.