Read lubukusu 2 Ke Ch. 26 Bible Online

2 Ke Ch. 26 - lubukusu bible

2 Ke Ch. 26

¹Babaandu ba Yuda boosi bamiia Usia khuba omwami mu bweyaangu bwa Amasia raraawe. Usia aaba ne bukhulu bwe kimiiko ekhumi ne sita.

²Ombakha lukoba lwa Eloti mala alukhola lwaba lwe sibala sia Yuda lundi, enyuma we khufwa khwa Amasia.

³Usia aaba ne bukhulu bwe kimiiko ekhumi ne sita ne aarakikha khukhwamiia. Amiia mu Yerusalemu kimiiko kamakhumi karaano ne kibili. Lisina lia maawe liaba Yekolia, khukhwama Yerusalemu.

⁴Usia akhola kaali kamalayi ebweeni wa Wele Omunyali Owa Bioosi nga Amasia raraawe ne akhola.

⁵Usia aria Wele mu bulamu bwa Sakaria bwoosi sikila Sakaria amukaambilanga. Ne biise bioosi nibio Usia aria Wele Omunyali Owa Bioosi, Wele amukhola aindiaala.

⁶Usia acha apana liie ne Bafilisiti. Atechula kamasiisi ke chingoba chabwe cha Katihi, Yabune, ne Ashitoti. Nio ombakha chingoba chimbia embi ne Ashitoti ne abuundu aandi mu Bafilisiti.

⁷Wele ayeeta Usia aapana ne Bafilisiti, Baarabu babamenyanga mu Kuribaali ne Bameuni.

⁸Baamoni baruunganga busuuru khu Usia. Lisina liewe liafuma oosi khukhwola khu lwakha lwa Misiri, sikila aaba owe kamaani lukali.

⁹Khutasa khwako Usia ombakha chindeleelwa mu Yerusalemu e Silibwa sie mu koona, e Silibwa sie Mwitooma nende niio lisiisi Liyukhila. Aakhola bilibwa bino biaba bie kamaani.

¹⁰Lundi ombakha chindeleelwa mu sichiimi mala ayaba chisebele chingali sikila aaba ne chikhaafu chingali khu bikulu bie mumbo ne mu mweyeeywe. Aaba ne babaandu babamukholelanga mu mikuunda ne mu maruuti ke kimisabibu mu bikulu ne mu mikuunda kie ngakha, sikila asiima bulimi.

¹¹Usia aaba ne banamae bakali ba baaba ne bekisibwa khukhupana liie. Babalwa mala bareebwa mu mikaanda ne Yeieli omuandiki ne Maaseya omunamae. Hanania mulala khu banamae bakhulu bo mwami aba omwimeelesi wabwe.

¹²Banamae be kamaani boosi khukhwama mu bemeelesi be chinju cha Isiraeli baba chielefu chibili ne chimia sita.

¹³Asi we bunyali bwabwe babao banamae chielefu miatatu na saba ne chimia chiraano. Bapananga ne kamaani khuyeeta omwami khu basiku bewe.

¹⁴Usia aelesia banamae bewe boosi chingabo, kamafumo, chikofio che bichuuma, bimolo bie bibia, buyiingo ne kamabaale ke khuchukuchila mu mburuusi.

¹⁵Mu Yerusalemu aramo chiyinjini chichakholwa ne bafundi. Aara chiyinjini chino khu ndeleelwa ne khu koona khwe kamasiisi ke lukoba khulwe khulasa buembo ne kamabaale kamaboofu. Nono Usia afuma buli abuundu sikila anyoola buyeeti bukali khukhwama khu Wele, khukhwola nga ne aba ne bunyali bukali.

¹⁶Ne nga Usia aaba ne bunyali bukali arakikha khukhwilola. Lino liakila abuna. Aaba omubeeyi khu Wele Omunyali Owa Bioosi, Wele wewe. Engila mu Lukaangu lwa Wele Omunyali Owa Bioosi khukhwosia bibiindu biiunya bulayi khu alutare eye bibiindu biiunya bulayi.

¹⁷Ne kakhali Asaria ne basaayi ba Wele Omunyali Owa Bioosi babaandi kamakhumi munaane banyindaafu baloonda khu Usia bengila mu Lukaangu.

¹⁸ Bamuboolela bali, “Ewe se wenyekhana khukhwosia biiunya bulayi khu Wele Omunyali Owa Bioosi tawe. Basaayi bong'ene be lisaaye lia Aruni nibo ba batakaasibwa khulwe khukhwosia biiunya bulayi. Rekukha orure Abuundu Atakatifu ano, sikila wakholile libi, ne Wele Omunyali Owa Bioosi se alakhuelesia lukoosi khu lino tawe.”

¹⁹Nio Usia akhalala. Aba ali nende sie khukhwosiela biiunya bulayi mu mukhono kwewe. Nga aambila basaayi lirima, bulwaale bwe kamakele bwecha mu bweni mwewe ne emile ebweeni we basaayi embi ne alutare eye khukhwosielakho biiunya bulayi.

²⁰Ne Asaria, Omusaayi Omukhulu Lukali ne basaayi babaandi boosi bamulola mala babona kamakele mu bweni mwewe! Nio bamurusia khangu khukhwama mu Lukaangu. Ne Usia omwene akhola khangu arura enje, sikila Wele Omunyali Owa Bioosi aba alikho amuelesia kumunaanio.

²¹Nio omwami Usia aaba ne kamakele khukhwola khu ndaalo niyo afwilakho. Sikila aaba ne kamakele, amenya munju yeewe yeng'ene. Se afukiililwa khukhwingila mu Lukaangu lwa Wele Omunyali Owa Bioosi tawe. Omusoleeli wewe Yosamu aaba omuliindi wenju eye bubwami, mala amiia sibala.

²²Bibiindu bibiindi nibio Usia aakhola ne ali omwami khukhwama e khurakikha khukhwola ekhumaliilikha, biaandikwa ne omung'oosi Isaya okhwa Amosi.

²³ Usia afwa mala asiikhwa ne bakuuka bewe mu biliindwa bie babaami. Bamusiikha bario sikila baloma bali, “Usia ali ne kamakele.” Ne omusoleeli wewe Yosamu amiia mu bweyaangu bwewe.