Read lubukusu 2 Ke Ch. 21 Bible Online

2 Ke Ch. 21 - lubukusu bible

2 Ke Ch. 21

¹Yehoshafati aafwa mala asiikhwa mu biliindwa bie bakuuka bewe, mu Lukoba lwa Daudi. Omwana wewe Yehoramu amiia mu bweyaangu bwewe.

²Bawandaaye ba Yehoramu baba: Asaria, Yehieli, Sakaria, Asaria, Mikaeli ne Shefatia. Bano boosi baba babaana ba Yehoshafati.

³Paapa wabwe abaelesia biianwa bikali bie efwesa, esahabu ne bibiindu bie bukhala. Abaelesia lundi chingoba chisire cha Yuda. Ne kakhali aaelesia Yehoramu bubwami sikila niye aaba omwana omubele.

⁴Nga Yehoramu ne eela khu bwami bwa raraawe, mala anyoola kamaani, eera bawandaaye boosi ne balala khu bemeelesi ba Isiraeli.

⁵Yehoramu aaba ne bukhulu bwe kimiiko kamakhumi kataru ne kibili ne arakikha khukhwamiia. Amiia khukhwama mu Yerusalemu khu miiko munaane.

⁶Ne akeenda mu ngila che babaami ba Isiraeli, nga enju eya Ahabu ne yakhola. Akhola ario sikila omukhaana owa Ahabu aaba omukhasi wewe. Yehoramu akhola kaali kamamayaanu ebweeni wa Wele Omunyali Owa Bioosi.

⁷ Ne kakhali Wele Omunyali Owa Bioosi se onaka enju eya Daudi tawe, sikila endakaano niyo akhola ne Daudi. Wele Omunyali Owa Bioosi aaba alaka ali, Daudi ne lisaaye liewe baliaamiia khulwa mindali.

⁸ Mu ndaalo cha Yehoramu, babaandu ba Edomu baloba bubwami bwa Yuda mala bamiisia omwami wabwe.

⁹Nio Yehoramu acha ne banamae bewe bakhulu ne kamakaari kewe ke liie koosi e Edomu. Oli musilo eera Baedomu ba baba ne bamubotookheleele niye ne banamae bewe bakhulu.

¹⁰Nio babaandu ba Edomu baloba bubwami bwa Yuda khukhwola endaalo eya luno. Khu siise esio babaandu ba Libuna boosi baloba bubwami bwa Yuda, sikila Yehoramu aba alekhile Wele Omunyali Owa Bioosi, Wele owe bakuuka bewe.

¹¹Khutasa khwako, Yehoramu akhola abuundu aesuta mu sibala sie bikulu sia Yuda. Ne aakhola bamenywa ba Yerusalemu balekha khuba babeyikinwa khu wele. Ne lundi aakhola babaandu ba Yuda balekha Wele Omunyali Owa Bioosi.

¹²Ne ebarwa yecha khu niye khukhwama khu mung'oosi Elicha eli, “Wele Omunyali Owa Bioosi, Wele owa Daudi, kuuka wowo aloma ali, ‘Se wakeendile mu ngila cha raraao Yehoshafati tawe. Lundi se wakeendile mungila cho mwami Asa owa Yuda tawe.

¹³Ne kakhali wakeendile mu ngila che babaami ba Isiraeli. Wakholile babaandu ba Yuda ne Yerusalemu khuba bakhali babeyikinwa khu Wele tawe. Wakholile nga enju eya Ahabu eyakhola Isiraeli yatamba bubweyikinwa khu Wele. Lundi werire bawandaayo be enju eya raraao ba baaba balayi khukhukhila ewe.

¹⁴Sikila kano Wele Omunyali Owa Bioosi acha khureera kumunaanio khu baandu bowo, babaana bowo, bakhasi bowo, ne bibiindu biowo bioosi.

¹⁵Nocha khuba ne lufu lwe munda lurafu. Lulikhuchuuna buli ndaalo khukhwola nga bie munda ne birura.’ ”

¹⁶Wele Omunyali Owa Bioosi enyosia lirima lie Bafilisiti ne Baarabu bali embi ne Baesopia, khu Yehoramu.

¹⁷Becha bebwaakala Yuda mala basuta bacha ne bibiindu bioosi nibio banyoola bibiaba bie enju eyo omwami. Lundi bacha ne babaana bo mwami ne bakhasi bewe. Se arama ne omwana yesi yesi tawe, ne kakhali Yehoahasi, omutua wewe.

¹⁸Enyuma wakano koosi, Wele Omunyali Owa Bioosi areera khu mwami lufu lwe munda lukhanyala lwasilikhwa tawe.

¹⁹Enyuma we kimiiko kibili, bie munda yewe biarura sikila lufu, mala afwa mu buchuuni bukali. Babaandu bewe khubwaana sisiooso khumua luyali, nga bibioso bie bakuuka bewe tawe.

²⁰Yehoramu aaba ne bukhulu bwe kimiiko kamakhumi kataru ne kibili nga ne aarakikha khukhwamiia. Amiia kimiiko munaane khukhwama Yerusalemu. Omundu yesi yesi se abelelakho sikila lifwa liewe tawe. Bamusiikha mu Lukoba lwa Daudi. Ne kakhali se bamusiikha mu biliindwa bie babaami tawe.