Read lubukusu 2 Ke Ch. 32 Bible Online

2 Ke Ch. 32 - lubukusu bible

2 Ke Ch. 32

¹Enyuma we bikholwa bie bubweyikinwa bia Hesekia bioosi Senakeribu, omwami owa Ashuru echa mala ebwaakala Yuda. Akara chingoba che lisiisi ne akanakana ali alachibukula chibe chichewe.

²Hesekia amanya ali Senakeribu aba echile Yerusalemu khukhwibwaakala lukoba.

³Nono Hesekia ne babemeelesi bewe ne banamae be kamaani babisia khukhiingilila chimoni che kameechi chichaba enje we lukoba. Babemeelesi ne banamae be kamaani bayeeta Hesekia.

⁴Babaandu bakali babuusibwa alala mala bakhiingilila chimoni che kameechi choosi ne luluuchi lulwabira mu sibala. Baboola bali, “Omwami owa Ashuru se akhoya anyoola kameechi kamakali tawe.”

⁵Nono Hesekia ara sinani mukhwombakha kamasiisi kakaba ne katechukha, mala akarakho chendeleelwa. Ombakha lisiisi liliindi enje we lisiisi lie khunyoa, mala asitoya lubeka lwe kimiliinda mu Yerusalemu. Lundi abasa bulwaani bukali ne chingabo chingali.

⁶Hesekia ara bakhulu be banamae balinde babaandu. Ababuusia niye ali embi a silibwa sie lukoba mala abaramo kumwoyo ne aloma ali,

⁷“Ba ne kamaani ne bunyindaafu. Mukharia namwe mweembeelela sikila omwami owa Ashuru ne banamae bakali bali ne naye tawe. Efwe khuli nende owe kamaani khumukhila niye.

⁸Niye ali ne banamae bali babaandu busa ne efwe khuli ne Wele Omunyali Owa Bioosi, Wele wefwe khu khuyeeta ne khu khuupanila kamae kefwe.” Babaandu baba ne bunyindaafu khulwe kamakhuwa ka Hesekia omwami owa Yuda.

⁹Enyuma wa kano, omwami Senakeribu owa Ashuru owaba ne abotookhelela lukoba lwa Lakishi ne banamae bewe boosi, aruma bakholi bewe e Yerusalemu. Abaruma khu mwami Hesekia owa Yuda ne khu baandu ba Yuda boosi ba baaba mu Yerusalemu. Aboola ali,

¹⁰“Ese Senakeribu omwami owa Ashuru mboola ndi, ‘Enywe muleyikinanga siina sikila ne mubotookhelela Yerusalemu?

¹¹Hesekia se alikho amubea nio amulekhe enywe mufwe khulwe enjala ne bulesia? Alikho amubea ali Wele Omunyali Owa Bioosi, Wele wefwe akhakhuonie efwe khukhwama khu mwami owa Ashuru.

¹²Se ali Hesekia yuno omwene owarusiao abuundu aesuta ne chi alutare cha Wele Omunyali Owa Bioosi? Se ali niye owalaka babaandu ba Yuda ne Yerusalemu ali, musaaye ebweeni wa alutare ndala yong'ene, ne khukhwosia chimbosio khu alutare ndala yong'ene?

¹³Enywe se mwamanya niko bakuuka base ne nase, khwakhola khu baandu boosi mu bibala bibiindi tawe ku? Wele be bibala ebio banyala khuonia babaandu babwe khukhwama mu bunyali bwase ku?

¹⁴Bakuuka base babunia bibala ebio. Se alio mulala khu wele babwe owanyala khubaonia khukhwama khwise tawe. Ne wele wenywe naanu onyala amuonia khukhwama mu bunyali bwase?

¹⁵Nono enywe mukhalekha Hesekia amusilwaasia namwe amubea mu ngila yino tawe. Ne mukhamweyikina sikila se aliio wele owe sibala siosi siosi namwe bubwami, namwe sibala sinyala khuonia babaandu basio khukhwama khu bakuuka base namwe khwise tawe. Ne wele wenywe ali ne kamaani matiiti ke khumuonia khukhwama mu bunyali bwase.’ ”

¹⁶Ne babemeelesi ba Senakeribu batasa khulomaloma bubi bubuundi bukali khu Mwami WELE, ne khu mukholi wewe Hesekia.

