Read lubukusu 1 Ke Ch. 27 Bible Online

1 Ke Ch. 27 - lubukusu bible

1 Ke Ch. 27

¹Kano kali kamasina ke babemeelesi be chinju cha Isiraeli, banamae babemeelela chielefu ne chimia ne babemeelesi babakholela omwami. Buli kumwesi sipupu chielefu ishirini naine bakholela omwami.

²Yashobeamu okhwa Sabutieli aba omwimeelesi owe sipupu sie khunyoa sie kumwesi kwe bweeni sipupu siewe siabaamo babaandu chielefu ishirini naine.

³Yashobeamu okhwa Sabutieli aba owe lisaaye lia Peresi. Lundi aba omwimeelesi owe bakhulu be banamae mu mwesi kwe khunyoa.

⁴Bubwasio bwe kumwesi kwa khabili bwaba bwa Dotai owe lisaaye lia Ahohi.

⁵Komanda we khu bwasio bwe kumwesi kwa khataru aba Benaya okhwa Yehoyata omusaayi. Aaba ne babaandu chielefu kamakhumi kabili na chine.

⁶Yuno niye Benaya owaba owe kaamani khu banamae kamakhumi kataru. Niye owabemeelela. Omwana wewe Amisabati aaba omwimeelesi owe sipupu siewe.

⁷Bubwasio bwe kumwesi kwe khaane aaba Asaheli, wandaaye owa Yoabu omusoleeli wewe Sabatia ela khu milimo kiewe nga omwimeelesi. Babaamo babaandu chielefu Ishirini naine mu sipupu siewe.

⁸Komanda owa kharaano owe bubwasio bwe kumwesi kwa kharaano aba Shamu-Huti, owe lisaaye lia Isira.

⁹Bubwasio bwe kumwesi kwa sita aba Ira okhwa Ikeshi Omutekoa. Mu sipupu siewe babamo babaandu chielefu kamakhumi kabili na bane.

¹⁰Bubwasio bwe kumwesi kwa saba aaba Helesi Omupeloni owe lisaaye lia Efuraimu.

¹¹Bubwasio bwa munaane bwe kumwesi kwa munaane aba Sibekayi Omuhushati. Aaba owe lisaaye lia Sera.

¹²Bubwasio bwa tisa kumwesi kwa tisa, aba Abieseri khukhwama Anatoti Omubenjamini.

¹³Bubwasio bwe khumi bwe kumwesi kwe khumi aaba Maharai Omunetofa. Aaba owe lisaaye lia Sera.

¹⁴Bubwasio bwe khumi na lulala bwe kumwesi kwe khumi na lulala aba Benaya Omupirationi owe lisaaye lia Efuraimu.

¹⁵Bubwasio bwe khumi na bubili bwe kumwesi kwe khumi na kibili aba Helitai Omunetofati. Aaba owe lisaaye lia Otinieli.

¹⁶Kano kali kamasina ke babemeelesi be bubwami bwe chikholo cha Isiraeli: Ekholo eya Rubeni aba Elieseri okhwa Sikiri. Ne kholo eya Simioni aba Siafatia okhwa Maaka.

¹⁷Ekholo eya Lawi aaba Hasiabia okhwa Kemueli. Ne ekholo eya Aruni aaba Satoki.

¹⁸Yuda Yemeelelwa ne Elihu mulala khu bawandaaye bo mwami Daudi. Ekholo eya Isakari yemeelelwa ne Omri okhwa Mikaili.

¹⁹Ekholo eya Sebuluni yemeelelwa ne Ishimaya okhwa Obadia. Ne Nafutali yemeelelwa ne Yeremoti okhwa Asirieli.

²⁰Efuraimu yemeelelwa ne Hosea okhwa Asasia.

²¹Balala khu kholo eya Manase bemeelelwa ne Yoeli okhwa Petaya. Ne babaandi khu kholo eya Manase bemeelelwa ne Ito okhwa Sakaria. Benjamini yemeelelwa ne Yaasieli okhwa Abuneri.

²²Dani yemeelelwa ne Asareli okhwa Yerohamu. Bano baba babemeelesi be chikholo cha Isiraeli.

²³ Omwami Daudi se abala babaandu ba baaba asi we bukhulu bwe kimiiko kamakhumi kabili tawe. Sikila Wele Omunyali Owa Bioosi alaka khukhola babaandu ba Isiraeli babe bakali nga ching'enieesi che mu ngaaki.

²⁴ Yoabu okhwa Seruya aarakikha khubala babaandu ne se abala amala tawe. Wele aana kumunaanio khu Isiraeli sikila khubala babaandu khuno. Nio bukali bwe babaandu bumaliilisi se baandikwa mu sitabu sie lukano lwe bubwami bwo omwami Daudi tawe.

²⁵Owemelelanga libiikhilo lio mwami aaba Asimabeti okhwa Atieli. Ne owemeelelanga libiikhilo lie mu ngoongo mu ngoba, mu birekere, ne mu chindeleelwa, aaba Yonasani okhwa Usia.

²⁶Owemeelelanga bulimi aaba Esiri okhwa Kelubu.

²⁷Owemeelelanga kimikuunda kie kimisabibu aba Simei khukhwama e Rama. Ne owemeelelanga kimisabibu kie endali aaba Sabuti khukhwama Shefamu.

²⁸Owemelelanga kimiseituni ne kimikhuyu mumbo emaayo we sikulu aba Baali-hanani khukhwama Keteri. Owemelelanga libiikhilo lie kamafura ke kimiseituni aba Yoashi.

²⁹Owemelelanga chikhaafu mu Mayilwe ka Siaroni aaba Shitirai. Owasamusianga chikhaafu mu matooma aba Shafati okhwa Adilai.

³⁰Owemelelanga chingamia aaba Obili Omuishimaeli. Owemelelanga chipunda aba Yehiteya khukhwama Meronoti. Owemelelanga kamakheese ne chimbusi aaba Yasisi Omuhakiri.

³¹Babaandu bano boosi baba babemeelesi be kimiaandu kio mwami Daudi.

³²Yonasani, khochaawe owo mwami Daudi aaba omukambisi wewe. Lundi Yonasani aaba omundu owe limanya lundi omuandiki. Niye Yehieli okhwa Hakimoni baliindanga babaana basoleeli bo mwami.

³³Ahitiofeli aba okaambila omwami ne Hushai aba omusaale owo mwami.

³⁴Yehoyata okhwa Benaya ne Abiatari bela mu bweyaangu bwa Ahitiofeli nga bakambisi bo mwami. Yoabu aba komanda owe banamae bo mwami.