Read lubukusu 2 Ke Ch. 1 Bible Online

2 Ke Ch. 1 - lubukusu bible

2 Ke Ch. 1

¹Solomoni okhwa Daudi eyombakha mu bwami bwewe. Akhola ario sikila Wele Omunyali Owa Bioosi aaba ne naye mala amukhola aaba omwami omukali lukali.

²Solomoni alomaloma khu Baisiraeli boosi, khu bemeelesi be bipupu bie banamae chimia, ne chielefu. Lundi alomaloma khu bakhalaki, ne khu bemeelesi boosi mu Isiraeli yoosi, ne babemeelesi be chinju.

³Nono Solomoni ne libuusiana lie babaandu boosi nibo aba ne nabo bacha abuundu aesuta aaba mu lukoba lwa Kibeoni. Bachayo sikila liiema lie kumuse lia Wele, nilio Musa omukholi owa Wele Omunyali Owa Bioosi ombakha mu sichiimi liabayo.

⁴ (Daudi aaba areera Lisanduku lie ndakaano eya Wele khukhwama e Kiriati-Yearimu, alireera abuundu niio alirekekhera. Aaba alisimikhila liiema mu Yerusalemu.)

⁵ Khutasa khwako Alutare eye kumukasa niio Besaleli okhwa Uri omwichukhulu owa Huri, aba akhola, yaba mu Kibeoni ebweeni we Liiema lia Wele Omunyali Owa Bioosi. Solomoni ne libuusiana lie babaandu besaaya Wele Omunyali Owa Bioosi.

⁶Solomoni aniina e alutare eye kumukasa ebweeni wa Wele Omunyali Owa Bioosi eyaba a liiema lie kumuse, mala aana biianwa eelefu bie khukhwosia khu bwene okhwo.

⁷Silo esio Wele abonekhela Solomoni mala amuboolela ali; “Saba nisio wenya khuelesie.”

⁸Solomoni akobosia Wele ali, “Ewe waba ne busiime bukali lundi buchiililila busa khu paapa wase Daudi, mala wakholile ese nabeele omwami mu bweyaangu bwewe.

⁹ Ee Wele Omunyali Owa Bioosi, lekha lisuubisia liowo khu paapa wase Daudi lichusibwe. Ewe wakholile ese nabeele omwami owe babaandu bakhabalikha tawe.

¹⁰Nono mbelesie bukesi ne limanya; nio nimeelele babaandu bano bulayi. Sikila se aliio onyala abamiia ewe ne okhamuyeetile tawe.”

¹¹Wele akobosia Solomoni ali, “Lino liaba mu mwoyo kwowo ne se wasabile buiinda namwe kimiaandu, namwe lukoosi tawe. Ne lundi se wasabile lifwa lie basiku bowo namwe limenya lileeyi tawe. Ne kakhali wasabile bukesi ne limanya nio wimeelele babaandu base khu nibo ese nakhukholile ewe khuba omwami.

¹²Khwako ese nakhuelesie ewe bukesi ne limanya. Ndikhuelesia akhaba buiinda, kimiaandu ne lukoosi khukhila omwami yesi yesi owabao ewe ne okhabao tawe. Ne se alibao okundi enyuma wowo oliba nabio nga ewe tawe.”

¹³Nio Solomoni aarekukha aarura abuundu aesuta ebweeni we liiema lie kumuse e Kibeoni mala akobola e Yerusalemu. Amiia Isiraeli.

¹⁴ Solomoni aabuusia alala kamakaari ke mwiie eelefu ndala ne chimia chine ne chifarasi chielefu ekhumi ne chibili. Achiyila mu ngoba che kamakaari ke liie, ne chichiindi aaba nacho mu Yerusalemu.

¹⁵Solomoni aakhola efwesa ne esahabu biasala busa nga kamabaale mu Yerusalemu, ne kimirongooro kimitarakwa kiaba kimikali nga kimikhuyu kia Shefela.

¹⁶ Solomoni akula chifarasi khukhwama Misiri ne khukhwama Kue. Baboofuli bo mwami bachikula khukhwama Kue.

¹⁷Bakula buli likaari lie liie khukhwama e Misiri khulwe bukusi bwe bitonyi bie efwesa chimia sita ne buli farasi khu bitonyi bie fwesa emia ndala ne kamakhumi karaano. Khubirira khu boofuli bano kamakaari ke liie ne chifarasi biakusibwa khu baami boosi be Bahiti ne babaami be Bashamu.