Read lubukusu 2 Ke Ch. 24 Bible Online

2 Ke Ch. 24 - lubukusu bible

2 Ke Ch. 24

¹Yoashi aaba ne bukhulu bwe kimiiko saba narakikha khukhwamiia. Ne amiia mu Yerusalemu kimiiko kamakhumi kane. Lisina lia maawe liaba bali Sibia khukhwama e Beerisheba.

²Ne Yoashi akhola kaali kamalayi ebweeni wa Wele Omunyali Owa Bioosi mu bulamu bwo musaayi Yehoyata bwoosi.

³Yehoyata amukhwela bakhasi babili mala asaala ne nabo babaana be sisoleeli nende be siikhaana.

⁴Enyuma wa kano Yoashi abisia khung'oona enju eya Wele Omunyali Owa Bioosi.

⁵Alaanga alala basaayi ne Balawi. Ababoolela ali, “Cha mu chingoba cha Yuda choosi mala buusia khukhwama mu Isiraeli yoosi chirupia che khung'oona enju eya Wele. Buusia chirupia chino buli mwiiko. Khola likhuwa lino khaangu.” Ne kakhali, Balawi khukhola khangu tawe.

⁶ Nio omwami alaanga omwimeelesi wabwe Yehoyata mala amureeba ali, “Siina sikila ewe ne okharakho Balawi khurera busuuru khukhwama Yuda ne Yerusalemu? Busuuru buno, omukholi owa Wele Omunyali Owa Bioosi, Musa aburao khu libuusiana lia Isiraeli khulwe liiema lie kumuse.”

⁷Omwami Yoashi ang'oona Lukaangu sikila babaana ba Atalia, omukhasi omumayaanu beele bafunaka bengila munju eyo MWAMI Wele. Barumikhira bibiindu bitakatifu bie munju eya Wele Omunyali Owa Bioosi khu Baali.

⁸Nio omwami alaka bakhola lisanduku mala balira enje we silibwa sie enju eya Wele Omunyali Owa Bioosi.

⁹Kumulaango kwarura kwoola mu Yuda ne mu Yerusalemu mwoosi. Babaandu baboolelwa khureera khu Wele Omunyali Owa Bioosi busuuru nibwo Musa omukholi owa Wele ara khu Baisiraeli mu sichiimi.

¹⁰Ne babemeelesi boosi ne babaandu boosi bekhoya mala bareera busuuru bwabwe babura mwisanduku khukhwola nga liechula.

¹¹Nga Balawi ne bareeranga khu bemeelesi bo mwami lisanduku, babemeelesi bano babonanga bali liechuulemo chirupia. Nio omuandiki owo mwami ne omwimeelesi owo Omusaayi Omukhulu Lukali barusiangamo chirupia chino mala ne besia lisanduku abuundu walio. Bakhola bario buli endaalo mala babuusia chirupia chingali.

¹²Omwami ne Yehoyata baelesianga chirupia chino khu bemeelesi be kimilimo kie nju eya Wele Omunyali Owa Bioosi. Baruunga babombakhi be chinju ne babeechi be chimbao khung'oona enju eya Wele Omunyali Owa Bioosi. Baruunga akhaba babasi be bichuuma ne kimikasa khung'oona enju eya Wele Omunyali Owa Bioosi.

¹³Nio babakholanga kimilimo bakikhola ne kamaani. Ne kimilimo kie khung'oona Lukaangu kiachiililila bulayi asi wabwe. Bang'oona enju eya Wele Omunyali Owa Bioosi yaba endayi lundi eye kamaani.

¹⁴Nga bamala khung'oona bakosia chirupia chicharama khu mwami ne Yehoyata. Bachirumikhira khukhola bibiindu bie enju eya Wele Omunyali Owa Bioosi khu milimo kia Wele Omunyali Owa Bioosi ne khulwe biianwa bie khukhwosia. Lundi bachikholamo bibiindu bie khusuta bibiindu biiunya bulayi ne bibiindu bie esahabu ne efwesa. Nio baana biianwa bie khukhwosia munju eya Wele Omunyali Owa Bioosi buli busiele mu bulamu bwa Yehoyata bwoosi.

