Read lubukusu 2 Ke Ch. 29 Bible Online

2 Ke Ch. 29 - lubukusu bible

2 Ke Ch. 29

¹Hesekia aaba ne bukhulu bwe kimiiko kamakhumi kabili ne kiraano nga aarakikha khukhwamiia. Amiia kimiiko kamakhumi kabili ne tisa khukhwama mu Yerusalemu. Lisina lia maawe liaba Abicha omukhaana owa Sakaria.

²Hesekia akhola kaali kamalayi ebweeni wa Wele Omunyali Owa Bioosi bulayi bwene nga Daudi kuuka wewe akhola.

³Mu mwesi kwe khunyoa kwe kumwiiko kwe khunyoa, kwe bubwami bwewe Hesekia ekula kimiliango kie enju eya Wele Omunyali Owa Bioosi mala aking'oona.

⁴Hesekia areera basaayi ne Balawi mala ababuusia khu luuya, lubeka lwe bukwe we Lukaangu.

⁵Ababoolela ali, “Balawi, ndekeeresie, luno khemwitakaase mala mutakaase Lukaangu lwa Wele Omunyali Owa Bioosi, Wele owe bakuuka benywe. Rusia buli siindu siili sinyaalu Abuundu Atakatifu.

⁶Bakuuka befwe se baba babeyikinwa tawe mala bakhola kaali kamamayaanu khu Wele Omunyali Owa Bioosi, Wele wefwe. Bamulekha mala balekha khusaayila mu Lukaangu nimwo amenya mala bamuloba.

⁷Lundi bekala kimiliango kie lusiro luboofu lwe Lukaangu mala basimia chitaa. Se bosia bibiindu biiunya bulayi namwe se baana embosio eye khukhwosia Abuundu Atakatifu khu Wele owa Isiraeli tawe.

⁸Khwako, Wele Omunyali Owa Bioosi aambila babaandu ba Yuda ne Yerusalemu lirima. Abakholile babeele babaandu be khuterema, khuukia ne khukhomwa, nga mwabene ne muboone ne chimoni chenywe.

⁹Bakuuka befwe berwa ne basoleeli befwe ne bakhaana befwe, ne bakhasi befwe baambiilwe embaambe sikila kano.

¹⁰“Nono ese nebasiisie khukhola endakaano ne Wele Omunyali Owa Bioosi, Wele owa Isiraeli, nio lirima liewe lirafu khwifwe liwe.

¹¹Basoleeli base, luno mukhaba be sikorerwa tawe, sikila Wele Omunyali Owa Bioosi abarobore enywe mwime ebweeni wewe mumukholele, mube bakholi bewe mala mumwoselie bibiindu biiunya bulayi.”

¹²Nono Balawi bano barakikha kimilimo. Balawi bano baaba: Khukhwama mu be luuya lwa Kohati, Mahati okhwa Amasai ne Yoeli okhwa Asaria. Khukhwama mu be luuya lwa Merari, Kishi okhwa Abuti ne Asaria okhwa Yehaleleli. Khukhwama mu be luuya lwa Kerishoni, Yoa okhwa Sima ne Edeni okhwa Yoa.

¹³Khukhwama mu be luuya lwa Elisafani, Shimuri ne Yeueli. Khukhwama mu lisaaye lia Asafu Sakaria ne Matania.

¹⁴Khukhwama mu be luuya lwa Hemani, Yehueli ne Shimei. Khukhwama mu be luuya lwa Yedutuni, Shemaya ne Usieli.

¹⁵Balawi bano babuusia bawandaayabwe alala mala betakaasa baba batakatifu khulwe kimilimo mu Lukaangu. Nono bengila mu Lukaangu nga omwami ne alaka khuloondekhana ne Elomo eya Wele Omunyali Owa Bioosi khutakaasa enju eya Wele Omunyali Owa Bioosi.

¹⁶Basaayi bengila mu lusiro lwe mukari lwe enju eya Wele Omunyali Owa Bioosi khulutakaasa. Barusia enje bibiindu binyaalu bioosi nibio banyoola mu Lukaangu lwa Wele Omunyali Owa Bioosi, mala babira khu luuya lwe Lukaangu. Nono Balawi babukula bibiindu bino bioosi babisuta babiyila a kheechi kha Kiduroni.

¹⁷Barakikha khutakaasa khu ndaalo eye khunyoa eye kumwesi kwe khunyoa. Khu ndaalo ekhola munaane eye kumwesi baba bolile mu lusiro luboofu lwe Lukaangu. Ne khu ndaalo munaane batakaasa Lukaangu lwa Wele Omunyali Owa Bioosi. Khu ndaalo ekhola ekhumi ne sita eye kumwesi kwe khunyoa bamala khutakaasa Lukaangu.

¹⁸Nio basaayi bacha khu mwami Hesekia mala baboola bali, “Khwatakaasile enju eya Wele Omunyali Owa Bioosi yoosi. Lundi khwatakaasile alutare khulwe khukhwosia biianwa ne bibiindu bie khukholelakho kimilimo, ne mesa eye khurakho kumukaati kumutakatifu ne bibiindu bie khukholelakho kimilimo bioosi.

