Read lubukusu 2 Ke Ch. 12 Bible Online

2 Ke Ch. 12 - lubukusu bible

2 Ke Ch. 12

¹Nga khukhwamiia khwa Rehoboamu nga khwaandalala mala kwaba ne kamaani, aanjukha lilaka lia Wele Omunyali Owa Bioosi; niye ne Baisiraeli boosi.

²Shishaki, omwami owa Misiri echa khukhwibwaakala Yerusalemu, sikila Rehoboamu ne Isiraeli se baria Wele Omunyali Owa Bioosi tawe. Shishaki eecha mu mwiiko kukhola kharaano kwe bubwami bwa Rehoboamu.

³Eecha ne kamakaari ke liie eelefu ndala ne chimia chibili ne banamae batimia chifarasi chielefu kamakhumi sita. Ne babaandu nibo eecha ne nabo khukhwama Misiri baba se babalikha tawe. Baba khukhwama Libia, Basukimu ne Baesopia.

⁴Ne Shishaki aamba chingoba chisire cha Yuda mala eecha ola Yerusalemu.

⁵Nio Omung'oosi Shemaya eecha khu Rehoboamu ne khu bemeelesi ba Yuda ba baaba ne babuusiisie e Yerusalemu. Baba babuusiisie sikila Shishaki. Shemaya ababoolela ali, “Wele Omunyali Owa Bioosi aboola ali, ‘Enywe mwanjanjukha nio ese namulekhile mu makhono ka Shishaki.’ ”

⁶Nio babemeelesi be Baisiraeli ne omwami wabwe beboombia mala baboola bali, “Wele Omunyali Owa Bioosi ali omuluungi.”

⁷Nga Wele Omunyali Owa Bioosi ne abona ali beboombiisie, aboolela Shemaya ali, “Beboombiisie. Se ndabonaka tawe. Ndabaelesiakho buonia butiiti buri. Ne burafu bwase se bulapwomookha khu Yerusalemu khubirira khu Shishaki tawe.

⁸Ne kakhaba kario, balaba bakholi bewe, nio boole khumanya bubwabukhani bwe khu khukholela ese ne khukholela bubwami bwe bibala bibiindi.”

⁹ Nono Shishaki omwami owa Misiri eecha ebwaakala Yerusalemu. Abukula bibiindu bie mu mabiikhilo ke mu Lukaangu lwa Wele Omunyali Owa Bioosi, ne bie mu mabiikhilo ke munju eyo mwami. Abukula buli siindu acha nasio. Akhaba lundi abukula chingabo che sahabu nicho Solomoni aba ne akhola.

¹⁰Ne Omwami Rehoboamu akhola chingabo che kumukasa mu bweyaangu bwe echo mala achielesia banamae bakhulu baliindi babaliinda kumuliango kwe enju eyo mwami.

¹¹Buli lwoosi nga omwami achichanga mu nju ya Wele Omunyali Owa Bioosi, banamae baliindi bechanga babukula chingabo echo bacha nacho mala bachikobosia mu lusiro lwe buliindi.

¹²Ne sikila omwami eboombia, burafu bwa Wele Omunyali Owa Bioosi bwawa, nio khubabunia elala tawe, ne limenya liaba lilayi mu Yuda.

¹³Nio omwami Rehoboamu aandalasia bubwami bwewe mu Yerusalemu mala amiia. Rehoboamu aaba ne bukhulu bwe kimiiko kamakhumi kane na mulala nga ne arakikha khukhwamiia. Amiia kimiiko ekhumi na saba ne ali mu Yerusalemu. Lukoba olwo lwaba nilwo Wele Omunyali Owa Bioosi arobora mu kholo che Baisiraeli choosi khuba abuundu e khusaayilao. Lisina lia maawe liaba Nahama Omuamoni.

¹⁴Mala akhola bumayaanu, sikila mu mwoyo kwewe se aenja Wele Omunyali Owa Bioosi tawe.

¹⁵Nono bikholwa bia Rehoboamu khukhwama mu khunyoa khukhwola ematabusia biaandikwa mu sitabu sie chingano cho omung'oosi Shemaya ne Ito owe kamalola. Liabao liie liliachiililila busa akari wa Rehoboamu ne Yeroboamu.

¹⁶Rehoboamu aafwa mala asiikhwa mu Lukoba lwa Daudi. Abicha omusoleeli wewe amiia mu bweyaangu bwewe.