¹⁵Nio Yehoyata aaba omusaakhulu lukali mala afwa. Aaba ne bukhulu bwe kimiiko emia ndala ne kamakhumi kataru nafwa.

¹⁶Bamusiikha mu Lukoba lwa Daudi mu biliindwa bie babaami. Bamusiikha abwenao sikila akhola kamalayi mu Isiraeli ne khu Wele ne khunju eya Wele.

¹⁷Nio, enyuma we lifwa lia Yehoyata, babemeelesi ba Yuda becha mala basikamila omwami. Ne omwami aulila kakabwe.

¹⁸Balekha enju eya Wele Omunyali Owa Bioosi, Wele owe bakuuka babwe mala bakholela wele Asiera ne bifwaani bibiindi. Lirima lia Wele liecha khu Yuda ne Yerusalemu sikila bumayaanu bwabwe buno.

¹⁹Wele Omunyali Owa Bioosi aaruma bang'oosi mu nibo khubakobosia khu Wele Omunyali Owa Bioosi. Bang'oosi bano bababoolela bumayaanu bwabwe ne kakhali se baulila tawe.

²⁰ Nio Roho owa Wele echa khu Sakaria okhwa Yehoyata Omusaayi. Sakaria enyokha eema, babaandu boosi bamubona mala ababoolela ali, “Wele Omunyali Owa Bioosi aloma ali, ‘Siina sikila enywe ne mufuna kamalaka ka Wele Omunyali Owa Bioosi mulekhe khuyindila? Sikila mwalekhile Wele Omunyali Owa Bioosi, Wele Omunyali Owa Bioosi yesi abalekhile.’ ”

²¹Ne kakhali babaandu bachongela Sakaria. Khulwe lilaka lio mwami baapa Sakaria kamabaale khu luuya lwe nju eya Wele Omunyali Owa Bioosi.

²²Nono Yoashi se akhebulila bulayi nibwo raraawe owa Sakaria amukholela tawe. Era omwana wewe. Ne Sakaria nga aba ne alikho afwa aloma ali, “Wele Omunyali Owa Bioosi akhoya amubona mala aruungisia!”

²³Kumwiiko ne kucha khuwa banamae ba Shamu becha khukhwibwaakala Yoashi. Becha e Yuda ne e Yerusalemu mala babunia babemeelesi boosi be babaandu. Basuta bibiindu bie mu mbaambe bayilila omwami owa Damasika.

²⁴Akhaba banamae ba Shamu ne baba batiiti, Wele Omunyali Owa Bioosi abaelesia bukhili khu banamae ba Yuda ba baaba bakali. Wele Omunyali Owa Bioosi akhola ario sikila ba Yuda baba balekhile Wele Omunyali Owa Bioosi, Wele owe bakuuka babwe. Mu ngila yino Bashamu bareera kumunaanio khu Yoashi.

²⁵Banamae ba Shamu barekukha ne baumisie Yoashi lukali. Bakholi ba Yoashi bachongela Yoashi mala bamwirira khu sitanda siewe. Bamwiira sikila niye eera okhwa Yehoyata omusaayi. Nio Yoashi afwa mala bamusiikha mu Lukoba lwa Daudi. Ne kakhali se bamusiikha mu biliindwa bie babaami tawe.

²⁶Abo babamuchongela baba Sabati okhwa Simeati, Omuamoni, ne Yehosabadi okhwa Shimuriti Omumoabu.

²⁷Chingano che babaana bewe ne bung'oosi bukali khu niye, ne khukhwombakha lundi enju eya Wele, biaandikwa mu sitabu sisinoosia kamakhuwa ke mu sitabu sie babaami. Omwana wewe Amasia amiia mu bweyaangu bwewe.