Read lubukusu 2 Ke Ch. 22 Bible Online

2 Ke Ch. 22 - lubukusu bible

2 Ke Ch. 22

¹Bamenywa ba Yerusalemu bamiisia Ahasia omwana owa Yehoramu omutua, mu bweyaangu bwa paapa wewe. Sipupu sie babaandu babeecha ne Baarabu mu kambi, sieera babaana bakhulu ba Yehoramu boosi. Nio Ahasia okhwa Yehoramu, omwami owa Yuda amiia.

²Ahasia aarakikha khukhwamiia ne ali ne bukhulu bwe kimiiko kamakhumi kane ne kibili. Amiia khukhwama Yerusalemu kumwiiko mulala. Lisina lia maawe liaba bali Atalia. Atalia aba omwichukhulu owa Omri.

³Ahasia akhola kamamayaanu nga enju eya Ahabu, sikila maawe aaba omukaambisi wewe mu khukhola kamamayaanu.

⁴Akhola kaali kamamayaanu ebweeni wa Wele Omunyali Owa Bioosi nga enju eya Ahabu ne yakhola. Akhola ario sikila enyuma we lifwa lia raraawe, balala khu be nju eya Ahabu baba bakaambisi bewe. Likaambila liabwe liakwisia Ahasia.

⁵Khuloonda khu likaambila liabwe, acha ne Yoramu okhwa Ahabu, omwami owa Isiraeli, khukhwibwaakala omwami Hasaeli owa Shamu a Ramoti-kileati. Bashamu baumisia Yoramu.

⁶Yoramu aakobola khucha khumenya aone mu lukoba lwa Yesireeli, kamakoonjo niko anyoola e Rama. Akanyoola nga apana ne omwami Hasaeli owa Shamu. Ne Ahasia omwami owa Yuda okhwa Yehoramu acha khubona Yoramu okhwa Ahabu mu Yesireeli sikila aba omulwale.

⁷Ne kakhali Wele aaba akhalake ali, likwa lia Ahasia lienyekhana liiche mu khucha khubona Yoramu khuno. Sikila nga oola e Yesireeli, arura ne Yoramu khukhwakaanana ne Yehu okhwa Nimisi. Yehu aba niye Wele Omunyali Owa Bioosi arobora khubunia enju eya Ahabu.

⁸Nga Yehu ne aba ne alikho aana kumunaanio khunju eya Ahabu, anyoola babemeelesi ba Yuda ne babaana ba wandaaye ba Ahasia, mala abeera. Babaandu bano bakholelanga Ahasia.

⁹Yehu ayiima Ahasia. Babaandu bewe banyoola Ahasia ne ekisile mu Samaria mala bamutiila. Areerwa khu Yehu mala Yehu amwiira. Bamusiikha sikila baloma bali, “Ali omwichukhulu owa Yehoshafati. Yehoshafati aria Wele Omunyali Owa Bioosi ne kumwoyo kwewe kwoosi.” Ne nju eya Ahasia se yaba, ne omundu onyala khukhwamiia bubwami tawe.

¹⁰Nono Atalia maayi owa Ahasia nga ne aabona ali omwana wewe afwiile, acha abunia enju yoosi eye bubwami eya Yuda.

¹¹Ne kakhali Yeosiabeati, omukhaana wo mwami abukula Yoashi okhwa Ahasia mala amukisa khukhwama khu basoleeli bo mwami ba baba siimbi khukhwirwa. Ara Yoashi no mulesi wewe mu lusiro lwe khukonamo. Mu ngila yino, Yehoshabeati, omukhaana owo mwami ne omukhasi owo omusaayi Yehoyata, (omukhasi yuno aba omukooko owa Ahasia) bakisa Yoashi khukhwama khu Atalia. Atalia se amwiira tawe.

¹²Yoashi aarama ne nabo khu miiko sita munju eya Wele nga Atalia ne aaba ne amiia sibala.