Read lubukusu 2 Ke Ch. 27 Bible Online

2 Ke Ch. 27 - lubukusu bible

2 Ke Ch. 27

¹Yosamu aaba ne bukhulu bwe kimiiko kamakhumi kabili ne kiraano aarakikha khukhwamiia. Amiia kimiiko ekhumi ne sita mu Yerusalemu. Lisina lia maawe liaba bali Yerusha omukhaana owa Satoki.

²Yosamu akhola kaali kamalayi khu Wele Omunyali Owa Bioosi. Aakhola kamalayi bulayi bwene nga Usia raraawe ne akhola. Ne kakhali Yosamu se engilila kimilimo kie Lukaangu lwa Wele Omunyali Owa Bioosi tawe. Ne kakhali babaandu bachiililila khukhola kamamayaanu.

³Yosamu ang'oona silibwa sie ngaaki sie Lukaangu lwa Wele Omunyali Owa Bioosi mala atasa khukhwombakha lukali lisiisi lie Ofeli.

⁴Khutasa khwako, ombakha chingoba mu sibala sie lukulu sia Yuda. Lundi ombakha chingoba ne chindeleelwa mu musiru.

⁵Yosamu aapana ne Baamoni mala abaula. Nono buli kumwiiko khulwe kimiiko kitaru baruunga busuuru khu Yosamu bwe bitonyi bie efwesa emia ndala, biikula chielefu ekhumi bie engaanu ne biikula chielefu ekhumi che Shayiri.

⁶Nono Yosamu aaba ne kamaani sikila aria Wele Omunyali Owa Bioosi, Wele wewe.

⁷Nono bibiindu bibiindi nibio Yosamu aakhola ne kamae kewe koosi, ne chingila chewe choosi, chaandikwa mu sitabu sie babaami ba Isiraeli ne Yuda.

⁸Yosamu aba ne bukhulu bwe kimiiko kamakhumi kabili ne kiraano nga aarakikha khukhwamiia. Amiia kimiiko ekhumi ne sita khukhwama mu Yerusalemu.

⁹Yosamu afwa mala asiikhwa mu Yerusalemu, Lukoba lwa Daudi. Omwana wewe Ahasi amiia mu bweyaangu bwewe.