Read lubukusu 2 Ke Ch. 20 Bible Online

2 Ke Ch. 20 - lubukusu bible

2 Ke Ch. 20

¹Enyuma wa kano, Bamoabu, Baamoni nende balala khu Bameuni becha khukhwibwaakala Yehoshafati.

²Babaandu balala becha khu Yehoshafati mala bamuboolela bali, “Lituuli lie babaandu lilikho liicha khukhwama Edomu khukhwibwaakala ewe. Sipupu sino siamile ebweeni we enyanja eya chumbe. Luno luri sili e Hasasoni-tamari.” (Lino lili lisina liliindi lia Engedi).

³Nio Yehoshafati aria mala asaba Wele Omunyali Owa Bioosi. Aboolela babaandu ba Yuda boosi beyimana khulia.

⁴Bayuda boosi babuusiana khukhwama mungoba choosi cha Yuda khusaba buyeeti khukhwama khu Wele Omunyali Owa Bioosi.

⁵Yehoshafati eema ebweeni we babaandu ba Yuda ne Yerusalemu. Eema mu nju ya Wele Omunyali Owa Bioosi ebweeni we luuya luya.

⁶Aasaba ali, “Ee Wele Omunyali Owa Bioosi, Wele ewe bakuuka befwe; Owe oli Wele owe mwikulu. Wamiia bubwami bwe bibala bioosi. Bunyali ne kamaani bili bibiowo, mbao onyala eema ebweeni wowo tawe.

⁷ Ee Wele wefwe se waoona bamenywa be sibala sino ebweeni we babaandu bowo Isiraeli? Se wasieleesia khulwa mindali, lisaaye lia Aburahamu, omusaale wowo?

⁸Lisaaye lino liamenyile ano mala liombakhe Lukaangu khulwe lisina liowo. Baloma bali,

⁹kamabi ne kakhwichakho: liie, bukhalaki, bulwaale namwe enjala, khuliima mu Lukaangu luno ne ebweeni wowo, sikila ewe oli mu Lukaangu luno. Ne khu khulilila ewe mu butinyu bwefwe ne ewe olikhuulila mala okhuonie.

¹⁰ “Ne nono luno, Baamoni, Bamoabu ne babaandu be esikulu sia Seiri bali ano. Ewe se wafukiilila Baisiraeli babebwaakala, nga bama mu sibala sia Misiri tawe. Se babeera tawe.

¹¹Ne lola bakhuruungire efwe khulwe khukhuoona mu maloba kowo niko ewe wakhuelesia efwe kabe kakeefwe.

¹²Ee Wele wefwe, baelesie kumunaanio. Sikila efwe se khuli ne kamaani khukhila lituuli liboofu lilikho liicha khukhwibwaakala efwe tawe. Se khumanya nisio khunyala khukhola tawe. Efwe khwakhuloleelele ewe.”

¹³Babaandu ba Yuda boosi bema ebweeni wa Wele Omunyali Owa Bioosi ne batiiti babwe, ne bakhasi babwe, ne babaana babwe.

¹⁴Ne Roho owa Wele Omunyali Owa Bioosi echa khu Yahasieli okhwa Sakaria, omwichukhulu Benaya. Benaya aba okhwa Yeieli lundi omwichukhulu owa Matania. Matania aba Omulawi, mulala khu baana ba Asafu. Yahasieli aba mu sipupu sie babaandu ba Isiraeli.

¹⁵ Yahasieli aloma ali, “Babaandu ba Yuda mwesi, ne bamenywa ba Yerusalemu ne omwami Yehoshafati ulila: Wele Omunyali Owa Bioosi aloma ali, ‘Mukharia namwe mwafwa kumwoyo sikila sipupu siboofu sino tawe. Sikila liie se lili lilienywe tawe; ne kakhali lili lia Wele.

¹⁶Muchuli khemuche mu bebwaakale. Balaba balikho baniinila a lubangaachi lwa Asisi. Mulabanyoola ekhumaliilikha khwe litooma, ebukwe we sichiimi sia Yerueli.

¹⁷ Se mwenyekhana khu khuupana mwiie lino tawe. Bukula bubweyaangu bwenywe; mwime siriririri mala muboone bukhili bwa Wele Omunyali Owa Bioosi khulwe enywe, Ee Yuda ne Yerusalemu.’ Mukharia namwe mwafwa kumwoyo tawe. Muchuli cha mubebwaakale. Ne Wele Omunyali Owa Bioosi alaba ne nanywe”

¹⁸Nio Yehoshafati enama kumurwe kwetiila asi. Ne babaandu ba Yuda ne ba Yerusalemu boosi baakwa asi ebweeni wa Wele Omunyali Owa Bioosi ne khumusaaya.

