Read lubukusu 2 Ke Ch. 13 Bible Online

2 Ke Ch. 13 - lubukusu bible

2 Ke Ch. 13

¹Mu mwiiko kwe ekhumi na munaane kwe khukhwamiia khwo mwami Yeroboamu Abicha aarakikha khukhwamiia khu Yuda.

²Amiia kimiiko kitaru mu Yerusalemu. Maayi wewe aaba bali Mikaya omukhaana owa Urieli khukhwama Kibea. Nono liabao liie akari wa Abicha ne Yeroboamu.

³Abicha arura aacha mwiie ne ali ne banamae barobore barana chielefu chimia chine ne Yeroboamu eecha ne banamae chielefu chimia munaane barana be kamaani.

⁴Nio Abicha eema khu Sikulu sie Semaraimu, sili mu sibala sie bikulu sia Efuraimu mala aboola ali, “Ndekeeresie, Ee, Yeroboamu ne Baisiraeli mweesi!

⁵Enywe se mumanyile muli Wele Omunyali Owa Bioosi, Wele owa Isiraeli aelesia Daudi ne basoleeli bewe bubwami khu Isiraeli bwa mindali khulwe ndakaano eye chumbe tawe ku?

⁶Ne kakhali Yeroboamu okhwa Nebati, omukholi owa Solomoni okhwa Daudi, enyokha mala aloba ko mwami wewe.

⁷Ne abuusia babaandu balala be sipoli busa mala bakhola sileka khu Rehoboamu okhwa Solomoni. Rehoboamu aaba asili omwana, ne se aaba ne limanya lie khubakhiingilila tawe.

⁸Ne luno mwibaasia khukhiingilila bubwami bwa Wele Omunyali Owa Bioosi buli mu bunyali bwe basoleeli ba Daudi. Mulikho mukhola murio sikila muli ne banamae bakali lukali ne oli ne bifwaani bie chimoosi bie esahabu nibio Yeroboamu amukholela bibe wele benywe.

⁹Enywe se mwaoona basaayi ba Wele Omunyali Owa Bioosi, bakhwa Aruni ne Balawi mala mwakholile basaayi babenywe nga babaandu be bibala bibiindi? Yesi yesi owicha khu khwekwalaasia ne euunwa endiiti namwe ne kamamiiku saba aba omusaayi owe ebio biikhali wele tawe.

¹⁰Ne khwifwe, Wele Omunyali Owa Bioosi ali Wele wefwe. Efwe se khwamwanjukha tawe. Efwe khuli ne basaayi bakholelanga Wele Omunyali Owa Bioosi kimilimo, bakhwa Aruni ne Balawi khulwe kimilimo kiabwe.

¹¹Baananga khu Wele Omunyali Owa Bioosi buli kumutikhinyi ne ekolooba biianwa bie khukhwosia ne bimuli biiunya kumuya kulayi. Barechenga kumukaati kwe siianwa khu mesa eye esahabu yong'ene. Lundi baliinda biteetwe bie esahabu nio chitaa chabwe chole khuburukha buli ekolooba. Khukholanga khurio sikila efwe khuliindanga niko Wele Omunyali Owa Bioosi Wele wefwe akhulaka khukhole ne enywe mwamwanjukha.

¹²Lola, Wele ali ne nafwe akhuraangirire, ne basaayi bewe bali ne chikhoombi che liie khukhupa khulwe khulaangilila liie khwinywe. Ee, baana ba Isiraeli, enywe mukhapana ne Wele Omunyali Owa Bioosi owe bakuuka benywe tawe. Se munyala mwaula tawe.”

¹³Yeroboamu aba arumire banamae babebuulile khukhwama enyuma. Nono banamae bewe baba ebweeni wa Yuda ne babaandi bebuulile khukhwama enyuma.

¹⁴Ne nga Bayuda balola, liie liaba ebweeni wabwe ne enyuma mala balilila Wele Omunyali Owa Bioosi ne basaayi baapa chikhoombi.

¹⁵Nio Bayuda bayokela liyoka lie liie. Ne nga Bayuda bayokela, Wele akhila Yeroboamu ne Baisiraeli boosi ba baba ebweeni wa Abicha, ne Bayuda.

¹⁶Baisiraeli belukha Bayuda mala Wele aara Baisiraeli mu bunyali bwe Bayuda.

¹⁷Abicha ne babaandu bewe beera babaandu bakali. Nono Baisiraeli bafwa babaandu chielefu chimia chiraano barobore.

¹⁸Khwako Baisiraeli bakhilwa mu siise esio mala Bayuda babakhila lukali, sikila beyikina Wele Omunyali Owa Bioosi, Wele owe bakuuka babwe.

¹⁹Ne Abicha atimania Yeroboamu mala amubukulakho chingoba cha Beteli ne birekere bialwo ne Yeshana ne birekere bialwo ne Efroni ne birekere bialwo.

²⁰Yeroboamu se anyoola lundi kamaani mu ndaalo cha Abicha tawe, mala Wele Omunyali Owa Bioosi amupa afwa.

²¹Ne kakhali Abicha anyoola kamaani. Ne akhwa bakhasi ekhumi ne bane mala aba ne basoleeli kamakhumi kabili ne babili ne bakhaana ekhumi na sita.

²²Bikholwa bia Abicha bibiindi bioosi, limenya liewe ne kiminayi kiewe biaandikwa mu lukano lwo mung'oosi Ido.