¹⁹Bibiindu bioosi nibio omwami Ahasi alekha mu bwami bwewe, nga akhaba omweyikinwa khu Wele tawe, khwabing'oonile ne khubitakaasa. Ne lola bili ebweeni wa alutare eya Wele Omunyali Owa Bioosi.”

²⁰Omwami Hesekia enyokha makhelebeende endaalo eloondakho abuusia babemeelesi be lukoba, mala acha ne nabo mu Lukaangu lwa Wele Omunyali Owa Bioosi.

²¹Bareera chiuunwa saba, kamamiiku saba, kamameeme saba ne chindurume saba khulwe siianwa sie khumalao bubwoni khu bwami, khu Lukaangu ne khulwe sibala sia Yuda. Omwami Hesekia alaka basaayi, be lisaaye lia Aruni baane biianwa bino khu alutare eya Wele Omunyali Owa Bioosi.

²²Nono bera chiuunwa, kamamiiku, ne kamameeme mala basaayi babukula kamalasile kabio bakaanyaka khu alutare.

²³Ekhumaliilikha basaayi bareera chindurume khulwe siianwa sie khumalao bubwoni khu mwami Hesekia ne libuusiana. Omwami Hesekia ne libuusiana bara kamakhono kabwe khu ndurume.

²⁴Basaayi bachiira mala barumikhira kamalasile kacho khuaana siianwa sie khumalao bubwoni khu alutare. Bakhola bario khumalao bubwoni bwa Isiraeli yoosi. Sikila omwami aba alakile ali embosio eye khukhwosia ne biianwa bie khumalao bubwoni biaanwe khulwe Baisiraeli boosi.

²⁵Omwami Hesekia engisia mu Lukaangu Balawi ba baaba ne bibiindu bie khu khuupania alala mu mienya, kamatuungu ne biilili, nga Daudi ne Kati ne Nasani baba ne balaka (Kati aaba owe kamalola owo mwami ne Nasani aba omung'oosi.) Lilaka lino liama khu Wele Omunyali Owa Bioosi khubirira khu bang'oosi bewe.

²⁶Balawi bema ne bibiindu bie khurumikhira khukhwimba kimienya ne basaayi bema ne chikhoombi.

²⁷Nio omwami Hesekia alaka ali siianwa sie khukhwosia siaanwe khu alutare. Nga siianwa sie khukhwosia siarakikha khuya, kumwenya kwa Wele Omunyali Owa Bioosi kwosi kwarakikha khukhwimbwa. Chikhoombi chapwa, ne kamatuungu ka Daudi omwami owa Isiraeli.

²⁸Babaandu boosi basaaya, ne babeembi be kimienya bemba nende be chikhoombi baapa chikhoombi chabwe nabwila siianwa sie khukhwosia ne siawa.

²⁹Nga siianwa ne siawa, omwami Hesekia nende buli mundu owaba ne naye basikama basaaya.

³⁰Omwami Hesekia ne babemeelesi balaka Balawi khukhwimba kimienya kie fuma khu Wele Omunyali Owa Bioosi ne barumikhira kamakhuwa niko Daudi ne Asafu owe kamalola baba ne barumikhira. Nio bemba kimienya kie fuma khu Wele ne busangaafu mala basikama asi basaaya.

³¹Hesekia aboolela babaandu ali, “Luno enywe mweanile mwabene khu Wele Omunyali Owa Bioosi; nono khemwiche siimbi. Reera chimbosio ne biianwa bie khusiima munju eya Wele Omunyali Owa Bioosi.” Nono libuusiana liareera chimbosio ne biianwa bie khusiima. Buli mundu owaba ne lilienya mu mwoyo kwewe areera biianwa bie khukhwosia.

³²Biianwa bie khukhwosia nibio libuusiana liareera biaba chiuunwa kamakhumi saba kamamiiku emia ndala ne kamameeme chimia chibili. Bibiaayo bino bioosi biaanwa nga siianwa sie khukhwosia khu Wele Omunyali Owa Bioosi.

³³Biianwa bitakatifu bioosi biaba chiuunwa chimia sita ne kamakheese chielefu chitaru.

³⁴Ne kakhali basaayi baba batiiti lukali khubaaka bibiaayo ebio bioosi khulwe biianwa bie khukhwosia. Nono basaayi babaandi ne bakhetakaasa tawe, balebe babwe Balawi babayeeta nabwila kimilimo ne kiawa. Balawi baba barekerefu mu khwitakaasa khulwe kimilimo kio Mwami Wele khukhila basaayi.

³⁵Alala ne biianwa bie khukhwosia, biabao biianwa bie kumuleembe bie kiminawa nende bie khunywa. Nono lisaaya mu Lukaangu lwa Wele Omunyali Owa Bioosi liarakikha lundi.

³⁶Omwami Hesekia ne babaandu boosi basangaala lukali sikila niko Wele aaba ne akholele babaandu. Wele akhola likhuwa lino khangu.