¹⁷Lundi Omwami Senakeribu aandika chibarwa che khukhoma Wele Omunyali Owa Bioosi, Wele owa Isiraeli. Aandika ali, “Nga bawele be bibala bibiindi se banyalile khuonia babaandu babwe khukhwama mu bunyali bwase tawe, wele owa Hesekia se acha khunyala khuonia babaandu bewe khukhwama mu bunyali bwase tawe.”

¹⁸Nio bayokela mu lulomo lwe Bayuda khu baandu ba Yerusalemu ba baaba khwisiisi lie lukoba. Babemeelesi bano benya khuriikhirisia babaandu, nio nibo baambe Yerusalemu.

¹⁹Balomaloma khu Wele owa Yerusalemu nga oli balomaloma khu wele nibo babaandu bakhola ne kamakhono kabwe.

²⁰Nio omwami Hesekia ne omung'oosi Isaya okhwa Amosi, basaaya ne balila ne baloleleele mwikulu.

²¹Nio Wele Omunyali Owa Bioosi aruma malaika eera banamae be kamaani, ne banamae bakhulu ne babemeelesi mu kambi yo mwami owa Ashuru. Nio omwami Senakeribu aakobola mu sibala siewe ne chisoni. Nga aba ne engile munju eya wele wewe, balala khu basoleeli bewe babene bamwiira.

²²Nio Wele Omunyali Owa Bioosi aonia Hesekia ne babaandu ba baamenya mu Yerusalemu khukhwama khu Senakeribu omwami owa Ashuru ne khukhwama khu basiku bewe boosi. Wele Omunyali Owa Bioosi abaelesia kumuleembe buli lubeka.

²³Babaandu bakali baana biianwa khu Wele Omunyali Owa Bioosi e Yerusalemu ne lundi bareerera omwami Hesekia owa Yuda biianwa bie bukusi bwe angaaki. Hesekia anyoola lukoosi ebweeni we bibala bioosi khukhwama siise esio khuchiililila.

²⁴Mu biise ebio Hesekia aba omulwale lukali aba embi khufwa. Asaba Wele Omunyali Owa Bioosi, mala Wele Omunyali Owa Bioosi amukobosia, amuelesia simanyisio.

²⁵Ne kakhali Hesekia se asiima Wele khu bulayi nibwo akholelwa tawe, sikila elola. Khwako Wele Omunyali Owa Bioosi aambila Hesekia ne babaandu ba Yuda ne Yerusalemu lirima.

²⁶Ne kakhali Hesekia ne babaandu ba Yerusalemu beboombia. Nio Wele Omunyali Owa Bioosi se abareerera kumunaanio Hesekia ne asiili omulamu tawe.

²⁷Hesekia aba ne kimiaandu kimikali ne lukoosi lukali. Ekholela kamabiikhilo khulwe efwesa, esahabu, kamabaale kewe ke bukusi bukali, bibiindu bing'ayilisia, chingabo, ne bibiindu bibiindi bie bukusi bukali.

²⁸Ombakha akhaba chinju che khubungamo biakhulia, endali ne kamafura ne kamataala ke chikhaafu choosi, ne biko bie kamakheese.

²⁹Lundi eyombakhila chingoba mala aba ne kamatuuli ke kamakheese ne chikhaafu chingali, sikila Wele aelesia Hesekia kimiaandu kimikali.

³⁰Hesekia yuno niye owakhiingilila kumunwa kwe litiisi lie kameechi Kihoni mala ausia kameechi ako akalosia lubeka lwe mumbo lwa Yerusalemu. Ne Hesekia aindiaala buli mu siindu nisio akhola.

³¹Ne siise silala babemeelesi ba Babiloni baruma barume babwe khu Hesekia, ne bamureeba ke simanyisio sisiekholekha mu sibala. Wele alekha Hesekia yeng'ene khu mukhaka nio amanye buli sisiindu sisiaba mu mwoyo kwa Hesekia.

³²Bikholwa bilayi bia Hesekia khu Wele ne bikholwa bibiindi nibio akhola biaandikwa mu malola ko mung'oosi Isaya okhwa Amosi. Kano kali mu sitabu sie babaami ba Yuda ne Isiraeli.

³³Hesekia aafwa mala asiikhwa khu sikulu, niio biliindwa bie lisaaye lia Daudi bili. Babaandu ba Yuda boosi ne ba Yerusalemu baelesia Hesekia lukoosi nga aafwa. Omusoleeli wewe Manase amiia mu bweyaangu bwewe.