Read lubukusu 1 Ke Ch. 29 Bible Online

1 Ke Ch. 29 - lubukusu bible

1 Ke Ch. 29

¹ Omwami Daudi aboolela libuusiana lie Baisiraeli ali, “Omwana wase Solomoni niye Wele arobora yeng'ene, asili omuele mala akhamanya kamakali tawe. Ne kimilimo kikienyekha kiekholekhe kili kimikali. Sikila lino se lili lichipi lie babaandu tawe ne kakhali luli Lukaangu lwa Wele Omunyali Owa Bioosi.

²Nakholile kamaani mu ngila choosi khurekekha bibiindu bioosi bibienyekha khulwe enju eya Wele wase nga naba ne nyala. Narekeekhe bino: Esahabu khulwe bibiindu bie esahabu, efwesa khulwe bibiindu bie efwesa, kumukasa khulwe bibiindu bie kumukasa, bichuuma khulwe bibiindu bie bichuuma, kimirongooro khulwe bibiindu bie kimirongooro, kamabaale ke khurona, kamabaale kang'enang'ena ne marimari.

³Khutasa khu biindu bino bioosi nibio mbanile khulwe enju eya Wele Omunyali Owa Bioosi ndikho ndasakho esahabu ne efwesa yase samwene. Ndikho khola ndio sikila khukhweaana khwase khu Wele. Bino nibio ndikho mbaana.

⁴Bitonyi bie esahabu chielefu chitaru, esahabu eyama Ofiri ne bitonyi bie efwesa yong'ene chielefu saba khulwe khurona lisiisi lie Lukaangu.

⁵Kimilimo kioosi nikio babaandu balakhola, naanile esahabu khulwe bibiindu bie esahabu ne efwesa khulwe bibiindu bie efwesa. Ne naanu owenya khukhweaana khulwe kimilimo kia Wele Omunyali Owa Bioosi kino?”

⁶Nono babemeelesi be banamae chielefu ne chimia ne babemeelesi be chikholo, babemeelesi be banamae chielefu ne chimia ne babemeelesi be kimilimo kia Wele Omunyali Owa Bioosi barusia biianwa bie khukhwerusia.

⁷Baana bibiindu bino khulwe kimilimo khu Lukaangu, bitonyi chielefu chiraano bie esahabu, bitonyi chielefu ekhumi bie efwesa, bitonyi chielefu ekhumi na munaane bie kumukasa ne bitonyi chielefu emia ndala bie sichuuma.

⁸Abo ba baaba ne kamabaale ke bukusi bakaana khu libiikhilo lie nju ya Wele Omunyali Owa Bioosi. Liemeelelwanga ne Yehieli owe lisaaye lia Kerishoni.

⁹Nio babaandu basangaala sikila babemeelesi baana khu Wele Omunyali Owa Bioosi ne lilienya liabwe, ne kimiooyo kiabwe kioosi. Akhaba omwami Daudi yesi asangaala lukali.

¹⁰Khwako ebweeni we libuusiana lie babaandu Daudi afumia Wele Omunyali Owa Bioosi ne aloma ali: “Khufumia ewe ee Wele Omunyali Owa Bioosi, Wele owa Isiraeli paapa wefwe mindali na mindali!

¹¹ Ee Wele Omunyali Owa Bioosi, owe bukali, bunyali ne luyali, owe lukoosi bukhili ne bubwami bili bibiowo. Buli sisiindu mwikulu ne khu sibala sili sisiowo. Bubwami buli bubwowo ee Wele Omunyali Owa Bioosi, Ewe oli angaaki khukhila boosi.

¹²Kimiaandu kioosi ne lukoosi biama khwiwe. Ewe wamiia khu buli siindu. Oli ne kamaani ne bunyali. Oli ne kamaani ke khukaliia babaandu ne khubaelesia kamaani.

¹³Khukhusiima Wele wefwe ne khufumia lisina liowo lie luyali.

¹⁴“Kakhaba kario babaandu base ne samwene, se khunyala ng'ali khwakhuelesia ewe sisiindu siosi tawe, sikila buli siindu siaama khwiwe. Efwe khwakobosie busa nisio wakhuelesia.

