Read lubukusu 1 Ke Ch. 5 Bible Online

1 Ke Ch. 5 - lubukusu bible

1 Ke Ch. 5

¹ Rubeni aaba omubele mu basoleeli ba Yakobo. Ne kakhali anuulwa kumukabwa kwe khuba omubele, sikila akona ne mukha raraawe niye raraawe aamenyia busa nga omusaale. Khwako kumukabwa kwewe kwaebwa khunju eya Yosefu okhwa Yakobo. Ne lisaaye lia Yakobo se liabalwa khuloondekhana ne kumukabwa kwe khusaalwa tawe.

² Akhaba ekholo eya Yuda ne yaba ne kamaani mu kholo cha Isiraeli chichiindi mala omwami amamo, ekholo eya Yosefu niyo eyaebwa kumukabwa kwe bubele.

³Rubeni omubele aaba ne basoleeli bane: Hanoki, Palu, Hesi ne Karimi.

⁴Lino nilio lisaaye lia Yoeli: Shemaya aba okhwa Yoeli, Koku aaba okhwa Shemaya, ne Simei aaba okhwa Koku.

⁵Mika aaba okhwa Simei, Reaya aba okhwa Mika, ne Baali aba okhwa Reaya.

⁶ Beera aba omwimeelesi owe luuya lwe Barubeni. Tikilati-pilineseri omwami owa Ashuru aamba Beera amuyila mu mbaambe.

⁷Kamasina ke bawandaaye ba Yoeli kaandikwa mu ngano che chinju chabwe. Kamasina niko kano: Yeieli aba owe khunyoa, Sakaria,

⁸Bela okhwa Asasi ne Asasi omwana owa Shema. Ne Shema omwana owa Yoeli. Ekholo yino yamenyanga mu Aroeri khukhwola Nebo ne Baali-meoni.

⁹Lundi bamenyanga ebukwe khukhwola khu siangalaamwe siili embi ne luluuchi lwa Efurati. Bamenya bario sikila chikhaafu chabwe chaba chingali mu sibala sia Kileati.

¹⁰Mu ndaalo cho mwami Saulo, ekholo eya Rubeni yebwaakala Bahachiri yabeerera mwiie mala yengisia sibala siabwe lubeka lwoosi lwe bukwe owa Kileati.

¹¹Babaana ba Kati bamenyanga embi ne Rubeni mu sibala sia Bashani khukhwola Saleka.

¹²Yoeli niye owaba omurangilisi ne Siafamu owe khabili. Yanai ne Siafati baba babemeelesi mu Bashani.

¹³Ne balebe babwe babaandi baba chinju saba chino: Mikaeli, Meshulamu, Sheba, Yorayi, Yakani, Sia ne Eberi.

¹⁴Baba lisaaye lia Abikaili. Abikaili aba okhwa Huri, Huri aba okhwa Yaroa, Yaroa aba okhwa Kileati, Kileati aba okhwa Mikaili, Mikaili aba okhwa Yesisayi, Yesisayi aba okhwa Yahito, ne Yahito aba okhwa Busi.

¹⁵Ahi aba okhwa Abutieli, Abutieli aba okhwa Kuni. Ahi aba omwimeelesi owe chinju chabwe.

¹⁶Bamenyanga mu sibala sia Bashani ne Kileati, mu ngoba ebweeneyo ne khu sibala sie kamayilwe sioosi sia Siaroni khukhwola khu njakha chasio.

¹⁷Kamasina kano kaandikwa mu ndaalo cho mwami Yosamu owa Yuda nende cho mwami Yeroboamu owa Isiraeli.

¹⁸Mu kholo cha Rubeni, Kati ne balala khu kholo eya Manase babayo banamae chielefu kamakhumi kane ne chielefu chine ne chimia saba ne kamakhumi sita, babekisibwa khurumikhira chingabo, chimbalu ne buyiingo lundi baba berekekha khu milimo.

¹⁹Bebwaakala chikholo che Bahachiri Bayeturi, Banafishi ne Banodabu.

²⁰Basaba Wele mala bamureeba abayeete. Ne Wele akobosia lisaba liabwe mala abakhola baula bahachiri nende babaambana ne nabo.

²¹Baula basiku babwe, chingamia chielefu kamakhumi karaano, kamakheese chielefu chimia chibili ne chielefu kamakhumi karaano ne chipunda chielefu chibili, baamba baboe be mwiie chielefu emia ndala.

²²Beera basiku bakali, sikila Wele niye owabapanila. Nio bachiililila khumenya mu sibala esio khukhwola khu siise sie mbaambe eye Bababiloni.

²³Babaandu balala khu kholo eya Manase bamenya mu sibala sia Bashani. Bamenya khukhwola Baali-Herimoni, Seniri ne e sikulu sia Herimoni mala bakucha baba bakali lukali.

²⁴Bano baba babemeelesi be chinju chabwe: Eferi, Ishi, Elieli, Asirieli, Yeremia, Hotabia ne Yahitieli. Boosi baba banamae be kamaani babamanyikha nga babemeelesi be chinju chabwe.

²⁵Ne babaandu baba barengu khu Wele we bakuka babwe bamwanjukha. Ne barakikha khusaaya bawele be chikholo nicho Wele aba ne abunia ebweeni wabwe.

²⁶ Nio Wele akhola Puli omwami owe Bashamu, no mwami Tikilati-pilineseri owe Bashamu, enya khucha mwiie. Puli abukula chikholo cha Rubeni, Kati, ne balala khu be kholo eya Manase mala abengisia mu Hala, Habori, ne Hara ne khu luuchi lwa Kosani khukhwola luno.