Read lubukusu 2 Ke Ch. 18 Bible Online

2 Ke Ch. 18 - lubukusu bible

2 Ke Ch. 18

¹Nga Yehoshafati aaba ne kimiaandu kimikali ne lukoosi. Akhola liambaana ne Ahabu khulwe khukhwana.

²Enyuma we kimiiko, Yehoshafati ekha akeniia Ahabu mu Samaria. Ahabu amwirira kamakheese kamakali ne chikhaafu niye ne babaandu ba baaba ne naye. Ahabu amuombelesia bache bebwaakale lukoba lwa Ramoti-kileati.

³Ahabu omwami owa Isiraeli areeba Yehoshafati omwami owa Yuda ali, “Khulacha fwembi e Ramoti-kileati?” Yehoshafati amukobosia ali, “Ese ndi nga ewe, babaandu base bali nga babowo. Khulaba ne nawe mwiie.”

⁴Ne kakhali Yehoshafati aboolela omwami owa Isiraeli ali, “Nyoa oreebe Wele Omunyali Owa Bioosi nio.”

⁵Nio omwami Ahabu alaanga bang'oosi alala, embi chimia chine mala abareeba ali, “Nje nibwaakale Ramoti-kileati namwe tawe?” Bamukobosia bali, “Cha osibwaakale, sikila Wele Omunyali Owa Bioosi alakhua bukhili.”

⁶Ne kakhali Yehoshafati areeba ali, “Omung'oosi se alikhoo ano okundi niye khunyala khwabirirakho khwareeba Wele Omunyali Owa Bioosi tawe?”

⁷Ahabu amukobosia ali, “Aliio mulala oramire, niye khunyala khwareebakho Wele Omunyali Owa Bioosi, bali Mikaya okhwa Imura. Ne kakhali ese namubiila, sikila se ang'oolelangakho kamalayi tawe, ne bukhali bubi bwong'ene.” Yehoshafati amukobosia ali, “Omwami okhaloma orio tawe.”

⁸Nio Ahabu alaanga mulala khu bemeelesi be lichipi lio mwami mala amuboolela ali, “Ndeerere khangu Mikaya okhwa Imura.”

⁹Nono Yehoshafati omwami owa Yuda ne Ahabu omwami owa Isiraeli baba bekhaale khu ndebe chabwe che bubwami. Lundi baba befwarire chingubo chabwe che bubwami. Baba bekhaale abuundu niio bauulilanga, a silibwa sia Samaria. Ne bang'oosi boosi baba balikho bang'oola ebweeni waabwe.

¹⁰Ne Sedekia okhwa Kenaana, mulala khu nibo, akhola chinjika che bichuuma mala aloma ali, “Wele Omunyali Owa Bioosi aloma ali, ‘Ne chinjika chino olapila Bashamu khukhwola nga ne obaulila elala.’ ”

¹¹Ne bang'oosi babaandi boosi bang'oola bario. Baloma bali, “Cha mu lukoba lwa Ramoti-kileati mala okhile. Wele Omunyali Owa Bioosi alakhukhola obaule.”

¹²Omurumwa owacha khureera Mikaya amuboolela ali, “Lola bang'oosi babaandi boosi bang'oolile bulayi khu mwami. Lekha lilomaloma liowo libe lilayi nga liliabwe.”

¹³Ne Mikaya akobosia ali, “Nga Wele Omunyali Owa Bioosi ne amenyile mindali, nilio Wele amboolela lili nilio ndaloma.”

¹⁴Nga ne echa ebweeni wo mwami Ahabu, omwami amureeba ali, “Mikaya, khunyala khwacha mala khwebwakaala Ramoti-kileati namwe tawe?” Mikaya akobosia ali, “Cha wibwaakale mala okhile. Bacha khureebwa mu bunyali bwowo.”

¹⁵Ne kakhali Ahabu areeba ali, “Ndikhuboolela khukhwola khenga nio umboolele bung'ali bwong'ene mu lisina lia Wele Omunyali Owa Bioosi?”

¹⁶ Mikaya akobosia ali, “Mboone Isiraeli yoosi yasalaniile khu bikulu nga kamakheese kakhali ne omwaayi tawe. Ne Wele Omunyali Owa Bioosi aloma ali, ‘Babaandu bano se bali ne omwimeelesi tawe, lekha buli mulala ache engo wewe mu muleembe.’ ”

¹⁷Ahabu aboolela Yehoshafati ali, “Ese se khuboolele ndi se anyala ang'oolela kamalayi khwiwe tawe ne kakhali kamamayaanu?”