¹⁹Balawi be bilibwa bia Bakohati ne Bakorahi benyokha khufumia Wele Omunyali Owa Bioosi, Wele owa Isiraeli ne kumumilo kwe angaaki.

²⁰Benyokha makhelebeende kumutikhinyi barura mala bacha mu sichiimi sia Tekoa. Nga baba ne barura, Yehoshafati enyokha aloma ali, “Enywe babaandu ba Yuda ne bamenywa ba Yerusalemu mbulile: Yeyikina Wele Omunyali Owa Bioosi, Wele wenywe ne mukhaandalasibwe. Yeyikina bang'oosi bewe ne mulikhila.”

²¹Omwami Yehoshafati ne amalile khukaambila babaandu, arobora abo babembela Wele Omunyali Owa Bioosi ne khumufumia mu ngubo chindakatifu. Bembanga ebweeni we banamae ne baloma bali, “Khupila orio Wele Omunyali Owa Bioosi, sikila busiime bwewe buli bwa mindali.”

²²Ne nga barakikha khukhwimba ne khufumia, Wele Omunyali Owa Bioosi akoyaania babaandu ba Amoni, Moabu nende be esikulu sia Seiri. Babaandu bano babecha khukhwibwaakala Yuda, babunila elala.

²³Babaandu ba Amoni ne Moabu bebwaakala babaandu be esikulu sia Seiri, mala bababunisilia elala. Nga bamala khubabunia babeene belanakho berana.

²⁴Nga babaandu ba Yuda boola khu ndeleelwa, baloola e basiku. Baboona bafu bong'ene bakwiile asi. Mbao akhaba mulala owebacha tawe.

²⁵Yehoshafati ne babaandu bewe becha khubukula bibiindu bie mu mbaambe, khukhwama khu nibo. Banyoola chikhaafu chingali, bibiindu, chingubo ne bibiindu bie bukhala. Babukula bibiindu bino khukhwola nga bakhilwa khubisuta. Babukula kimiaandu khu ndaalo chitaru. Biaba bikali lukali.

²⁶Khu ndaalo ekhola khane babusiana mwitooma lia Beraka. Abwenao bafumia Wele Omunyali Owa Bioosi. Khwako lisina lie abuundu ao lilangaangwa lili litooma lia Beraka khukhwola endaalo eya luno.

²⁷Nio babaandu ba Yuda ne Yerusalemu bakobola Yerusalemu ne busangaafu Yehoshafati ne abaraangirire, sikila Wele Omunyali Owa Bioosi abakhola bekhoya sikila yaba baulile basiku babwe.

²⁸Becha e Yerusalemu ne kamatuungu, ne biilili ne chikhoombi munju eya Wele Omunyali Owa Bioosi.

²⁹Bubwami bwoosi bwe bibala bwaria Wele nga bwaulila bali Wele Omunyali Owa Bioosi apanie basiku ba Isiraeli.

³⁰Nio bubwami bwa Yehoshafati se bwaba ne liie tawe sikila Wele amuelesia kumuleembe chimbeka choosi.

³¹Nono Yehoshafati amiia Yuda. Arakikha khukhwaamia ne ali ne bukhulu bwe kimiiko kamakhumi kataru ne kiraano. Ne amiia khukhwama mu Yerusalemu khu miiko kamakhumi kabili ne kiraano. Lisina lia maawe liaba bali Asuba omukhaana owa Shilihi.

³²Akhola kamalayi ebweeni wa Wele Omunyali Owa Bioosi nga raraawe Asa ne aakholanga.

³³Ne kakhali abuundu aesuta se arusibwao tawe. Kimiooyo kie babaandu se kiaba khu Wele owe bakuuka babwe tawe.

³⁴Nono bikholwa bibiindi bioosi bia Yehoshafati khukhwama khu sie khunyoa khukhwola khu simaliilisi, biaandikwa mu ngano cha Yehu okhwa Hanani. Chingano chino chaandikwa mu sitabu sie babaami ba Isiraeli.

³⁵Enyuma wa kano Yehoshafati omwami owa Yuda aambana ne omwami Ahasia owa Isiraeli owakhola kamamayaanu.

³⁶Yehoshafati aambana ne naye khukhwombakha chimeeli chiche e Tarishishi. Bombakhila chimeeli chino e Esioni-geberi.

³⁷Nio Elieseri okhwa Dodafau owe Maresha ang'oola khu Yehoshafati. Aloma ali, “Sikila waambanile ne Ahasia, Wele Omunyali Owa Bioosi acha khwonaka nisio mukholile.” Nio chimeeli chonekha mala khucha e Tarishishi tawe.