Read lubukusu 2 Ke Ch. 11 Bible Online

2 Ke Ch. 11 - lubukusu bible

2 Ke Ch. 11

¹Nga Rehoboamu ne ola mu Yerusalemu, alaanga alala babaandu boosi ba Yuda ne ekholo eya Benjamini. Baba babaandu chielefu emia ndala ne kamakhumi munaane, banamae barobore khukhupana ne Baisiraeli. Benya khukhupana bakobosie bubwami khu Rehoboamu.

²Ne kakhali elomo eya Wele yecha khu mung'oosi Shemaya eli,

³“Boolela Rehoboamu okhwa Solomoni, omwami owa Yuda ne Baisiraeli boosi bali mu Yuda ne mu Benjamini kano:

⁴‘Wele Omunyali Owa Bioosi aloma ali, se okhoya wacha wapana ne balebe bowo tawe. Buli mundu akobole engo wewe. Sikila likhuwa lino liamile khwise.’ ” Nio boosi baria elomo eya Wele Omunyali Owa Bioosi mala bakobola engo. Ne se bacha bapana ne Yeroboamu tawe.

⁵Rehoboamu amenya mu Yerusalemu mala ombakha chingoba che khukhweliinda busiku mu Yuda.

⁶Ombakha Betelehemu, Etamu, Tekoa,

⁷Beti-suri, Soko, Atulamu,

⁸Katihi, Maresha, Sifu,

⁹Atoraimu, Lakishi, Aseka,

¹⁰Sora, Aiyaloni ne Heburoni. Chingoba chino chichakarwa ne lisiisi; chili mu Yuda ne Benjamini.

¹¹Aakhola buliindi bwe chingoba bwaba bwe kamaani mala aaramo banamae bakhulu. Aramo ne chinju che siakhulia, kamafura ne endali.

¹²Ne aara chingabo ne kamafumo mu ngoba choosi, mala aachikhola chaba che kamaani. Nio chikholo cha Yuda ne Benjamini charama asi we bunyali bwewe.

¹³Ne basaayi ne Balawi ba baaba mu Isiraeli mwoosi becha baba lubeka lwa Rehoboamu.

¹⁴Balawi banjukha kamayilwe kabwe ne kimiaandu mala becha mu Yuda ne Yerusalemu sikila Yeroboamu ne basoleeli bewe babakhiingilila khukhola kimilimo kiabwe nga basaayi ba Wele Omunyali Owa Bioosi.

¹⁵ Ne Yeroboamu arobora basaayi babeewe omwene khulwe abuundu aesuta, ne bifwaani bie chimbusi ne chikhaafu nibio omwene akhola.

¹⁶Ne abo ba baaba ne kimiooyo kie khusaaya Wele Omunyali Owa Bioosi, Wele owa Isiraeli, babaloonda khu Basaayi ne Balawi, khukhwama mu kholo choosi che Baisiraeli. Becha Yerusalemu khuana embosio khu Wele Omunyali Owa Bioosi, Wele owe bakuuka babwe.

¹⁷Baakhola bubwami bwa Yuda bwaba bwe kamaani, ne khulwe kimiiko kitaru bayeeta Rehoboamu okhwa Solomoni aaba ne buliindi bulayi, sikila khulwe kimiiko kitaru bamenya nga yaba ne bamenya asi owa Daudi ne Solomoni.

¹⁸Rehoboamu aareera omukhasi bali Mahalati omwichukhulu owa Daudi omukhaana owa Yeremoti. Maayi owa Mahalati aba Abihaili omukhaana owa Eliabu okhwa Chesi.

¹⁹Ne asaalila Rehoboamu basoleeli bataru: Yeushi, Shemaria ne Sahamu.

²⁰Enyuma wa Mahalati areera Maaka omukhaana owa Abusolomu. Maaka amusaalila Abicha, Atai, Sisa ne Shelomiti.

²¹Rehoboamu asiima Maaka omukhaana owa Abusolomu khukhila bakhasi bewe boosi ne bakhasi bewe nibo aamenyia busa nga basaale. Akhwa bakhasi ekhumi ne munaane, ne nibo aamenyia busa nga basaale baba kamakhumi sita. Aaba ne basoleeli kamakhumi kabili na munaane ne bakhaana kamakhumi sita.

²²Ne Rehoboamu arobora Abicha omusoleeli owa Maaka aba omwimeelesi omukhulu mu bawandaaye; sikila ebaasia khumwamiia abe omwami.

²³Ne Rehoboamu aakhola mu bukesi, ayila balala khu basoleeli bewe khu milimo mu birekere bia Yuda bioosi ne sia Benjamini, mu ngoba che kamasiisi. Abaelesia kimiaandu kimikali mala abakhwela bakhasi bakali.