Read lubukusu 2 Ke Ch. 15 Bible Online

2 Ke Ch. 15 - lubukusu bible

2 Ke Ch. 15

¹Roho owa Wele eecha khu Asaria okhwa Oteti

²Oteti arura aacha khukhwakaanana ne Asa mala amuboolela ali, “Ndekeeresie Asa ne Bayuda ne Babenjamini mweesi: Wele Omunyali Owa Bioosi ali ne nanywe, enywe ne muli naye. Mwaba ne mumuyiima mulamunyoola. Ne mwaba ne mumwanjukha alamwanjukha.

³Khulwe siise sileeyi, Isiraeli se yaba ne Wele owa ng'ali tawe. Lundi se yaba ne omusaayi owekesia tawe. Lundi se yaba ne kamalaka tawe.

⁴Ne kakhali, mu butinyu bwabwe bakobolelamo Wele Omunyali Owa Bioosi, Wele owa Isiraeli. Bamuyiima bamunyoola.

⁵Mu biise ebio kumuleembe se kwabao khuyo orura namwe khuyo owingila tawe; sikila butinyu bukali bwanaania bamenywa boosi mu bibala.

⁶Liabao libuna buli abuundu. Sibala siebwaakala sibala, ne lukoba lwebwaakala lukoba. Sikila Wele abanaania ne butinyu buli lukano.

⁷Ne kakhali enywe mube banyindaafu. Mukhalua tawe sikila mukhanyoole kumuruuru.”

⁸Nga Asa ne aulila kamakhuwa kano, bung'oosi bwa Asaria okhwa Oteti, anyoola kamaani mala arusiao bifwaani bisinyisia bibiarura mu sibala sia Yuda ne Benjamini. Aarusia bifwaani ebio lundi, khukhwama mu ngoba nicho aaba naambile mu sibala sie bikulu sia Efuraimu. Mala ang'oona alutare eya Wele Omunyali Owa Bioosi eyaba ebweeni we luuya lwe nju ya Wele Omunyali Owa Bioosi.

⁹Ne abuusia alala Yuda ne Benjamini boosi ne babaandi khukhwama mu kholo cha Efuraimu ne Manase ne Simioni ba baaba baakwa mu nibo. Bakali bamwichakho khukhwama mu Isiraeli sikila babona bali Wele Omunyali Owa Bioosi aba ne naye.

¹⁰Bebuusia e Yerualemu mu mwesi kwa khataru kwe kumwiiko kwe ekhumi ne kiraano kie bubwami bwa Asa.

¹¹Baana embosio khu Wele Omunyali Owa Bioosi khu ndaalo eyo khukhwama mu biindu nibio baba ne bayaayile bareera: Chikhaafu chimia saba ne kamakheese chielefu saba.

¹²Bakhola endakaano eye khusaaya Wele Omunyali Owa Bioosi, Wele owe bakuuka babwe ne kumwoyo kwabwe kwoosi, ne liiba liabwe lioosi.

¹³Ne yesi yesi okhasaaya Wele Omunyali Owa Bioosi, Wele owa Isiraeli tawe, enyekhana erwe; akhaba ne ali omuele namwe omusaakhulu, owe siseecha namwe owe siikhasi.

¹⁴Bechuba khu Wele Omunyali Owa Bioosi ne kumumilo kwe angaaki ne liyokela ne khu khuupa chitarumbeta ne chikhoombi.

¹⁵Ne Bayuda boosi bekhoyela liliechuba sikila baba bechuba ne kumwoyo kwabwe kwosi. Ne lundi basaaya Wele Omunyali Owa Bioosi ne liliekoomba liabwe lioosi mala bamunyoola. Ne Wele Omunyali Owa Bioosi aabaelesia kumuleembe chimbeka choosi.

¹⁶Omwami Asa aarusiao akhaba Maaka, maawe mu khuba maayi ooli Kwini. Sikila aaba akhola sifwaani sisinyisia sia wele Ashera. Asa areema sifwaani sia Maaka, asitonya asiosela akheechi kha Kiduroni.

¹⁷Ne kakhali abuundu aesuta se arusibwao mu Isiraeli tawe. Ne kakhaba kario, kumwoyo kwa Asa se kwabamo buubi bwosi bwosi bwe khubiiywakho tawe, mu bulamu bwewe bwoosi.

¹⁸Ne areera mu nju eya Wele biianwa nibio raraawe aaba ne aana khu Wele ne nibio niye omwene yesi aaba ne aanile khu Wele. Aareera efwesa, esahabu ne bibuumba.

¹⁹Ne liie se liabao lundi tawe khukhwola khu mwiiko kwe kamakhumi kataru na kiraano kwe bubwami bwa Asa.