Read lubukusu 2 Ke Ch. 3 Bible Online

2 Ke Ch. 3 - lubukusu bible

2 Ke Ch. 3

¹ Nio omwami Solomoni arakikha khukhwombakha enju ya Wele Omunyali Owa Bioosi mu Yerusalemu khu sikulu sia Moria. Ano niio Wele Omunyali Owa Bioosi aaba ne aabonekhela Daudi, raraawe owa Solomoni. Solomoni ombakha Lukaangu abuundu niio Daudi aba ne arekekha khu luuya lwe khuulilakho lwa Orinani Omuyebusi.

²Solomoni aarakikha khukhwombakha Lukaangu khu mwesi kwa khabili kwe kumwiiko kukhola khane kwe khukhwamiia khwewe.

³Ebino nibio bibiaba bipiimilo bia Solomoni bie khukhwombakha enju eya Wele. Buleeyi mu bipiimilo bikhale bwaba bikele kamakhumi sita ne bukhiikha bwaba bikele kamakhumi kabili.

⁴Ne lusiro lwe khukhwingila mukari lwaba bikele buleeyi kamakhumi kabili, lulwaleekhaana ne bukhiikha bwe enju. Ne buleeyi bwalwo bwaba bikele emia ndala ne kamakhumi kabili. Aalufuunikha ne esahabu endayi.

⁵Aara chimbao cha Saipurasi khwisiisi lie mukari lie lusiro lubalaayi lwe Lukaangu mala achifuunikha ne esahabu enukhu. Aachora khwisiisi okhwo bifwaani bie kimirongooro kimikheendu ne kiminyololo.

⁶Solomoni aarona Lukaangu ne kamabaale ke bukusi bwe angaaki. Ne esahabu niyo arumikhira yama Paribaimu.

⁷Nio aakha esahabu khu Lukaangu, ne khu mitalaachi, kamatooche, khwisiisi ne khu miliango mala aachonga chikerubi khu masiisi.

⁸ Ombakha Abuundu Atakatifu Lukali. Abwenao aaba ne buleeyi ne bukhiikha bulekhaana. Buleeyi bwaba bikele kamakhumi kabili ne bukhiikha bwosi bikele kamakhumi kabili. Bubalaayi bwe Abuundu Atakatifu ao bwaba bulekhaana ne bubalaayi bwe nju eya Wele Omunyali Owa Bioosi. Aafuunikha lisiisi ne esahabu endayi eye busiro bwe bitonyi chimia sita.

⁹Busiro bwe kimisumari bwaba bitonyi kamakhumi karaano bie esahabu. Lundi aafuunikha esahabu musiro che khu korofa.

¹⁰ Mukari mwe Abuundu Atakatifu Lukali, Solomoni akholamo chikerubi chibili che kumurongooro. Aachifuunikha esahabu.

¹¹Bubalaayi bwe chindaa che chikerubi chombi bwaba bikele kamakhumi kabili. Lutaa lulala lwe ekerubi lulwaba bikele biraano lwetiila khu lisiisi lie Lukaangu ne lutaa luluundi lulwaba lwosi bikele biraano lwetiila khu lutaa lwe ekerubi ekiindi.

¹²Ne lutaa lulala lwe ekerubi ekiindi yino, lwetiila khu lisiisi lubeka luluundi lwe Lukaangu, mala akhaba lwosi lwaba buleeyi bikele biraano. Lutaa luluundi lwe ekerubi eya khabili lwetiila khu lutaa lwe ekerubi eye khunyoa.

¹³Chindaa che chikerubi chino chaba buleeyi bwe bikele kamakhumi kabili. Chikerubi chino chema chaloleelela e lusiro lubalaayi lwe Lukaangu.

¹⁴ Anaba eneti eye buusi bubuusi, bunapeenda ne bubesemu, alala ne katani, mala achorakho bifwaani bie chikerubi.

¹⁵Ebweeni we Lukaangu akhola chinjeko chibili chichaba bikele kamakhumi kataru no biraano khucha angaaki. Buli enjeko yabakho siukutwa khu ngaaki khwayo sie buleeyi bwe bikele biraano.

¹⁶Akhola kiminyololo nga bibiuma mala aakira khu ngaaki khwe chinjeko. Akhola lundi bifwaani bie kamatuunda kamakomanga emia ndala mala akaambaasia ne kiminyololo.

¹⁷Emisia chinjeko ebweeni we Lukaangu. Enjeko ndala emia lubeka lwe ebunafubo ne ekiindi yema ebunaswa. Enjeko eye ebunafubo akitiuukha ali Yabini ne eye ebunaswa akitiuukha ali Boasi.