Read lubukusu 2 Ke Ch. 35 Bible Online

2 Ke Ch. 35 - lubukusu bible

2 Ke Ch. 35

¹Omwami Yosia aakhola e Pasaka khu Wele Omunyali Owa Bioosi mu Yerusalemu. Limeeme lie e Pasaka lierwa khu ndaalo ekhola ekhumi ne chine eye kumwesi kwe khunyoa.

²Yosia arobora basaayi bakhole kimilimo kiabwe mala abaramo kumwoyo khukhola kimilimo mu nju eya Wele Omunyali Owa Bioosi.

³Aboolela Balawi babekisianga Baisiraeli boosi lundi ba baba batakatifu khu Wele Omunyali Owa Bioosi ali, “Khemure Lisanduku litakatifu mu nju niyo Solomoni okhwa Daudi, omwami owa Isiraeli ombakha. Se mwenyekhana khulisuta khu mabeka lundi tawe. Luno khemukholele Wele Omunyali Owa Bioosi, Wele wenywe ne babaandu bewe ba Isiraeli.

⁴ Yirekekha mwabene khuloondekhana ne lisaaye lienywe ne kimikaanda kienywe, muloonde niko omwami Daudi ne omusoleeli wewe Solomoni baloma.

⁵Ne yiima Abuundu Atakatifu khuloondekhana ne lisaaye lie bawandaayenywe bakhali Balawi tawe. Mala mwimeo mu bweyaangu bwabwe.

⁶Yiira kamameeme ke e Pasaka ne mumalile khukhwitakaasa khulwa Wele Omunyali Owa Bioosi. Rekekha balebe benywe, bakhole khuloondekhana ne likhuwa lia Wele Omunyali Owa Bioosi khubirira khu Musa.”

⁷Nio Yosia aelesia Baisiraeli kamakheese ne chimbusi bioosi alala chielefu kamakhumi kataru khulwe biianwa bie e Pasaka. Lundi aabaelesia chikhaafu chiuunwa chielefu chitaru. Bino bioosi biama mwituuli lio mwami.

⁸Babemeelesi ba Yosia bosi baana ne kumwoyo kwoosi khu baandu, basaayi, ne khu Balawi. Hilikia, Sakaria, ne Yehieli, babemeelesi bakhulu be nju eya Wele, baelesia basaayi kamameeme ne chimbusi chielefu chibili ne chimia sita ne chiuunwa chimia chitaru khulwe biianwa bie e Pasaka.

⁹Babemeelesi be Balawi: Konania ne bawandaaye babili: Shemaya ne Nesaheli, ne Hashabia, Yeieli ne Yosabati baelesia Balawi kamakheese ne chimbusi chielefu chiraano ne chiuunwa chimia chiraano khulwe biianwa bie e Pasaka.

¹⁰Nga buli sisiindu ne siarekekhwa khulwe e Pasaka, basaayi bacha mu bweyaangu bwabwe ne Balawi bacha mu bipupu biabwe khuloondekhana nga omwami ne alaka.

¹¹Beera limeeme lie e Pasaka mala basaayi baanyaka kamalasile niko banyoola khukhwama khu Balawi. Balawi babaaka kamakheese ne chimbusi bie e pasaka.

¹²Nio bara alubeka biianwa bie khukhwosia nio babielesie bipupu bie khu biaana khu Wele Omunyali Owa Bioosi nga liaandikwa mu sitabu sia Musa. Bakhola bario chakhaba ne chiuunwa chosi.

¹³ Boosia limeeme lie e Pasaka khu mulilo khuloondekhana ne lilaka mala bateekha biianwa bitakatifu mu ndekhelo, mu pinika ne khunjo. Nio baelesia khangu babaandu chinyama.

¹⁴Enyuma wa lino Balawi barekekha enyama yabwe babene ne eye basaayi, be lisaaye lia Aruni. Enyuma wako Balawi bababikhila chinyama sikila basaayi bakhola kimilimo khukhwola mu silo; baana biianwa bie khukhwosia ne khukhwosia kiminawa kie mbosio.

