Read lubukusu 2 Ke Ch. 2 Bible Online

2 Ke Ch. 2 - lubukusu bible

2 Ke Ch. 2

¹Nono Solomoni aabisia khukhwombakha Lukaangu lwe khusaayilamo Wele Omunyali Owa Bioosi ne khukhweyombakhila lichipi.

²Aarobora babaandu chielefu kamakhumi saba basuta bisutwa, babaandu chielefu kamakhumi munaane babecha kamabaale mu bikulu ne babaandu chielefu chitaru ne chimia sita baba babemeelela.

³Solomoni aruma burume khu mwami Hiramu owa Tiro ne aboola ali, “Njeete nga ne wayeeta paapa wase Daudi khulwe khumurumira kimirongooro kimitarakwa nio ombakhe lichipi liewe.

⁴Ese ndi siimbi khukhwombakha Lukaangu lwe khusaayilamo Wele Omunyali Owa Bioosi, Wele wase, mala nduaane khu niye khulwe khukhwosielamo bibiindu biiunya bulayi ebweeni wewe. Lundi khulachiililila khuaanilamo kumukaati kumutakatifu ebweeni wa Wele, ne khukhwosielamo biianwa bie khukhwosia buli kumutikhinyi ne ekolooba. Ne lundi ndaana Lukaangu mu ndaalo che Sabato ne kimieesi kimiya ne naikara chicharoborwa cha Wele Omunyali Owa Bioosi, Wele wefwe. Lino lili lilaka khulwa Isiraeli mindali na mindali.

⁵Enju niyo nenya khukhwombakha eliba emboofu sikila Wele wefwe ali omukali khukhila bawele babaandi boosi.

⁶ Ne kakhali se aliio onyala ombakhila Wele wefwe enju tawe. Akhaba mwikulu mwe mu ngaaki lukali se mumwola tawe. Nono ese ndi naanu nio mwombakhile enju? Ne akhali busa abuundu e khumwoseliao bibiindu biiunya bulayi?

⁷Nono ndumire omundu owe bukesi bwe khukhola kimilimo kie esahabu, efwesa, kumukasa ne sichuuma; omanyile alala ne khukhola bibiindu bie buusi buufwaana buseemwa, bubesemu, ne bubuusu. Abe omanyile lundi khuandika khu mabaale. Eche aambaane ne bafundi baali nase mu Yuda ne mu Yerusalemu, nibo paapa wase aarobora.

⁸Ndumire akhaba kimirongooro kimitarakwa, Saipurasi, kimitarakwa khukhwama Lebanoni, sikila emanyile ndi bakholi bowo bali bamanyile khurema kimirongooro e Lebanoni. Bakholi base balabayeeta.

⁹Bakholi bano bandekekhere chimbao chingali, sikila enju niyo ndikho nja khukhwombakha echa khuba emboofu lundi eye khuukia.

¹⁰Ndaelesia bakholi bowo barema kimirongooro, engaanu esie chindubi chielefu kamakhumi kabili ne eshayiri chielefu kamakhumi kabili ne chinyuungu che endali chielefu kamakhumi kabili ne kamafura ke kimiseituni chinyuungu chielefu kamakhumi kabili.”

¹¹Nio Hiramu omwami owa Tiro akobosia Solomoni mu barwa ali, “Sikila Wele Omunyali Owa Bioosi asiima babaandu bewe, akhukholile ewe obe omwami wabwe.”

¹²Lundi Hiramu aboola ali, “Wele Omunyali Owa Bioosi, Wele owa Isiraeli afume, owabuumba likulu ne liloba. Aelesia omwami Daudi omusoleeli omukesi oli ne bukesi ne limanya olombakhila Wele Omunyali Owa Bioosi Lukaangu lundi ombakhe lichipi liewe.

¹³“Nono nakhurumiire omufundi oomanyile kimilimo lukali owe bukesi. Lisina liewe bali Huramu-abi.

¹⁴Maawe ama mu baandu ba Dani, ne raraawe ama e Tiro. Huramu-abi ali omufundi ookhola bibiindu bie esahabu, efwesa, kumukasa, bichuuma, kamabaale ne chimbao. Ne lundi amanyile khukhola bibiindu bie buusi bufwaana buseemwa, bubuusi, bubesemu ne khunaba chingubo che bukusi bwe angaaki cha katani. Huramu-abi ali ne bukesi bwe khukhola akhaba bibeechwa, mala anyala akhola sifwani siosi siosi nisio aebwa khukhola. Alayeeta bafundi bowo ne bafundi bo mwami wase raraao Daudi.

¹⁵Khwako omwami khurumire efwe engaanu, eshayiri, kamafura ne ndali nga waloma.

¹⁶Efwe khularema kimirongooro nikio ewe wenya khukhwama Lebanoni. Khukhakhureerere ne kili kimiboe, khu nyanja khukhwola e Yopa, nio onyala wakibukula wakiyila Yerusalemu.”

¹⁷Nio Solomoni abala baakwa boosi babamenyanga mu sibala sia Isiraeli. Libala lino liaba enyuma we libala lia raraawe Daudi. Babamo bakeni chielefu miamoja khamusini natatu ne chimia sita mu sibala.

¹⁸Solomoni aarobora babaandu mu nibo chielefu kamakhumi saba basute bisutwa, ne babaandu chielefu kamakhumi munaane babeeche kamabaale mu sikulu. Ne lundi aelesia babaandu chielefu chitaru ne chimia sita mu nibo babe babemeelesi khu baandu bakhola kimilimo.