Read lubukusu 2 Ke Ch. 33 Bible Online

2 Ke Ch. 33 - lubukusu bible

2 Ke Ch. 33

¹Manase aaba ne bukhulu bwe kimiiko ekhumi ne kibili nga ne aarakikha khukhwamiia. Amiia mu Yerusalemu khu miiko kamakhumi karaano na kiraano.

² Aakhola kaali kamamayaanu ebweeni wa Wele Omunyali Owa Bioosi. Aakhola bibiindu bie khusinya nibio chikholo chichiindi chaba ne chikholile, chikholo nicho Wele Omunyali Owa Bioosi aaba ne aoona charura mu sibala ebweeni we Baisiraeli.

³Manase ombakha lundi abuundi aesuta niiyo raraawe Hesekia atechula. Ombakha alutare khu Baali. Akhola bifwaani bia wele Ashera mala asaaya ching'enieesi ne khuchikholela.

⁴ Lundi ombakha chi alutare mu nju ya Wele Omunyali Owa Bioosi niyo Wele Omunyali Owa Bioosi aloma ali, “Ese khasaaywe mu Yerusalemu mindali na mindali,”

⁵Manase ombakha chi alutare che khusaaya ching'enieesi mu mbia chibili che nju ya Wele Omunyali Owa Bioosi.

⁶Aana basoleeli bewe nga siianwa sie khukhwosia; bosebwa mu Litooma lia Beni-Hinomu. Aakhola buolelesi khumenieelesia, ne bulosi. Ne lundi aima bukambisi khukhwama khu bafumu ne babini. Akhola kaali kamamayaanu lukali ebweeni wa Wele Omunyali Owa Bioosi mala aambia Wele Omunyali Owa Bioosi lirima.

⁷ Manase aakhola sifwaani sie khukhwesaaya mala aasira mu nju eya Wele. Khu nju yino Wele aaba aboolela Daudi ne omusoleeli wewe Solomoni ali, “Mu nju muno ne mu Yerusalemu nilwo ndobore khukhwama mu kholo choosi cha Isiraeli, ese khasaayilwemo.

⁸Se ndikhola lundi Baisiraeli barure mu sibala nisio naelesia bakuuka babwe tawe, baaba ne baria buli sisiindu nisio nabalaka mu mekisio koosi ne kamalaka khubirira khu Musa.”

⁹Ne Manase akila babaandu ba Yuda ne Yerusalemu bakhola bumayaanu. Bakhola bumayaanu khukhila chikholo nicho Wele Omunyali Owa Bioosi abunia ebweeni we Baisiraeli.

¹⁰Wele Omunyali Owa Bioosi alomaloma ne Manase ne babaandu bewe, ne kakhali se barekeeresia tawe.

¹¹Khwako Wele Omunyali Owa Bioosi areera banamae bakhulu be sipupu sie banamae sio mwami owa Ashuru khubebwaakala. Baamba Manase ne chindobo bamuboa kamakhono ne kiminyololo kie kumukasa mala bamuyila e Babiloni.

¹²Nga Manase aba mu sibi ekongochela Wele Omunyali Owa Bioosi Wele wewe khulwe buyeeti, eboombia lukali ebweeni wa Wele owe bakuuka bewe.

¹³Manase aasaba, mala Wele Omunyali Owa Bioosi aulila liliekoonjelela liewe amukholela siisa. Nio Wele Omunyali Owa Bioosi amureera lundi mu Yerusalemu, mu bwami bwewe. Nio Manase amanya ali Wele Omunyali Owa Bioosi, ali Wele.

¹⁴Enyuma wa kano Manase ombakha lisiisi lienje lie Lukoba lwa Daudi. Aliombakha mwitoma, mumbo mwe khakheechi kha Kihoni. Ombakha lundi e muliango kwe Silibwa sie Eng'eeni mala abotookha sikulu sia Ofeli. Aniinia lisiisi lino lialea lukali. Ara banamae bakhulu mu ngoba choosi chisire mu Yuda.

¹⁵Manase arusiao wele babaandi ne bifwaani khukhwama mu nju ya Wele Omunyali Owa Bioosi. Arusiao lundi chi alutare choosi nicho aaba ne ombakha khu sikulu sie nju ne mu Yerusalemu. Abirusia abimwaata enje we lukoba.

¹⁶Lundi akobosiao alutare eya Wele Omunyali Owa Bioosi mala aanilakho chimbosio che biianwa bie kumuleembe nende bie khusiima. Manase alaka babaandu ba Yuda basaaye Wele Omunyali Owa Bioosi, Wele owa Isiraeli.

¹⁷Kakhaba kario, babaandu bachiililila khuana chimbosio abuundu aesuta, ne kakhali chimbosio chabwe chaanwa khu Wele Omunyali Owa Bioosi, Wele wabwe yeng'ene.

¹⁸Bibiindu bibiindi nibio Manase akhola, lisaba liewe khu Wele wewe, ne kamakhuwa niko be kamalola bamuboolela mu lisina lia Wele Omunyali Owa Bioosi, Wele owa Isiraeli, bioosi biaandikwa mu sitabu sie chingano che babaami Baisiraeli.

¹⁹Lisaba lia Manase ne siisa sia Wele khu niye, bumayaanu bwewe bwoosi ne khulekha khuba omweyikinwa, abuundu niio ombakha abuundu aesuta ne khusaaya bifwaani bia wele Ashera, ne bifwaani bibiindi, ebweeni ne akheboombia tawe, bioosi biaandikwa mu sitabu sie chingano che bang'oosi.

²⁰Manase aafwa mala bamusiikha munju yewe. Nio omwana wewe Amoni amiia mu bweyaangu bwewe.

²¹Amoni aaba ne bukhulu bwe kimiiko kamakhumi kabili ne kibili nga aarakikha khukhwamiia. Aba omwami khulwe kimiiko kibili mu Yerusalemu.

²²Akhola kaali kamamayaanu khu Wele Omunyali Owa Bioosi bulayi bwene nga Manase raraawe ne akhola. Amoni asaaya ne khuana chimbosio khu bifwaani bioosi nibio raraawe Manase aba akhola.

²³Amoni se eboombia ebweeni wa Wele Omunyali Owa Bioosi nga raraawe Manase ne akhola tawe. Ne kakhali Amoni yuno aakhola bumayaanu khutasilila busa.

²⁴Bakholi bewe bamukwangwaanila mala bamwirira munju yewe.

²⁵Ne kakhali babaandu be mu sibala esio beera boosi babakwangwaanila omwami Amoni mala bamiisia omusoleeli wewe Yosia aba omwami mu bweyaangu bwa raraawe.