Read lubukusu 2 Ke Ch. 16 Bible Online

2 Ke Ch. 16 - lubukusu bible

2 Ke Ch. 16

¹Mu mwiiko kukhola kamakhumi kataru ne sita kwe bubwami bwa Asa, Omwami Baasha owa Isiraeli ebwaakala Yuda. Ombakha Rama, nio akhiingilile omundu yesi yesi khurura namwe khukhwingila mu Yuda.

²Nio Asa abukula efwesa ne esahabu khukhwama mu mabiikhilo ke nju eya Wele Omunyali Owa Bioosi ne khukhwama mwichipi lio omwami. Nio aachirumira Beni-hadadi omwami owa Shamu owamenyanga mu Damasika.

³Asa amuboolela ali, “Lekha ese ne nawe khukhole endakaano akari wefwe nga eyaba akari wa paapa wase ne paapa wowo. Nakhurumire ewe efwesa ne esahabu; cha ofunake endakaano yowo ne Baasha omwami owa Isiraeli mala andurekho.”

⁴Ne Beni-hadadi afukiilila ko omwami Asa mala aruma banamae babemeelesi be banamae bewe bebwaakale chingoba cha Isiraeli. Baula Iyoni, Dani, Abeli-maimu, ne chingoba che kamabiikhilo cha Nafutali choosi.

⁵Ne nga Baasha ne aulila kano alekha khukhwombakha Rama mala kimilimo kiewe kiakama.

⁶Nio Omwami Asa abukula Bayuda boosi mala basuta kamabaale ka Rama koosi ne chimbao chalwo. Bino nibio Baasha aba ne alikho ombakhila. Ne Asa acha ombakhila kamabaale ako ne chimbao echo chingoba cha Keba ne Misipa.

⁷Mu siise esio owe kamalola Hanani eecha khu mwami Asa owa Yuda. Aamuboolela ali, “Sikila ewe weyikina omwami owa Shamu ne se weyikina Wele Omunyali Owa Bioosi, Wele wowo tawe, banamae ba Shamu bakhwifubarure.

⁸Baesopia ne Balibia se baba banamae bakali lukali ne kamakaari ke kamae kamakali ne batimia chifarasi tawe ku? Ne kakhali sikila weyikina Wele Omunyali Owa Bioosi, abara mu bunyali bwowo.

⁹Chimoni cha Wele Omunyali Owa Bioosi chibonanga buli abuundu mu sibala sioosi. Chikholanga chirio, khukhwekesia kamaani kewe khulwa abo nibo kumwoyo kwabwe kuli kumuluungi khu niye. Ewe wakholile kano mu busilu, sikila khukhwama luno khuchiililila olaba ne liie.”

¹⁰Nio Asa aaba omurafu khu we kamalola, mala amuboa kiminyololo mu siboe sikila amuambila lirima khu lino. Ne mu siise esio sisiene Asa apia sibi babaandu balala lukali.

¹¹Bikholwa bia Asa khukhwama khu sie khunyoa khukhwola khu simaliilisi biaandikwa mu sitabu sie Babaami ba Yuda ne Isiraeli.

¹²Mu mwiiko kukhola kamakhumi kataru na tisa kwe khukhwamiia khwewe, Asa aaba ne bulwaale bwe bikele. Ne bulwaale bwewe bwachiililila khuba bubi. Kakhaba kario mu bulwaale bwewe se ayiima Wele Omunyali Owa Bioosi tawe, ne kakhali aayiima buyeeti khukhwama khu basilikhi.

¹³Nio Asa aafwa mu mwiiko kukhola kamakhumi kane ne mulala kwe khukhwamiia khwewe.

¹⁴Bamusiikha mu ng'ani niyo omwene ekholela mu Lukoba lwa Daudi. Bamwalisia khu sitanda nisio baba ne bechusiekho biiunya kumuuya kumulayi bie chingano chichabukhaane. Biakholwa ne bafundi bang'oona kamafura kaunya bulayi. Babwana kumulilo kumukali khulwe lukoosi lwewe.