Read lubukusu 2 Ke Ch. 10 Bible Online

2 Ke Ch. 10 - lubukusu bible

2 Ke Ch. 10

¹Rehoboamu aacha e Shekemu, niio babaandu boosi ba Isiraeli baba ne babuusiisie khu mwamiia.

²Ne nga Yeroboamu okhwa Nebati aulila (aaba amulila e Misiri, khukhwilukha omwami Solomoni) kamakhuwa kano, aakobola khukhwama e Misiri.

³Babaandu bamulaanga; ne Yeroboamu ne Baisiraeli boosi alala bacha khu Rehoboamu. Baboolela Rehoboamu bali,

⁴“Raraao Solomoni akhukhosia efwe kimilimo kimiaandalafu. Nono yanguya busiro bwe kimilimo kia raraao ne efwe khulaba bakholi bowo.”

⁵Abakobosia ali, “Kobola enyuma we chindaalo chitaru.” Khwako babaandu barekukha.

⁶Nio omwami Rehoboamu areeba basaakhulu ba baaba bakeleki ba raraawe Solomoni ali, “Enywe mungelekela ngobosie babaandu bano ndiena?”

⁷Bamukobosia bali, “Wekesia kumwoyo kumulayi khu baandu mala obasiimisie, lundi obaboolele kamakhuwa kamalayi, bakhabe bakholi bowo buli lwosi.”

⁸Ne kakhali Rehoboamu alekelesia likeleka lie basaakhulu, mala aacha khu baele eselukho yewe, mala ba baba bakeleki bewe biise ebio.

⁹Abareeba ali, “Enywe mungelekela khukobosie khuriena babaandu babandeebire bali mbanguisilie busiro bwabwe nibwo paapa wase abarakho?”

¹⁰Baele abo bamukobosia bali, “lino nilio olaboolela babaandu bano: ‘Lulwala lwase lwasobi luli luboofu khukhila munda mwa paapa owase.

¹¹Paapa owase amutiuukha busiro bukali, ese ndamutasa busiro khukhilakho. Amupila kimikhomwa, ne ese nja khumupila siboko sie fubu.’ ”

¹²Khwako Yeroboamu ne babaandu boosi bakobola khu mwami Rehoboamu endaalo ekhola khataru nga ne abalaka.

¹³Omwami akobosia babaandu ne burafu bukali. Alekelesia likeleka lie basaakhulu nilio bamuboolela.

¹⁴Aaboolela babaandu khuloondekhana ne likeleka lie baele. Aloma ali, “Paapa owase amutiuukha busiro ne ese ndabutasa khukhilakho. Amupila kimikhomwa, ne ese nja khumupila siboko sie fubu.”

¹⁵Omwami se arekeeresia babaandu tawe. Wele Omunyali Owa Bioosi niye owakhola kaba kario nio echusie likhuwa liewe nilio aloma khubirira khu Ahiya omushilo khu Yeroboamu okhwa Nebati.

¹⁶ Ne nga Baisiraeli boosi babona omwami alobile khubarekeeresia, bakobosia omwami bali, “Efwe khuli na mukabwa siina munju eya Daudi? Se khuli ne kumukabwa mu okhwa Chesi tawe. Kobola mu maeema kenywe, ee Isiraeli! Liinda enju yowo wamwene Daudi.” Nio Baisiraeli bakobola mu maeema kabwe.

¹⁷Ne kakhali Rehoboamu amiia khu baandu Baisiraeli ba baamenya mu ngoba cha Yuda.

¹⁸Nio Omwami Rehoboamu aruma Hadoramu, owaba omwimeelesi owe kimilimo kie khuyingililwa, khucha khu Baisiraeli. Ne Baisiraeli bamupa kamabaale bamwiira. Ne Rehoboamu akhola khangu aniina mu likaari liewe lie liie mala elukha acha e Yerusalemu.

¹⁹Khukhwamila khu siise esio, Baisiraeli balobela elala enju eya Daudi khukhwola luno.