Read lubukusu 1 Ke Ch. 28 Bible Online

1 Ke Ch. 28 - lubukusu bible

1 Ke Ch. 28

¹Daudi abuusia babemeelesi ba Isiraeli boosi mu Yerusalemu. Babemeelesi bano baba: Babemeelesi be chikholo, babemeelesi be bipupu bibiakholelanga omwami, babemeelesi be banamae chielefu chimia, babemeelesi be kimiaandu, ne basoleeli bo mwami boosi, babemeelesi be lichipi, babaandu be kamaani ne banamae banyindaafu.

² Nio Daudi eema ebweeni wabwe mala ababoolela ali, “Balebe base ne babaandu base, ndekeeresie. Ndi ne enganakani eye khukhwombakha enju eye khuraamo Lisanduku lie Ndakaano ya Wele Omunyali Owa Bioosi nende niio ara bikele biewe. Narekekha liliombakha lie Lukaangu.

³Ne kakhali Wele anganisie khukiombakha. Sikila ese ndi omunamae lundi nachukha sifuki sikali.

⁴Ne kakhali Wele Omunyali Owa Bioosi, Wele owa Isiraeli andobora ese munju eya paapa khuba omwami khu Isiraeli mindali na mindali. Aarobora ekholo eya Yuda eane bubwimeelesi. Ne khukhwama munju eya Yuda arobora enju eya Paapa wase. Khukhwama mu be nju eyo yoosi basiimisibwa khu khumbukula ese, mala anjamiie mbe omwami khu Isiraeli yoosi.

⁵Wele Omunyali Owa Bioosi ambeelesia babaana basoleeli bakali. Ne khukhwama mu nibo aarobora Solomoni amiie Isiraeli mu bwami bwa Wele Omunyali Owa Bioosi.

⁶“Wele Omunyali Owa Bioosi amboolela ese ali, ‘Omusoleeli wowo Solomoni niye oliombakha Lukaangu lwase. Namuroboore abe nga omwana wase mala ese ndaba nga raraawe.

⁷Ndakhola bubwami bwewe buyindile mindali na mindali aaba ne achiililila khuria kamalaka kase nga ne alikho akhola luno.’

⁸“Nono luno ebweeni we Baisiraeli boosi ne baloleleele, libuusiana lia Wele Omunyali Owa Bioosi, ne mu moni cha Wele wefwe, liinda kamalaka ka Wele Omunyali Owa Bioosi, Wele wowo. Ne okhola orio enywe mucha khunyoola sibala silayi sino. Ne mulisilekhela chiselukho chichiicha khulwa mindali na mindali.”

⁹“Ne nawe Solomoni, mwana wase, manya Wele owa raraao ne khumukholela ne kumwoyo kwoosi ne lilienya sikila Wele Omunyali Owa Bioosi amanyile kimiooyo kiefwe kioosi lundi amanyile kamakhuwa kefwe koosi ne chinganakani chefwe choosi. Ne omuyiima ne omunyoola. Ne omuloba, alikhwanjukhila elala.

¹⁰Okhoya okhebulile oli Wele Omunyali Owa Bioosi akhurobore ewe khukhwombakha Lukaangu lwewe lutakatifu. Nono ba ne kamaani mala okhole orio.”

¹¹Nio Daudi aelesia Solomoni liiandike lie khukhwombakha Lukaangu, chinju che Lukaangu choosi ne chisiro che kamabiikhilo, ne chisiro che mukari ne chikorofa, ne lusiro lwe ndebe eye siisa.

¹²Akhaba lundi amuelesia liiandike lia buli siindu nilio aba nalio mu mebaasio kewe khulwe chimbia che enju eya Wele Omunyali Owa Bioosi, ne chisiro choosi chichachibotookhelela, kamabiikhilo ke enju eya Wele Omunyali Owa Bioosi ne kamabiikhilo ke biianwa bibiaulwa khu Wele Omunyali Owa Bioosi.

¹³Akhaba lundi Daudi akhola lirekekha lie bipupu bie ba basaayi ne Balawi khukhola kimilimo kiabwe kie Lukaangu. Ne khuliinda bibiindu bie lisaaya mu Lukaangu.

¹⁴Arekekha efwesa ne esahabu sikelo sisioola khurumikhwa mu khung'oona bibiindu bie mu Lukaangu.

¹⁵Daudi amwekesia busiro bwe esahabu niyo ang'oonela biteetwe bie chisahabu ne chitaa chabio ne biteetwe bie efwesa ne chitaa chabio. Amwekesia bino bioosi khuloondekhana ne buli kumulimo kwe siteetwe.

¹⁶Aamukholela lirekekha lie busiro bwe esahabu eya buli emesa eye kumukaati kumutakatifu nende buli esahabu eye chimesa che esahabu.

¹⁷Akhaba lundi arekekha sikelo sie esahabu yong'ene sisiola sinyala siarumikhwa khung'oona chiuma, bibuumba ne bikoombe, sikelo sia buli esahabu eye bibuumba ne efwesa eye bibuumba,

¹⁸ne esahabu enosie sikelo siina erumikhwa mu khung'oona alutare eye khukhwoseliakho bibiindu biiunya bulayi ne khung'oona likaari khulwe esahabu khulwe chikerubi chichabalaayanga chindaa chacho ne chifuunikha Lisanduku lie Ndakaano eya Wele Omunyali Owa Bioosi.

¹⁹Omwami Daudi aloma ali bibiindu bino bioosi naandika ne ndangirirwe ne Wele Omunyali Owa Bioosi. Aanjeeta khumanya buli siindu mu lirekekha lino.

²⁰Daudi aboolela omusoleeli wewe Solomoni ali, “Ba ne sinani ne bunyindaafu. Okharia tawe namwe okhafwa kumwoyo tawe. Sikila Wele Omunyali Owa Bioosi, Wele wase ali ne nawe. Se alakhukwisia namwe akhulekhe tawe khukhwola nga ne omala kimilimo kikienyekha khukhola khu nju eya Wele Omunyali Owa Bioosi.

²¹Bipupu bie basaayi ne Balawi berekekha khukhola kimilimo khu nju eya Wele Omunyali Owa Bioosi. Buli mundu oli ne bukesi bwe kumulimo kwosi kwosi enya khu khuyeeta ewe. Ne babaandu boosi ne babemeelesi babwe baliria lilaka liowo.”