¹⁵ Babeembi be kimienya be nju eya Asafu bema mu bweyaangu khuloondekhana ne lilaka lio mwami Daudi ne lia Asafu, Hemani, ne Yedutuni owe kamalola owo mwami. Baliindi be bilibwa baba buli a silibwa. Se benyekhana balekhe kimilimo kiabwe tawe, sikila Balawi basiaabwe baba babarekekheele buli sisiindu.

¹⁶Nio kimilimo kia Wele Omunyali Owa Bioosi koosi kiarekekhwa endaalo eyo. Kiarekekhwa khulwe khukhola e Pasaka ne khuaana biianwa bie khukhwosia khu alutare eya Wele Omunyali Owa Bioosi khuloondekhana ne lilaka lio mwami Yosia.

¹⁷ Baisiraeli ba babayo baba bakhola e Pasaka khu siise esio ne naikara eye kumukaati kukhalimo limela tawe, khulwe chindaalo saba.

¹⁸E Pasaka nga eyo erio se yaba yayikholekhakho mu Isiraeli ta, mukhwama mu ndaalo cho omung'oosi Samweli. Mbao omwami owa Isiraeli owaba ne akholakho e Pasaka nga niio mwami Yosia, basaayi, Balawi, babaandu boosi ba Yuda ne Isiraeli ba babayo, ne babaandu ba Yerusalemu bakhola tawe.

¹⁹Mu mwiiko kwe likhumi ne munaane, kwe khukhwamiia khwa Yosia, e Pasaka yino yakholwa.

²⁰Enyuma wa kano koosi, Yosia ne aarekekhe Lukaangu, Neko omwami owa Misiri acha khukhwibwaakala Karikemishi, lukoba luli khu sikiingi sie luluuchi lwa Efurati. Ne Yosia arura khukhwibwaakala Neko.

²¹Ne kakhali Neko aruma barumwa khu Yosia ne aloma ali, “Liie likhaba akari wefwe tawe. Ese se nechile khukhupana ne nawe tawe ne kakhali ese nechile khukhupana ne basiku base. Wele andakile khole khangu. Lekha khuyingania Wele oli ne nase akhola ario akhubunia.”

²²Ne kaba kario Yosia se arurayo aukha amulekha tawe. Yosia efwara chingubo chichiindi ekaluukhasia nio omundu akhamumanya ne ali niye tawe. Se aulila kamakhuwa ka Neko, khuloondekhana ne lilaka lia Wele tawe. Yosia acha khukhupana khu mweyeeywe kwa Mekido.

²³Mu liie balasi be buembo balasa omwami Yosia. Yosia aboolela bakholi bewe ali, “Mbukule mundusie ano sikila bandasile burafu.”

²⁴Nio bakholi bewe bamubukula bamurusia mwikaari liewe lie liie, bamura mu liindi mala bamuyila e Yerusalemu. Afwila ebweeneyo mala asiikhwa mu biliindwa bie bakuuka bewe. Babaandu boosi ba Yuda ne Yerusalemu balila Yosia.

²⁵Omung'oosi Yeremia yesi aakhola kimienya kie lilila khu Yosia. Babeembi boosi be kimienya be siseecha ne siikhasi balomalomanga khu Yosia mu mienya kiabwe khukhwola luno. Bakhola lino liaba lilaka mu Isiraeli kimienya kino kiaandikwa mu mienya kie bubeeleli.

²⁶Nono bibiindu bibiindi nibio Yosia aakhola, bikholwa biewe bilayi khuloondekhana ne nako kakaandikwa mu lilaka lia Wele Omunyali Owa Bioosi.

²⁷Bikholwa biewe khukhwama khu sie khunyoa khukhwola khu simaliilisi bioosi biaandikwa mu sitabu sie babaami ba Isiraeli ne Yuda.