Read lubukusu 2 Ke Ch. 28 Bible Online

2 Ke Ch. 28 - lubukusu bible

2 Ke Ch. 28

¹Ahasi aaba ne bukhulu bwe kimiiko kamakhumi kabili nga aarakikha khukhwamiia. Amiia kimiiko ekhumi ne sita mu Yerusalemu. Ne se akhola kaali kamalayi ebweeni wa Wele Omunyali Owa Bioosi nga kuuka wewe Daudi ne akhola tawe.

²Ahasi akhola bibiindu bulayi bwene nga babaami ba Isiraeli ne bakhola. Akhola akhaba bifwaani bia Baali.

³Oosia bibiindu biiunya bulayi mwitooma lia Beni-hinomu. Lundi oosia babaana bewe nga embosio eye khukhwosia. Akhola ario khuloondekhana ne ke bisinyisia bie chikholo nicho Wele Omunyali Owa Bioosi aoona charura mu sibala ebweeni we Baisiraeli.

⁴Ahasi aana chimbosio ne khukhwosia bibiindu biiunya bulayi abuundu aesuta, khu bikulu ne asi wa buli kumurongooro kumubisi.

⁵ Khwako Wele Omunyali Owa Bioosi, Wele owa Ahasi aana Ahasi mu makhono ko mwami owa Shamu. Bashamu baula Ahasi mala baamba babaandu ba Yuda bakali mala babayila e Damasika. Akhaba lundi Wele Omunyali Owa Bioosi aana Ahasi mu makhono ka Peka, omwami owa Isiraeli. Omwami owa Isiraeli amuula mala eera banamae ba Ahasi bakali.

⁶Khu ndaalo ndala Peka, okhwa Remalia eera banamae banyindaafu chielefu emia ndala ne kamakhumi kabili mu Yuda. Peka abeera sikila baba balekha Wele Omunyali Owa Bioosi, Wele owe bakuuka babwe.

⁷Ne Sikiri omunamae owe kamaani khukhwama Efuraimu eera Maseeya, omusoleeli wo mwami Ahasi. Era lundi Asirikamu komanda oliindanga lichipi lio mwami, ne Elikana owaba oloondela omwami mu bunyali.

⁸Banamae ba Isiraeli baamba balebe babwe chielefu chimia chibili. Babukula bakhasi, basoleeli ne bakhaana. Lundi bayaaya bibiindu bikali bie mu mbaambe khukhwama mu Yuda, basuta babiila e Samaria.

⁹Ne kakhali omung'oosi owa Wele Omunyali Owa Bioosi owalaangwa bali Oteti abayo. Arura akaanane ne banamae ba Isiraeli nga baba ne balikho bakobola e Samaria. Ababoolela ali, “Wele Omunyali Owa Bioosi, Wele owe bakuuka benywe, amuuelesia enywe sibala sia Yuda, sikila aambila babaandu basio lirima. Ne Wele Omunyali Owa Bioosi abone nga mubeerire mu ngila eye bukhalafu bukali.

¹⁰Luno mulikho murekekha khukhola babaandu ba Yuda ne Yerusalemu be siseecha ne siikhasi khuba nasioobi benywe. Enywe mwesi se muli ne bubwoni bwenywe mwabeene khu Wele Omunyali Owa Bioosi, Wele wenywe tawe ku?

¹¹Nono ndekeeresie. Kobosia engo bawandaayenywe ne bakooko nibo mwaambile sikila Wele Omunyali Owa Bioosi amuambile enywe lirima lukali.”

¹²Nono babemeelesi balala ba Efuraimu nga Asaria okhwa Yoanani, Berekia okhwa Meshilemoti, Yehisikia okhwa Shalumu, ne Amasa okhwa Hadilai, bakhiingilila banamae babama mwiie.