¹⁸Mikaya achiililila ali, “Nono rekeeresia elomo eya Wele Omunyali Owa Bioosi: Naboone Wele Omunyali Owa Bioosi ekhaale khu ndebe yeewe eye bubwami ne banamae bewe boosi bamwimileo kumukhono kumuseecha ne kumukhasi.

¹⁹Wele Omunyali Owa Bioosi areeba ali, ‘Naanu onyala aombelesia Ahabu omwami owa Isiraeli nio ache mala ererwe e Ramoti-kileati?’ Mulala aloma lilala, ne okundi aloma liliindi.

²⁰Nio roho mulala echa eema ebweeni wa Wele Omunyali Owa Bioosi aloma ali, ‘Ese ndamuombelesia.’ Wele Omunyali Owa Bioosi asireeba ali, ‘Olamubea oriena?’

²¹Roho oyo akobosia ali, ‘Ese ndacha mala mbe omubeeyi khubirira khu bang'oosi ba Ahabu boosi.’ Wele Omunyali Owa Bioosi aloma ali, ‘Cha omuombelesie ne olaba ne bukhili. Cha mala okhole orio.’

²²Ne Mikaya achiililila ali, ‘Nono Wele Omunyali Owa Bioosi areere roho owe bubeeyi mu bang'oosi bowo bano boosi. Ne Wele aboolile kamatinyu khwiwe.’ ”

²³Nio Omung'oosi Sedekia okhwa Kenaana acha khu Mikaya amupa luui mala amureeba ali, “Roho owa Wele Omunyali Owa Bioosi acha ariena khukhwama khwise alomaloma ne nawe?”

²⁴Mikaya amukobosia ali, “Olimanya endaalo niio olicha khukhwikisa mu lusiro lwe akari.”

²⁵Ne omwami Ahabu aloma ali, “Amba Mikaya mala mumukobosie khu Amoni, omwimeelesi owe lukoba ne khu Yoashi omusoleeli owo mwami.

²⁶Ne mumwosisieyo mulome muli, omwami aloma ali, ‘Ra omundu yuno mu siboe mala mumuliisie siakhulia sitiiti ne kameechi, khukhwola nga ne ngobola mu muleembe.’ ”

²⁷Mikaya aloma ali, “Waaba ne okobola mu muleembe aba Wele Omunyali Owa Bioosi se alomaloma khubirira khwise tawe.” Mala atasakho ali, “Ulila, enywe babaandu mwesi.”

²⁸Nio omwami Ahabu owa Isiraeli ne omwami Yehoshafati owa Yuda barekukha bacha e Ramoti-kileati.

²⁹Ahabu aboolela Yehoshafati ali, “Ese ndekosaasia fwaane omundu okundi nio nje mwiie, ne kakhali ewe yefwara chingubo chowo che bubwami.” Nio omwami owa Isiraeli acha mwiie ne ekosiaasiisie.

³⁰Nono omwami owa Shamu aaba alakile banamae be kamakaari kewe ke liie ali, “Mukhebwaakalakho omundu yesi yesi tawe ne akhali omwami owa Isiraeli yeng'ene.”

³¹Nio nga ne babona omwami Yehoshafati, boosi bebaasia bali ali omwami owa Isiraeli. Bayuukha bamwibwaakala mala Yehoshafati aliila Wele Omunyali Owa Bioosi amuyeeta. Wele abarusia khukhwama khu niye.

³²Nga banamae kamakhumi kataru ne babili abo bamanya bali se ali omwami owe Isiraeli tawe balekha khumutimania.

³³Ne kakhali omunamae mulala akhweesa buyiingo bwewe embi ne omwami owa Isiraeli mala amulasa akari we bubwongelo bwe chingubo chewe che liie. Omwami Ahabu aboolela otimianga likaari liewe ali, “Yuukha, mala undusie mwiie sikila bambumisie.”

³⁴Liie liaba liamemee endaalo ng'ene eyo. Omwami Ahabu aarama ne akalamiliile mu likaari liewe, aloleleela Bashamu khukhwola ekolooba. Bwaba oli bwelabula ne afwa.