¹⁵Efwe khuli baakwa ne bakeni bauuyi bulayi bwene busa nga bakuuka befwe boosi. Ne chindaalo chefwe khu liloba chili busa nga sisiiniini ne lilieyikina mbamo.

¹⁶Ee, Wele Omunyali Owa Bioosi Wele wefwe, bibiindu bino bioosi khureerire khukhwombakha Lukaangu khulwe khukoosia lisina liowo litakatifu, bioosi biama khwiwe lundi bioosi bili bibiowo.

¹⁷Ese manyile Wele ndi ewe opiimaanga kumwoyo kwa buli mundu. Ewe osiimisibwa ne babaandu ne bakhola ng'ali. Mu bung'ali bwe kumwoyo kwase naanile bino bioosi ne lilienya liase khwise. Lundi naboone babaandu bowo babebuusiisie ano, ne baana ne busangaafu ne lilienya liabwe.

¹⁸Ee Wele Omunyali Owa Bioosi, oli Wele owe bakuuka befwe Aburahamu, Isaaka ne Yakobo. Chiililila khura liiba lino ne chinganakani chino mu miooyo kie babaandu bowo biise bioosi. Lundi bakhole babe ne lilienya lie khu khuria ewe.

¹⁹Khola omwana wase Solomoni arie kamalaka kowo ne kumwoyo kwewe kwoosi muyeete ombakhe Lukaangu nilwo ese nakholile lirekekha lialwo.”

²⁰Nio Daudi aboolela libuusiana lioosi ali, “Fumia Wele Omunyali Owa Bioosi, Wele wenywe!” Mala libuusiana lioosi liafumia Wele Omunyali Owa Bioosi, Wele owe bakuuka babwe. Ne benama asi mala basaaya Wele Omunyali Owa Bioosi ne khusikamila omwami.

²¹Baana chimbosio khu Wele Omunyali Owa Bioosi. Ne endaalo eyaloondakho baana biianwa bie khukhwosia khu Wele Omunyali Owa Bioosi. Biianwa bino biaba chiuunwa eelefu ndala, kamamiiku eelefu ndala ne kamameeme eelefu ndala. Lundi bareera biianwa bie khunywa ne chimbosio chingali khulwe Baisiraeli.

²²Nio endaalo eyo babaandu basangaala lukali nga ne balia ne khunywa mu moni cha Wele Omunyali Owa Bioosi. Nio bakhola Solomoni okhwa Daudi omwami lukhola khabili. Bamuchukhakho kamafura nga omwami wabwe Khulwa Wele Omunyali Owa Bioosi ne Satoki nga omusaayi wabwe.

²³ Nio Solomoni ekhala khu ndebe eya Wele Omunyali Owa Bioosi nga omwami mu bweyaangu bwa raraawe Daudi. Ayindila mala ekholo eya Isiraeli yoosi yamuria.

²⁴Babemeelesi boosi ne banamae boosi, ne akhaba basoleeli ba Daudi, basuubisia khuba bariani khu Solomoni nga omwami.

²⁵Wele Omunyali Owa Bioosi akhola ekholo yoosi yaria Solomoni. Mala aamukhola aaba ne luyali lukali khukhila omwami okundi yesi yesi owaba ne amiia Isiraeli.

²⁶Daudi okhwa Chesi amiia khu Isiraeli yoosi.

²⁷ Amiia khulwe kimiiko kamakhumi kane. Amiia ne ali mu Heburoni khulwe kimiiko saba ne ali mu Yerusalemu khulwe kimiiko kamakhumi kataru na kitaru.

²⁸Afwa ne asaakhuluwe. Afwa ne ali omuiinda ne lukoosi. Omwana wewe Solomoni amiia mu bweyaangu bwewe.

²⁹Nono bikholwa bio mwami Daudi bioosi biaandikwa mu bitabu bie chingano che bang'oosi bataru: Samweli, Nasani ne Kati.

³⁰Bitabu biboola nga ne amiia, bunyali siina nibwo aaba nabwo ne bibiindu bioosi bibiekholekha khu niye ne khu Isiraeli, ne bubwami bubwamubotookhelela.