¹³Babakaania bali, “Mukhareera baboe khukhwama mu Yuda ano tawe. Mwakhola murio, aba mwakhurereere efwe kumusaango ebweeni wa Wele Omunyali Owa Bioosi, khutasa khu bwoni ne kumusaango nibio khuli nabio. Kumusaango kwefwe kuli khale kumukali lukali mala lirima liewe lirafu lili khu Isiraeli.”

¹⁴Nio banamae balekhuula baambe ne bibiindu nibio baba ne bayaayile mwiie, ebweeni we babemeelesi ne libuusiana lie babaandu boosi.

¹⁵Babaandu nibo kamasina kabwe kalaangwa benyokha babukula baambe, ne nibio banamae ba Isiraeli baba ne bayaayile bafwara boosi ba baaba sichula mu nibo. Baelesia baambe chingubo, biraaro, siakhulia bie khunywa ne kamalesi. Bara baambe batekhele boosi khu punda mala babakobosia khu be chinju chabwe mu Yeriko, lukoba lwe kimikheendu. Nio, bakobola engo e Samaria.

¹⁶Mu siise esio omwami Ahasi aaruma balaange omwami owa Ashuru eche amuyeete.

¹⁷Baedomu baba bechile lundi bebwaakale ne khuula Yuda, mala baambile babaandu embaambe mala bachile ne nabo.

¹⁸Bafilisiti bosi bebwaakala ne khuamba chingoba che mu Shefela nende che ebunafubo owa Yuda. Baamba chingoba cha Beti-shemesi, Aiyaloni, Keteroti, Soko, Timuna ne Kimuso ne birekere bibiachibotookhelela. Bafilisiti bamenya mu ngoba echo.

¹⁹Wele Omunyali Owa Bioosi areerera Yuda kumunaanio, sikila Ahasi omwami areera bumayaanu mu Yuda mala se aba omweyikinwa khu Wele Omunyali Owa Bioosi tawe.

²⁰Ne kakhali Tikilati-pilineseri omwami owa Ashuru echa khukhwibwaakala Ahasi ne khuelesia Ahasi kumunaanio mu bweyaangu bwe buyeeti.

²¹Ahasi abukula bibiindu bie khukhwama mu Lukaangu lwa Wele Omunyali Owa Bioosi ne khukhwama munju eye bubwami ne khukhwama khu bemeelesi mala abielesia Omwami owe Ashuru, ne kakhali se amuyeeta tawe.

²²Mu siise sie kumunaanio kwewe Ahasi atasa khuba okhali omweyikinwa khu Wele Omunyali Owa Bioosi tawe.

²³Aana chimbosio khu wele be babaandu ba Damasika, ba baba ne bamuulile. Ebaasia ali “Bawele be babaami ba Shamu babayeeta. Ne ese naba ne mbaanila chimbosio banyala banjeeta akhaba seesi.” Ne kakhali bawele bano baba libuna khu Ahasia ne Isiraeli yoosi.

²⁴Ahasi abuusia alala bibiindu khukhwama mu Lukaangu lwa Wele mala abibwasulaka mu bitonyi. Lundi ekala kimiliango kie Lukaangu lwa Wele Omunyali Owa Bioosi. Ombakha chi alutare khu buli khu koona eya Yerusalemu.

²⁵Buli mu lukoba mu Yuda, Ahasi akhola abuundu aesuta khukhwosielao bibiindu biiunya bulayi khu wele babaandi. Nio aambia Wele Omunyali Owa Bioosi, Wele owe bakuuka bewe lirima.

²⁶Nono bibiindu nibio Ahasi akhola ne chingila chewe khukhwama mu khurakikha khukhwola ekhumaliilikha biaandikwa mu sitabu sie babaami ba Yuda ne Isiraeli.

²⁷ Ahasi afwa mala asiikhwa mu Yerusalemu ne kakhali se asiikhwa mu biliindwa bie babaami ba Isiraeli tawe. Omwana wewe Hesekia amiia mu bweyaangu bwewe.